މުޅި ދުނިޔެ ބަންދުވެފައި އޮތް އިރުވެސް ރައްޔިތުން ކައިރީ ހިތި ބޭސް ބޯކަށް ނުބުނަން: ޝާހިދު
ވެރިކަމުގައި ތިބިއިރު ކުރިމަތި ކޮވިޑްގެ ވަބާގައި މުޅި ދުނިޔެ ބަންދުވެފައި އޮތް އިރުވެސް ރައްޔިތުންގެ ކައިރީ ހިތި ބޭސް ބޯން ނުބުނާކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ރޭ އާޓިފިޝަލް ބީޗްގައި އެމްޑީޕީއިން ބޭއްވި "ފުދިއްޖެ، ފުނޑިއްޖެ" ޖަލްސާގައި ވާހަކަދައްކަވަމުން ޝާހިދު ވިދާޅުވީ ދުނިޔެ ނުދެކޭ ފަދަ ބޮޑު އާލަމީ ވަބާއެއް ކަމަށްވާ ކޮވިޑް 19 އިން ސަލާމަތްވީއިރު، 2020 ވަނަ އަހަރުގެ ހިސާބު ކިތާބުން ފާހަގަވެގެންދާނީ ޖީޓީޕީގެ ތިންބައިކުޅަ އެއްބައި ގެއްލިގެން ގޮސްފައިވާ މަންޒަރު ކަމަށެވެ.
"އަޅުގަނޑުމެންގެ ފަތުރުވެރިކަމުގެ 67 އިންސައްތަ އުނިވެގެން ދިޔަ. ދައުލަތުގެ އާމްދަނީން 39 ބިލިއަން ގެއްލިގެން ދިޔަ. މި ދަންނަވަނީ ކުދި ކުދި އަދަދެއް ނޫނޭ. މި ދަންނަވަނީ މުޅި ދުނިޔެ ބަންދުވެފައި، ހަމައެކަނި ރާއްޖެއެއް ނޫނޭ، މުޅި ދުނިޔެ ބަންދުވެފައި އޮތް އިރުގެ ވާހަކަ"
ޝާހިދު ވިދާޅުވީ ކޮވިޑް 19 ގެ ބަލިމަޑުކަމުގައި ހޭދަ ކުރި ދުވަސްތަކަކީ އެއްވެސް ގޮތަކުން ތަނަކުން އެއްޗެހި ގެނެވެން ނުވަތަ ފުރައިގެން ގޮސް ހިފައިގެން އާދެވޭނެ ގޮތްތަކެއް އޮތް ޒަމާނެއް ނޫން ކަމަށެވެ.
"ފަރިއްކުޅުވާ މޭޒު މަތީގަައި އާފަލާއި ތަރުކާރީ ދުނިޔޭގައި އެ އެއްޗެހި ލިބެން އޮތް ގޮތަކަށް ގެނެސް އަޅުގަނޑުމެން ތިޔަބޭފުޅުންގެ މޭޒުކޮޅުމަތީގައި ބަހައްޓައި ނުދެމުތޯއޭ. ހުރިހާ ކަމެއް ދަތިވެފައި އޮތް އިރުގައިވެސް މުޅި ރާއްޖެ ދަތުރުފަތުރުގެ ނިޒާމަކުން ގުޅާލުމުގެ މަސައްކަތް ސަރުކާރުން ކޮށްނުދޭތޯއޭ"
ނަމަވެސް އެ ހާލަތުގައި އޮވެގެންވެސް އެއްވެސް ރައްޔިތަކަށް އާސަންދަ ނުލިބި ގޮސްފައި ނުވާނެ ކަމަށް ޝާހިދު ފާހަގަކުރެއްވި އެވެ. އަދި ބޭސް ފަރުވާއަށް ބޭނުންވެގެން ދުނިޔޭގެ ހުރިހާ ބޯޑަރުތައް ބަންދުކޮށްފައި އޮށްވާވެސް ބޭސްފަރުވާ އަށް ފުރައިގެން ދާން ޖެހުނު މީހުންނަށް ސަރުކާރުން އެކަން ފަހިކޮށްދީފައިވާނެ ކަމަށް ޝާހިދު ވިދާޅުވި އެވެ.
"ކުދި ވިޔަފާރިތަކަށް ލުއި ލޯނު ފަހިކޮށްނުދެއްވާތޯއޭ. ޓުއަރިސްޓް ރިސޯޓް ތަކުން ދައްކަންޖެހޭ ކުލި ފަސްކޮށް ނުދެއްވާތޯއޭ. ކާންބޯން ނުލިބިގެން ތިޔައިގެ ތެރެއިން އުޅުއްވަން ޖެހުނީ ކިތައް ބޭފުޅުންނަށްތޯއޭ. އެންމެ ބޭފުޅަކުވެސް ކާބޯތަކެއްޗަށް ދަތިވެގެން އުޅެއްވިންތޯއޭ."
ޝާހިދު ވިދާޅުވީ ރާއްޖޭގެ ބޯޑަރު ބަންދުވެ، އާމްދަނީ ސުމެއްގައި އޮށްވާވެސް މެދު ނުކެނޑި މި ހުރިހާކަމެއް ރައްޔިތުންނަށް ރައީސް އިބްރާހީމް މުހައްމަދު ސޯލިހުގެ ވެރިކަމުގައި މަގު ފަހިކޮށްދެއްވާފައިވާނެ ކަމަށެވެ.
ޝާހިދު ވިދާޅުވީ ރައީސް ސޯލިހުގެ ވެރިކަމުގައި ރައްޔިތުންނަށް އެރުވި ޔަގީންކަމަކީވެސް ދައުލަތުގެ މުހިންމު ކަން ކަމަށެވެ.
ދައުލަތުގެ ބޭނުމަކީ ސަރުކާރެއްގެ ބޭނުމަކަށް ވާންޖެހޭނީ ރައްޔިތުމީހާ ނިކަމަތިވެގެންދާ ދަނޑިވަޅު އެމީހާ ކޮއްޕާ ވައްޓާލުމެއް ނޫން ކަމަށް ޝާހިދު ވިދާޅުވި އެވެ. އަދި އެމީހާގެ އަތުގައި ހިފާ އެމީހާއަށް ހިމާޔަތް ދީ ރައްކާތެރިކަން ދީފައިވާނެ ކަމަށްވެސް ޝާހިދު ވިދާޅުވި އެވެ.
