މާލެއިން އަމިއްލަ ރަަށަށް މީހުން ހިޖުރަކޮށްގެން ނޫނީ ތަރައްގީ ނުގެނެވޭނެ: ހައިދަރު

ރާއްޖޭގެ ޖުމްލަ އާބާދީގެ 40 އިންސައްތަ ދިރިއުޅެމުން އަންނަނީ މާލެ ސަރަހައްދުގައި ކަމަށް ވުމުން ސަރަހައްދުތައް ތަރައްގީކޮށް ކުރިއެރުން ހޯދުމަށް އެ ތަންތަނަށް މާލެއިން ވެސް މީހުން ހިޖުރަކުރަން ޖެހޭ ކަމަށް ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެ އެވެ.

Ads by STELCO

ސަރުކާރުގެ ސިޔާސަތަކީ އުތުރުގެ އަތޮޅުތަކުގައި 3 އާބަން ސެންޓަރަކާއި ދެކުނުގައި 4 އާބަން ސެންޓަރެއް ހިމެނޭ ގޮތަށް ޖުމްލަ 7 އާބަން ސެންޓަރު ރާއްޖޭގެ އެކި ސަރަހައްދުތަކުގައި ތަރައްގީ ކުރުމަށެވެ.

އަދި މާލެ އާބަން ރީޖަންގެ އިތުރުން އެންމެ މަތީފަންތީގެ ހިދުމަތްތައް ހިމެނޭހެން އެންމެ އުތުރުގެ 3 އަތޮޅު ހިމެނޭހެން ނޮދަން އިންޓެގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓެގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުމަކީ ވެސް ސިޔާސަތެކެވެ.

މާލެ ސަރަަހައްދުން ލިބެން ހުރި ހިދުމަތްތައް ރާއްޖޭގެ އެކި ސަރަަހައްދުތަކުގައި ގާއިމުކުރެވޭ އާބަން ސެންޓަރުތަކުން ލިބޭނެ މަގުތަނަވަސްވުމުން އަންނާނެ ބަދަލުތަކާ ގުޅޭގޮތުން ދައުލަތުގެ މީޑިއާއިން ގެނެސްދޭ "ރާއްޖެމިއަދު" ޕްރޮގްރާމުގައި ރޭ ވާހަކަ ދައްކަވަމުން ހައިދަރު ވިދާޅުވީ ސެންޓަރުތައް ގާއިމުކުރެވުމުން މާލެއަށް އައުމުގެ ބަދަލުގައި އެފަދަ ތަންތަނުން ބޭނުންވާ ހިދުމަތްތައް ލިބޭނެ ކަމަށެވެ. އެކަމުގެ ސަަބަބުން ކުދި ވިޔަފާރިތައް ހިންގުމަށް ފަސޭހަވާނެ ކަމަށެވެ.

"ޑިމާންޑެއް ނެތިއްޔާ އެެއްވެސް ވިޔަފާރިއެއް ނުކުރެވޭނެ. އެހެންވީމާ ޑިމާންޑް އުފެދޭނީ ގިނަ މީހުން ދިރިއުޅެގެން. ބޮޑު އާބާދީއެއް އޮވެގެން،" ހައިދަރު ވިދާޅުވި އެވެ.

މާލެ ސަރަހައްދުގައި ގިނަ އަދަދެއްގެ ކުދި އަދި މެދުފަންތީ ވިޔަފާރިތައް ކުރަމުން އަންނަނީ މި ސަރަހައްދުގައި ބޮޑު އާބާދީއެއް އޮތުމުން ކަމަށާއި އާބާދީ އިތުުރުވާ ވަރަކަށް ގިނަ ހިދުމަތްތަކަށް ފުރުސަތު ތަނަވަސްވެ، ވަޒީފާތަކުގެ އަދަދު އިތުުރުވާ ކަމަށް މިނިސްޓަރު ވިދާޅުވި އެވެ.

މާލެ ސަރަހައްދަށް ފަހު އެންމެ ބޮޑު އާބާދީއެއް އޮތީ އައްޑޫ ސިޓީގައިކަން ފާހަގަކުރައްވާ ހައިދަރު ވިދާޅުވި ގޮތުގައި އެ ސިޓީ އާއެކު ހުވަދު އަތޮޅާ އަދި ފުވައްމުލަށް ސިޓީ އެއްކޮށްލުމުން އެ ސަރަހައްދަށް ފަތުރުވެރިކަމާއި މަސްވެރިކަމާއި ދަނޑުވެރިކަން ފަދަ ސިނާއަތްތަކުން ފުރުސަތުތައް ފަހިކުރެވޭ ކަމުގަ އެވެ.

