Sunday, 22 November 2026
Advertisement
Allied Insurance (leaderboard)
ޚަބަރު

ފަޔަރ ވެހިކަލުތައް ދުއްވުން ގިނަވާނެ، "އެކްސަސައިޒް ޖައްރާފާ-2026" ފަށައިފި

އެމްއެންޑީއެފް ފަޔާ އެންޑް ރެސްކިޔު ސާވިސްގެ ފަޔަރ އިމަޖެންސީ ޕްލޭނަށް އަހުލުވެރިވުމަށް ކުރިއަށްގެންދާ "އެކްސަސައިޒް ޖައްރާފާ-2026" މިއަދު ފަށައިފިއެވެ.

އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ބާއްވާ “އެކްސަސައިޒް ޖައްރާފާ-2026” / ފޮޓޯ: ދިފާއީ، ވަޠަނީ ޚިދުމަތާ ބެހޭ ވުޒާރާ
އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ބާއްވާ “އެކްސަސައިޒް ޖައްރާފާ-2026” / ފޮޓޯ: ދިފާއީ، ވަޠަނީ ޚިދުމަތާ ބެހޭ ވުޒާރާ

އެމްއެންޑީއެފް ފަޔާ އެންޑް ރެސްކިޔު ސާވިސް (އެފްއާރްއެސް) އިން އިންތިޒާމުކޮށްގެން ބާއްވާ "އެކްސަސައިޒް ޖައްރާފާ-2026" މިއަދު ވަނީ ފަށާފައެވެ.

ދެ ދުވަހުގެ މުއްދަތަށް ކުރިއަށްގެންދާ މި ތަމްރީނުތައް ރަސްމީކޮށް ފައްޓަވައިދެއްވީ ކަޅުތުއްކަލާކޮށީގައި ބޭއްވި ރަސްމިއްޔާތެއްގައި ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހީމް ހިލްމީއެވެ.

މި ތަމްރީނުތައް މާލެ، ހުޅުމާލެ، ވިލިމާލެ، ތިލަފުށި އަދި ކްރޮސްރޯޑްސްގެ އެއްގަމާއި ކަނޑުގެ ސަރަހައްދުގައި ކުރިއަށްދާނެއެވެ. އެމްއެންޑީއެފުން ބުނި ގޮތުގައި މި ވަގުތުތަކުގައި ގްރޭޓާ މާލެ ސަރަހައްދުގެ މަގުތަކުގައި ސައިރަން އަދި ބީކަންއާ އެކު ފަޔާ ވެހިކަލްތައް ބާރު ސްޕީޑްގައި ދަތުރުކުރާނެތީ އެކަމަށް އާންމުން ސަމާލުވުމަށް ވަނީ އިލްތިމާސްކޮށްފައެވެ.

މި އެކްސަސައިޒްގެ މައިގަނޑު މަގުސަދަކީ އެފްއާރްއެސްގެ ފަޔާ އިމަޖެންސީ އޮޕަރޭޝަނަލް ޕްލޭނަށް އަހުލުވެރިވުމާއި، ބޮޑެތި އަލިފާނުގެ ހާދިސާތަކަށް އިޖާބަދިނުމުގައި ސިފައިންގެ ހުނަރާއި ވަސީލަތްތައް ބޭނުންކުރާ މިންވަރު ދެނެގަތުމެވެ.

މިއަދު ބޭއްވި ރަސްމިއްޔާތުގައި އެފްއާރްއެސްގެ ކޮމަޑާންޓް ބްރިގޭޑިއާ ޖެނެރަލް ހުސައިން އަލީއާއި، އެފްއާރްއެސްގެ ޕްރިންސިޕަލް ޑައިރެކްޓާ ލެފްޓިނެންޓް ކާނަލް އަހްމަދު ފާއިޒު ރަޝާދުގެ އިތުރުން އެ އިދާރާގެ އިސް އޮފިސަރުންނާއި އެންލިސްޓެޑް ރޭންކުތަކުގެ ސިފައިން ބައިވެރިވެވަޑައިގެންނެވިއެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.