ސްކޮލާޝިޕްގެ ގުރު ނެގުން މިރޭ
"ދާލަން:ނޭޝަނަލް ސްކިލްސް އެންޑް ކެރިއާ އެކްސްޕޯ 2024" ގައި ދޫކުރަން ނިންމާފައިވާ ސްކޮލާޝިޕްތަކަށް ގުރު ނެގުން މިރޭ އޮންނާނެ އެވެ.
ހަޔާ އެޑިއުކޭޝަން، ލޭބާ އެންޑް ސްކިލްސް ޑިވޮލޮޕްމެންޓް މިނިސްޓްރީން ބުނީ، ސްކޮލާޝިޕްތަކަށް ގުރުއަތުލުން ކުރިއަށްދާނީ މިރޭ 10 ޖަހާއިރު ކަމަށެވެ. އަދި ސްކޮލާޝިޕް ލިބޭ 5 ފަރާތެއް ނެގިގެންދާނެ ކަމަށް ބުނެފައިވެ އެވެ.
މިނިސްޓްރީން ބުނީ، ސްކޮލާޝިޕްގެ ފުރުސަތު ހުޅުވާލައިފައިވަނީ އެޑިޔުކޭޝަން މެލޭޝިޔާ ގްލޯބަލް ސާވިސެސްގެ އެއްބާރުލުމާއެކު ކަމަށާއި އެގޮތުން 5 ދާއިރާއަކުން ސްކޮލާޝިޕް ހާސިލުކުރުމުގެ ފުރުސަތު ލިބިގެންދާނެ ކަމަށެވެ.
އަދި އެ 5 ފަރާތަކަށް ކިޔެވުމުގެ ފުރުސަތު ލިބިގެންދަނާީ މެލޭޝިޔާގެ ޒިއަމެން ޔުނިވާސިޓީން ކަމަށްވެސް މިނިސްޓްރީން މީގެ ކުރިން ބުނެފައިވެ އެވެ.
5 ދާއިރާ:
- ބެޗްލާސް އިން ޖާނަލިޒަމް
- ބެޗްލާސް އިން އާޓިފިޝަލް އިންޓެލިޖެންސް
- ބެޗްލާސް އިން މެރިން ބަޔޯޓެކްނޮލޮޖީ
- ބެޗްލާސް އިން ޑިޖިޓަލް މީޑިޔާ ޓެކްނޮލޮޖީ
- ބެޗްލާސް އިން ސޮފްޓްވެއާ އިންޖީނިއަރިން
ސްކޮލާޝިފްގައި ކޯހުގެ ޓިއުޝަން ފީގެ 100 އިންސައްތަ ހިމެނިފައިވާއިރު، އެ ސްކޮލާޝިޕްއަށް ކުރިމަތިލުމުގެ ޝަރުތުތަކެއް ވަނީ ކަނޑައަޅާފަ އެވެ.
ލަކީ ޑްރޯއަށް ހުށަހަޅާ ފަރާތްތަކުގެ ޝަރުތުތައް:
- އެ މިނިސްޓްރީގައި މަސައްކަތްކުރާ މީހަކަށް ނުވުން
- ދިވެއްސަކަށްވުން
- ސްކޮލާޝިފަށް ހޮވޭ ތާރީހުން ފެށިގެން 1 އަހަރު ތެރޭގައި ޒިއަމެން ޔުނިވާސިޓީން ޕްލޭސްމަންޓް ހޯދައި ކިޔަވަން ފަށާ ތާރީހުން ފެށިގެން 3 އަހަރު ތެރޭގައި ކޯސް ފުރިހަމަކުރުން
- އެމްކިޔުއޭއިން ކަނޑައަޅާފައިވާ މިންގަނޑުތަކާއި އެއްގޮތަށް ކޯހުގައި ބައިވެރިވުމުގެ ފެންވަރު ހުރުން
- ލަކީ ޑްރޯގައި ބައިވެރިވާ ކޮންމެ ފަރާތަކަށް ވެސް ލިބޭނީ އެއް ސްކޮލާޝިޕް ހާސިލުކުރުމުގެ ފުރުސަތު
ކިޔަވާ ކޯސް، ދާއިރާ ނުވަތަ ގައުމު ބަދަލުކުރުން ފަދަ އެއްވެސް ބަދަލެއް އެ ސްކޮލަޝިޕްގެ ދަށުން ނުގެނެވޭނެ ކަމަށް މިނިސްޓްރީން މައުލޫތުދެ އެވެ.