"ގިނަ މީހުން މާލޭގައި އުޅޭ ކަމަށް ވަންޏާ އޭގެ މާނައަކީ ވަރަށް ކުޑަ އާބާދީއެކޭ ރަށްރަށުގައި މި އުޅެނީ. އެހެންނަމަވެސް އަޅުގަނޑުމެންގެ ފޯކަސްއަކަށް ވާންވީ ސަރަަހައްދުތައް ތަރައްގީ ކުރުމަށް އެ ހިސާބަށް ހިޖުރަ ކުރަން އެބަޖެހޭ. މާލެ ސަރަހައްދުން ވެސް،" ހައިދަރު ވިދާޅުވި އެވެ.

ރާއްޖެއަކީ ގާތްގަނޑަކަށް ހަތަރު ލައްކައެއްހާ މީހުންގެ ކުޑަ އާބާދީއެއް ކަމުގަ އެވެ. އެހާ ކުޑަ އާބާދީއަކަށް ވުމާ އެކު މާގިނަ ސަރަަހައްދުތަކެއް ތަރައްގީ ކުރެވޭ ވަރުގެ އާބާދީއެއް މިވަގުތު ނެތްކަން މިނިސްޓަރު ފާހަގަކުރެއްވި އެވެ. އާބާދީގެ 40 އިންސައްތަ ދިރިއުޅެމުން އަންނަނީ މާލެ ސަރަހައްދުގައި ކަމުގަ އެވެ. އެއީ ޖުމްލަ އާބާދީގެ ފަސްބައިކުޅަ ދެބައި މީހުން ކަމުގަ އެވެ.

ހައިދަރު ވިދާޅުވީ މާލެއަށް ދިމާވެފައިވާ ތޮށްޖެހުމުގެ މައްސަލައަށް ވެސް ލުޔެއް ލިބެން އޮތީ ރަށްރަށުގެ ތަރައްގީ ކުރިއަރުވައިގެން ކަމަށެވެ. ކަންކަން ބައްޓަން ކުރަން ޖެހެނީ އެގޮތަށް ވިސްނައިގެން "ރިވާސް މައިގްރޭޝަން" އަށް ފަހިވާ ގޮތަށް ކަމަށެެވެ.

"މިކޮޅަށް ބަދަލުވެފައި ތިބި މީހުން، އަމިއްލަ ރަށަށް ބަދަލުވެގެން ރަށުގެ ކުރިއެރުމަށް މަސައްކަތް ކުރާނެ ކަމަށް އަޅުގަނޑުމެން މި ދެކެނީ. އެ ފުރުސަތުތައް ހުޅުވިގެން ހިނގައްޖެއްޔާ،" ހައިދަރު ވިދާޅުވި އެވެ.

މިހާތަނަށް އައިއިރު ރަށްތައް ތަރައްގީކޮށް ކުރިއަރުވަން މާގިނަ ފުރުސަތުތަކެއް ލިބިދީފައި ނުވާ ކަަމަށެެވެ. އެހެންނަމަވެސް މި ސަރުކާރުން ބޭނުންވަނީ ރަށްތަކަށް ތަރައްގީ ގެނެސް، ރަށްރަށުން ފޯރުކޮށްދޭ ހިދުމަތްތަކާ އެކު ދިރުން ގެނެސް، ރައްޔިތުންނަށް ލިބެން ޖެހޭ ލުއިފަސޭހަތައް ހޯދައިދިނުމަށްކަން މިނިސްޓަރު ފާހަގަކުރެއްވި އެވެ. އެތަން ފެނުނީމާ، އަނބުރާ ރަށްރަށަށް ދާނެ މީހުންގެ އަދަދު ގިނަވާނެ ކަމަށް ލަފާކުރެއްވޭ ކަމަށެވެ.

އާބަން ސެންޓަރުތަކުގައި ނުވަތަ އާބަން ރީޖަންތަކުގައި ހިތްފަސޭހަ ދިރިއުޅުމެއް އުޅުމުގެ ފުރުސަތު ފަހިކުރެވިއްޖެ ނަމަ، މާލެ ސަރަަހައްދުގައި ތޮށްޖެހިގެން ދިރިއުޅެން ގިނަ ބަޔަކު ބޭނުން ނުވާނެ ކަމުގައި މިނިސްޓަރު ފާހަގަކުރެއްވި އެވެ.