އިޒްރޭލު ޕާސްޕޯޓު މަނާކުރާ ބިލުގެ މަސައްކަތް އަންނަ ފެބްރުއަރީގައި ނިންމަން ފާސްކޮށްފި
އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާކުރަން އިމިގްރޭޝަން ގާނޫނަށް އިސްލާހު ގެނައުމަށް ހުށަހަޅާފައިވާ ބިލުގެ މަސައްކަތް އަންނަ އަހަރުގެ ފެބްރުއަރީ މަހުގެ ނިޔަލަށް ނިންމުމަށް ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީން ފާސްކޮށްފި އެވެ.
ވަޒީރުންގެ މަޖިލިހުގެ މަޝްވަރާ އާއި ލަފާގެ މަތިން އިޒްރޭލް ޕާސްޕޯޓުގައި ރާއްޖެއަށް ނުވަދެވޭ ގޮތަށް އިމިގްރޭޝަން ގާނޫނަށް ގެންނަން ޖެހޭ ބަދަލުތައް ގެނައުމަށް ރައީސް ޑރ. މުހައްމަދު މުއިއްޒު ނިންމަވާފައި ވަނީ މިދިޔަ ޖޫން މަހުގެ ދެ ވަނަ ދުވަހު އެވެ.
އެގޮތަށް ނިންމިއިރު، އިޒުރޭލު ޕާސްޕޯޓު މަނާކުރުމާ ގުޅޭގޮތުން ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއީލް އަހުމަދު ނަސީމް ހުށަހެޅުއްވި ބިލު ބަލައިގަނެ، 241 ކޮމިޓީއަށް ވަނީ ފޮނުވާފަ އެވެ. އެހެންކަމުން ސަރުކާރުންނާއި ވެރިކަން ކުރާ މައި ޕާޓީ ޕީޕަލްސް ނޭޝަނަލް ކޮންގްރެސް، ކޮންގްރެސް ޕާޓީން ނިންމީ މީކާއީލް ހުށަހެޅުއްވި ބިލާ އެކު ކުރިއަށް ދިއުމަށެވެ.
ނަމަވެސް އިޒްރޭލް ޕާސްޕޯޓް އޮތް އެންމެނަށް ޖުމްލަ މާނައެއް ދިނުމުގެ ބަދަލުގައި ބިލުގައި އޮތް ގޮތް ބަދަލު ކުރުމާ މެދު ވިސްނައި ދިރާސާ ކުރަން ޖެހޭނެ ކަމަށް ބަންޑާރަ ނައިބު އަހުމަދު އުޝާމް މީގެކުރިން ވިދާޅުވެފައިވެ އެވެ.
މީގެ ފަސް މަސް ދުވަސް ކުރިން، މިދިޔަ ޖޫން މަހުގެ ކުރީކޮޅު މީކާއީލް ހުށަހެޅުއްވި ބިލު ކޮމިޓީއަށް ފޮނުވި ނަމަވެސް މިހާތަނަށް އެ ބިލުގެ މަސައްކަތް އޮތީ ނުފަށަ އެވެ. އެކަމުގެ ކަންބޮޑުވުން ކޮންގްރެސް ޕާޓީންނާއި އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ، އެމްޑީޕީން ވަނީ ފާޅުކޮށްފަ އެވެ. އޭގެ އިތުުރުން ކަމާ ގުޅިގެން އާންމުންގެ ހުރި ކަންބޮޑުވުންތައް ވެސް ދަނީ ފާޅުކުރަމުންނެވެ.
އިޒްރޭލު ޕާސްޕޯޓު މަނާކުރާ ބިލުގެ މަސައްކަތް އެޖެންޑާކޮށް މިއަދު ބޭއްވި 241 ކޮމިޓީގެ މިއަދުގެ ބައްދަލުވުމުގައި މައްސަލަ އާ ގުޅޭގޮތުން ވާހަކަ ދައްކަވަމުން ތުޅާދޫ ދާއިރާގެ މިނިވަން މެމްބަރު އަބްދުލްހަންނާން އަބޫބަކުރު ވިދާޅުވީ މައްސަލައަކީ ހައްސާސީ މައްސަލައަކަށް ވުމާ އެކު ކަމާ ގުޅުންހުރި މުއައްސަސާތަކާ މަޝްވަރާކުރަން ޖެހޭ ކަމަށެވެ. އަދި މި ދުވަސްވަރު ބަޖެޓުގެ މަސައްކަތަށް ވަގުތު ހުސްކުރަން ޖެހުމާ އަދި ޑިސެމްބަރު މަހުގެ ފުރަތަމަ ދުވަހުން ފެށިގެން ދެ މަސް ދުވަހަށް މަޖިލިސް ޗުއްޓީއަށް ދާތީ ބިލުގެ މަސައްކަތް އަންނަ އަހަރުގެ ފެބްރުއަރީ މަހުގެ ނިޔަލަށް ކޮށް ނިންމުމަށް އޭނާ ހުށަހެޅުއްވި އެވެ.
