ފިނިކުރި މަސް ބޭރުކޮށްގެން މިފްކޯއަށް ފައިދާގެ ގޮތުގައި 1.73 ބިލިއަން
ފިނިކުރި މަސް ބޭރުކޮށްގެން މިދިޔަ އަހަރު ފައިދާގެ ގޮތުގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯއަށް 1.73 ބިލިއަން ރުފިޔާ ލިބިއްޖެ އެވެ.
މިފްކޯއިން އަންނަނީ ބޭރުގެ މާކެޓުގައި ތިން ބާވަތެއްގެ ޕްރޮޑަކްޓްތައް ވިއްކަމުންނެވެ. އެއީ ފިނިކުރި މަހާއި، މަސް ދަޅާއި ޕައުޗް އަދި ފިޝް މީލްއެވެ. މިފްކޯއިން ނެރުނު "އެނުއަލް ރިޕޯޓް 2023" ގައި ބުނީ، މި ތިން ބާވަތުން ވެސް 2022 ވަނަ އަހަރާއި ބަލާއިރު، ބޮޑު ފައިދާއެއް ލިބިފައިވާ ކަމަށެވެ.
މިފްކޯގެ ޗެއާމަން އަހުމަދު ޝަރީފް ވިދާޅުވީ، ދެމެހެއްޓެނިވި ގޮތެއްގައި ކުރިއެރުން ހޯދާއި، އިގްތިސާދުގެ ހިއްސާދާރަކަށް ވުމަކީ އަމާޒެއް ކަމަށެވެ. އަދި މިދިޔަ އަހަރު އެ ކުންފުންޏަށް މާލީ ގޮތުން ބޮޑު ކުރިއެރުމެއް ލިބިފައިވާ ކަމަށެވެ.
"މިދިޔަ އަހަރުގެ ގްރޮސް ޕްރޮފިޓް 232 މިލިއަން ރުފިޔާއަށް އަރައިފި. ޖުމުލަ ގޮތެއްގައި ލިބުނު ފައިދާ 2022 ވަނަ އަހަރާއި އަޅާ ބަލާއިރު 19 އިންސައްތަ ބޮޑު،" ޝަރީފް ވިދާޅުވިއެވެ.
މިފްކޯގެ ރިޕޯޓްގައި ބުނީ، ފިނިކުރި މަސް ބޭރުކޮށްގެން މިފްކޯއަށް 1.731 މިލިއަން ރުފިޔާ ލިބިފައިވާ ކަމަށާއި، އެ އަދަދަކީ 2022ވަނަ އަހަރާއި އަޅާ ބަލާއިރު، 297 މިލިއަން ބޮޑު އަދަދެއް ކަމަށެވެ. 2022 ވަނަ އަހަރު ފިނިކުރި މަސް ބޭރުކޮށްގެން މިފްކޯއަށް ފައިދާގެ ގޮތުގައި ލިބިފައިވަނީ 1،434 މިލިއަން ރުފިޔާއެވެ. އަދި މިދިޔަ އަހަރު ލިބިފައިވަނީ 1،731 މިލިއަން ރުފިޔާ އެވެ.
އެ ރިޕޯޓުގައި ބުނެފައިވާ ގޮތުން، މިދިޔަ އަހަރު ބޭރުކޮށްފައިވަނީ 62,352 މެޓްރިކް ޓަނުގެ ފިނިކުރި މަހެވެ. އަދި 2022 ވަނަ އަހަރު ބޭރުކޮށްފައިވަނީ 55,989 މެޓްރިކް ޓަނުގެ ފިނިކުރި މަސް ކަމަށް ވެސް ބުނެފައި ވެ އެވެ.
މިފްކޯއިން ބުނި ގޮތުގައި މަސް ދަޅާއި ޕައުޗް ބޭރުގެ މާކެޓުގައި ވިއްކައިގެންނެވެ. އޭގެން އާމްދަނީގެ ގޮތުގައި މިދިޔަ އަހަރު ލިބިފައިވަނީ 148 މިލިއަން ރުފިޔާއެވެ. 2022 ވަނަ އަހަރު އޭގެން މިފްކޯއަށް އާމްދަނީގެ ގޮތުގައި ލިބިފައިވަނީ 143 މިލިއަން ރުފިޔާ އެވެ.
މިދިޔަ އަހަރު ބޭރުގެ މާކެޓުގައި ވިއްކާފައިވަނީ 227,910 ކޭސް މަސްދަޅާއި ޕައުޗް ކަމަށް މިކްފޯއިން ބުނެއެވެ. އަދި 2022 ވަނަ އަހަރު ވިއްކާފައިވަނީ 174,295 ކޭހެވެ.
ފިޝް މީލް ބޭރުގެ މާކެޓުގައި ވިއްކައިގެން މިފްކޯއިން ވަނީ މިދިޔަ އަހަރު އާމްދަނީގެ ގޮތުގައި 28 މިލިއަން ރުފިޔާ ހޯދާފައެވެ. 2022 ވަނަ އަހަރު ފިޝް މީލް ޕެކް ވިއްކައިގެން މިފްކޯއަށް ލިބިފައިވަނީ 24 މިލިއަން ރުފިޔާގެ އާމްދަނީ އެކެވެ.
ބޭރުގެ މާކެޓުގެ އިތުރުން ރާއްޖޭގެ މާކެޓުގައި ވެސް މިފްކޯއިން އަންނަނީ ތަފާތު އެކި ޕްރޮޑަކްޓްތައް ވިއްކާ، އާމްދަނީ ހޯދަމުންނެވެ. އެގޮތުން، މަސްދަޅާއި ޕައުޗް ވިއްކައިގެން 287 މިލިއަން ރުފިޔާގެ އާމްދަނީއެއް މިދިޔަ އަހަރު ލިބިފައިވާ ކަމަށް މިފްކޯގެ ރިޕޯޓްގައި ފާހަގަ ކޮށްފައިވެ އެވެ. މީގެން 2022 ވަނަ އަހަރާއި އަޅާ ބަލާއިރު އާމްދަނީގެ ގޮތުގައި މިދިޔަ އަހަރު ލިބިފައިވާ އަދަދު 58 މިލިއަނަށް ވުރެ ބޮޑެވެ.
