Sunday, 22 November 2026
Advertisement
Allied Insurance (leaderboard)
ޚަބަރު

ލޯނު ދޫކުރާ އުމުރުފުރާ 75 އަހަރަށް ބަދަލުކުރަން ރައީސް އެދިވަޑައިގެންފި

ބޭންކުތަކުން ލޯނު ދޫކުރާ އެންމެ މަތީ އުމުރަކީ 75 އަހަރު ކަމަށް ކަނޑައަޅަން މާލީ އިދާރާތަކުގައި އެދިވަޑައިގެންފައިވާނެ ކަމަށް ރައީސް ވިދާޅުވެއްޖެއެވެ.

ރައްޔިތުންގެ އަޑު ސިލްސިލާގެ އެޕިސޯޑް 14ގެ ތެރެއިން / ފޮޓޯ: ރައީސުލްޖުމްހޫރިއްޔާގެ އޮފީސް
ރައްޔިތުންގެ އަޑު ސިލްސިލާގެ އެޕިސޯޑް 14ގެ ތެރެއިން / ފޮޓޯ: ރައީސުލްޖުމްހޫރިއްޔާގެ އޮފީސް

ރާއްޖޭގެ ބޭންކުތަކުން ލޯނު ދޫކުރުމުގައި މިހާރު ކަނޑައަޅާފައިވާ އެންމެ މަތީ އުމުރުފުރާ 75 އަހަރަށް ނުވަތަ އެއަށްވުރެ މައްޗަށް ބަދަލުކޮށްދިނުމަށް ކަމާބެހޭ އިދާރާތަކުގައި އެދިވަޑައިގެންފައިވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ އާންމުންގެ ޝަކުވާތަކަށް ޖަވާބުދެއްވުމަށް ސަރުކާރުން ކުރިއަށްގެންދާ "ރައްޔިތުންގެ އަޑު" ޕްރޮގްރާމުގައެވެ.

ރައީސް ވިދާޅުވީ، މީގެ ކުރިން ބޭންކް އޮފް މޯލްޑިވްސް (ބީއެމްއެލް) ފަދަ މާލީ އިދާރާތަކުން 60 އަހަރުގެ އުމުރުފުރާއެއް ކަނޑައެޅީ އޭރު ދިވެހިންގެ އެވްރެޖް އުމުރު ދަށްވުމުން ކަމަށެވެ. ނަމަވެސް މިހާރު ރާއްޖޭގައި އަންހެނުންނާއި ފިރިހެނުންގެ ވެސް އެވްރެޖް އުމުރު 80 އަހަރާ ގާތްކުރާތީ، ލޯނު ދޫކުރާ އުމުރު 75 އަހަރަށް ބަދަލުކުރުމަށް މާލީ ވުޒާރާއަށާއި ބޭންކަށް ދަންނަވާފައިވާނެ ކަމަށް އެމަނިކުފާނު ފާހަގަކުރެއްވިއެވެ. މިކަމަށް ބަދަލުތަކެއް ގެނައުމުގެ މަސައްކަތް މިހާރު ވެސް ހިނގަމުންދާ ކަމަށް ރައީސް ވިދާޅުވިއެވެ.

މާލޭގެ މަގުތަކާއި ގޯޅިތަކުގައި ޕާކުކުރުމުގެ ސަބަބުން ދިމާވާ ދަތިތަކާ ގުޅޭގޮތުން ވާހަކަދައްކަވަމުން ރައީސް ވިދާޅުވީ، އެކަމަށް ހައްލެއް ހޯދުމަށް ޓްރާންސްޕޯޓް މިނިސްޓްރީގެ ދަށުން ހާއްސަ އޮފީހެއް އުފައްދައި، އަމަލީ މަސައްކަތްތައް ފަށާނެ ކަމަށެވެ. އަދި މަސްމާރުކޭޓު ސަރަހައްދުގެ މަގުތައް ތަރައްގީކުރުމުގެ ރޭވުންތަކެއް ވެސް އެބަހުރި ކަމަށް ވިދާޅުވިއެވެ.

މީގެއިތުރުން، ތިލަފުށިން ބިން ހޯދުމާއި އެ ރަށުގެ އުމްރާނީ ތަރައްގީއާ ގުޅޭގޮތުން ވެސް ރައީސް ވާހަކަދެއްކެވިއެވެ. އެގޮތުން ތިލަފުށިން ބިން ހޯދުމަށް އެޗްޑީސީއަށް ހުށަހެޅުމަށާއި، އެ ރަށުގެ މަގުތަކާއި ނަރުދަމާގެ ނިޒާމު ރަނގަޅު ފެންވަރަކަށް ތަރައްގީކުރުމަކީ ސަރުކާރުގެ މުސްތަގުބަލުގެ ޕްލޭނުގައި އޮތް ކަމެއް ކަމަށް އެމަނިކުފާނު ވިދާޅުވިއެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.