ޖޫރިމަނާގެ ފައިސާ ނުދެއްކި މީހަކު ޖަލަށްލާން ހުކުމްކޮށްފި
ޖޫރިމަނާގެ ގޮތުގައި ދައްކަން ޖެހޭ ފައިސާ ނުދެއްކި މީހަކު ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.
އަންގާރަ ދުވަހު ކްރިމިނަލް ކޯޓުން އެ ހުކުމް ކޮށްފައިވަނީ މާލެ, މއ. އުއިވަށާގެ, ޔައީޝް އަހްމަދުގެ މައްޗަށެވެ.
2019 ވަނަ އަހަރު މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާ އުފުލާ, 2020 ވަނަ ޔައީޝްގެ މައްޗަށް ޖޫރިމަނާގެ ހުކުމެއް އިއްވި އެވެ. 21,600 ރުފިޔާއިން ޔައީޝް ޖޫރިމަނާކުރީ އެ ކުށުގައި އޭނާއަށް އަންނަ ޖަލު އަދަބު ޖޫރިމަނާގެ އަދަބަކަށް ބަދަލުކުރުމަށްފަހު އެވެ.
އެ ފައިސާ 4 ފެބްރުއަރީ 2020 ވަނަ ދުވަހުން ފެށިގެން ތިން މަސް ދުވަހުގެ ތެރޭގައި މީރާއަށް ދައްކަން ހުކުމްކޮށްފައިވީ ނަމަވެސް އެ ފައިސާ ދައްކާފައި ނުވާ ކަމަށް މީރާއިން ބުނެފައިވެ އެވެ. އެހެންކަމުން އެ އަދަބު ތަންފީޒުކޮށްފައިނުވާތީ 3 މަހާއި 18 ދުވަހުގެ ޖަލު އަދަބެއް ކަނޑައަޅާ އަދަބު މުރާޖާކުރަން ޕީޖީން އެދުނެވެ.
އެ މައްސަލައާ ގުޅިގެން ވާހަކަ ދެއްކުމުގެ ފުރުސަތު ޔައީޝްއަށް ދިން ނަމަވެސް އެއްވެސް ވާހަކައެއް ދައްކާފައިނުވާ ކަމަށް ކްރިމިނަލް ކޯޓުގެ އަދަބު މުރާޖާއިން އެނގެ އެވެ.
ޕީޖީން އެދުނު ގޮތަށް 3 މަހާއި 18 ދުވަހަށް ޖަލަށްލުމަށް ޔައީޝްގެ އަދަބު ކްރިމިނަލް ކޯޓުން މުރާޖާ ކުރި އެވެ.
ޖޫރިމަނާގެ ފައިސާ ނުދައްކައިގެން ޖަލަށްލާން ހުކުމްކުރި ޔައީޝް އަކީ އެހެން މައްސަލައެއްގައި ވެސް ހައްޔަރު ކޮށްފައިވާ މީހެކެވެ. އޭނާ ހައްޔަރު ކޮށްފައިވަނީ ޑިޒައިނެއް ހަދަން ކަމަށް ބުނެ ކޮޓަރީގައި ރޯކޮށްލި މައްސަލައެއްގަ އެވެ.