ތުޅާދޫ ދާއިރާގެ މެމްބަރުގެ ހުށަހެޅުއްވުމަށް ތާއީދުކުރައްވާ މާފަންނު އުތުުރު ދާއިރާގެ އެމްއެންޕީ މެމްބަރު މުހައްމަދު ނާޒިމް ވެސް ވިދާޅުވީ ހައްސާސް މައްސަލައަކަށް ވުމާ އެކު، މަދު އަދަދެއްގެ މެމްބަރުންތަކެއް ތިބެފައި ކަމާ މެދު ގޮތެއް ނިންމުމަކީ ރަނގަޅު ގޮތެއް ނޫން ކަމަށެވެ. ވުމާ އެކު މުއައްސަސާތަކާއި ސިޔާސީ ޕާޓީތަކާއި އުފެދިފައިވާ މަދަނީ ޖަމިއްޔާތަކާ އަދި އެހެނިހެން ކަމާ ބެހޭ ފަރާތްތަކާ މަޝްވަރާކުރަން ޖެހޭ ކަމަށެވެ. އަދި ވަކިން ހާއްސަކޮށް އިގުތިސޯދީ ގޮތުން ދަތި ދަނޑިވަޅެއްގައި މިފަދަ އިތުުރު ކަމެއް ކުރުމުގެ ކުރިން ވިސްނަން ޖެހޭ ކަމަށް ވެސް ނާޒިމް ވިދާޅުވި އެވެ.
އިތުރަށް ވިދާޅުވި ގޮތުގައި ބިލު ހުށަހަޅާފައި ވަނީ ސިޔާސީ ގޮތުން މެމްބަރުންގެ މައްޗަށް ނުފޫޒު ހިންގުމުގެ އިތުރުން ސަރުކާރަށް ނުފޫޒު ފޯރުވައި ރައްޔިތުންގެ ކުރިމަތީގައި ސަރުކާރު ނިކަމެތި ކުރުމަށް ކަމަށް ގަބޫލުކުރައްވާ ކަމުގަ އެވެ. މިދިޔަ ސަރުކާރުގައި ކަމާ ގުޅިގެން މައްސަލަ ހުށަހެޅި ކަމަށާއި އެކަމަކު ސަރުކާރު ނިމިގެން ދިޔައިރު ވެސް ވަކި ގޮތެއް ނިންމާފައި ނުވާ ކަމުގަ އެވެ. އެކަން ނުކޮށް މި ސަރުކާރަށް ބުރަވާ ގޮތަށް އަމަލުކޮށްފައި ވަނީ ސަރުކާރު ބަދުނާމު ކުރުމުގެ ގޮތުން ކަމަށް ނާޒިމް ވިދާޅުވި އެވެ.
ވިދާޅުވީ ބިލު ހުށަހެޅި ނިޔަތް ސާފު ނުވާ ކަމަށާއި މައްސަލައިގައި އަމަލު ކުރެވޭ ގޮތަކުން ކޮށްފާނެ އަސަރުތައް ދެނެގަންނަން ޖެހޭ ކަމަށެވެ. ވުމާ އެކު މަޝްވަރާކުރަން ޖެހޭ ފަރާތްތަކާ މަޝްވަރާކޮށް، ހިނގަމުންދާ ދައުރުގެ ތެރޭގައި ބިލުގެ މަސައްކަތް ނިންމިދާނެ ކަމަށް ދެކިވަޑައިނުގަންނަވާ ކަަމަށެވެ. ވުމާ އެކު ހަންނާން ހުށަހެޅުއްވި ގޮތަށް އަންނަ ދައުރުގައި މަސައްކަތް ނިންމުމަށް ތާއީދުކުރައްވާ ކަމަށެވެ.
އިޒްރޭލު ޕާސްޕޯޓު މަނާކުރާ ބިލުގެ މަސައްކަތް އަންނަ ފެބްރުއަރީ މަހުގެ ނިޔަލަށް ދިގުދަންމާލުމަށް ހުށަހެޅި ހުށަހެޅުން ކޮމިޓީން ވަނީ ފާސްކޮށްފަ އެވެ.
Ads by STO
