އާސަންދަ ނިޒާމު އޮތީ އެންމެ ރަނގަޅަށްތޯ ސުވާލުއުފައްދާނެ ސިޔާސީ ވެރިން މަދުވުމަކީ ހިތާމައެއް
އާސަންދަ ނިޒާމު އޮތީ އެންމެ ރަނގަޅަށްތޯ ސުވާލު އުފައްދާނެ ސިޔާސީ ވެރިން ނެތުމަކީ ހިތާމައެއް ކަމަށް ހެލްތް މިނިސްޓަރު އަބްދުﷲ ނާޒިމް އިބްރާހީމް މިއަދު ވިދާޅުވެއްޖެ އެވެ.
ހުޅުމާލޭ ހޮސްޕިޓަލް ޓާޝަރީ ފެންވަރަށް ބަދަލުކޮށް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރު ވިދާޅުވީ އާސަންދަ ނިޒާމު ބޭނުންކުރާތާ 15 އަހަރަށްވުރެ ގިނަ ދުވަސްވެފައިވާއިރުވެސް ކޮންމެ އަހަރެއްގެ ބަޖެޓު ދިރާސާކޮށް ބަލާއިރު ބަޖެޓުގައި ކަނޑައަޅާ އަދަދަށް ވުރެ ބޮޑު ހޭދައެއް އާސަންދައަށް ކުރަންޖެހޭ ކަމަށެވެ.
"ވޭތުވެދިޔަ މި ހުރިހާ އަހަރުގެ ބަޖެޓު އަޅުގަނޑުމެން ބަލާލާ ދިރާސާކޮށްލާއިރު އެެއްވެސް އަހަރެއްގައި އާސަންދަ ނިޒާމަށް ބަޖެޓުގައި ފާސްކުރެވުނު އަދަދުން އާސަންދަ ފޫބެއްދިފައެއް ނެތް"
ނާޒިމް ވިދާޅުވީ ބަޖެޓުން ކަނޑައަޅާ އަދަދުން މުހިންމު މެސެޖެއް ދޭއިރު، އެ ނިޒާމަށް ސަމާލުކަން ދޭންޖެހޭ ކަންތައްތަކެއް އެބަހުރި ކަމަށެވެ.
އާސަންދައިގެ ތަފާތު ހިސާބުތައް ހިއްސާކުރަމުން، މިނިސްޓަރު ވިދާޅުވީ ބަޖެޓުން ނުފުދުމަކީ ދައުލަތައް އޮތް ބުރައެއް ކަމަށެވެ.
އެކަމާމެދު ވިސްނާނެ ސިޔާސީ މީހުން މަދު ކަމަށް ނާޒިމް ވިދާޅުވި އެވެ.
"އެކަމަކު ގަޔަށް ދޫ ހައްޓަށް ލުއި ސިޔާސަތުތަކެއް ކުރީގައި ގެންގުޅެވިފައި ހުރުމުގެ ސަބަބުން ނޫނީ ސިޔާސީ ގޮތުން އަދާކުރަންޖެހިދާނެ އަގެއްގެ ބޮޑުކަމުން ސަބަބުން ފަސް އެނބުރި ބަލާލައި މި ނިޒާމު ގެންދެވެނީ ދިވެހި ރައްޔިތުންނަށް އެންމެ ލާބަޔާ މަންފާ އޮތް ގޮތުގައި ތޯ، އެ ސުވާލު އުފެއްދާނެ ސިޔާސީ ވެރިން މަދުވިކަން އެއީ ހިތާމަ ކުރަންޖެހޭ ކަމެއް"
ރައްޔިތުން ގަބޫލުކުރަންޖެހޭ ހަގީގަތަކީ ސިއްހީ ނިޒާމަކީ ހަމަ އެކަނި ބޭސްފަރުވާ ކޮށްދިނުން ނޫން ކަމަށް ވިދާޅުވި އެވެ.
އަދި އެއީ ހަމައެކަނި އިމާރާތް އެޅުން ނޫން ކަމަށްވެސް ވިދާޅުވި އެވެ. އެއާއެކު ވަށާ ޖެހޭ އެތައް ކަންތައްތަކެއް ހުރިކަމަށާއި، އެކަންކަން ރަނގަޅު ކުރެވެން އަންނަނީ ހުރިހާ ސިޔާސަތުތަކަށް ގެންނަންޖެހޭ ބަދަލުތައް ގެނެވިގެން ކަމަށް ނާޒިމް ފާހަގަކުރެއްވި އެވެ.
ނާޒިމް ވިދާޅުވި ގޮތުގައި ރައްޔިތުން އެދެނީ އެ މީހުންގެ ސިއްހީ ނިޒާމަކީ އެންމެ ފައިދާހުރި ގޮތުގައި އެ ހައްގުވެރި ފަރާތައް އެންމެ ރަނގަޅު ގޮތުގައި ލިބޭ ނިޒާމަކަށްވުން ކަމަށެވެ.
އެކަމަށްޓަކައި އަޅަންޖެހޭ ފިޔަވަޅުތައް މި ސަރުކާރުން އަޅަމުންދާނެ ކަމުގެ ޔަގީންކަން ނާޒިމް ދެއްވި އެވެ.
