މިއީ އުއްމީދެއް ނެތް ސަރުކާރެއް، ރައްޔިތުން ތިބީ ބިރެއްގެ ތެރޭ: ސޯލިހު
މިހާރު ފެންނަނީ އުންމީދެއް ނެތް، މާޔޫސްކަމެއްގައި ތެރެއަށް ރައްޔިތުން ވައްޓާލާ މަންޒަރު ކަމަށް ވިދާޅުވެ ކުރީގެ ރައީސް އިބްރާހީމް މުހައްމަދު ސޯލިހު މި ސަރުކާރަށް ވަރަށް ބޮޑަށް ފާޑު ވިދާޅުވެއްޖެ އެވެ.
ރާއްޖެ ޓީވީގެ "ފަށާއިރު" ޕްރޮގްރާމްގައި ސޯލިހު ސިފަކުރެއްވީ ރައީސް ޑރ. މުހައްމަދު މުއިއްޒުގެ ސަރުކާރަކީ އަމާޒެއް ނެތް ސަރުކާރެއް ގޮތުގަ އެވެ. އަދި ސަރުކާރުން ރައްޔިތުން ބިރުވެރިކަމުގެ ތެރެއަށް ވައްޓާލާފައިވާ ކަމަށް މިދިޔަ 5 އަހަރު ވެރިކަން ކުރެއްވި ސޯލިހު ވިދާޅުވި އެވެ.
އެއަށް ފަހު ސޯލިހު ވަނީ އެމަނިކުފާނަށް ފާހަގަވި "ގޯސް" ކަންކަން ހިއްސާކުރައްވާފަ އެވެ. ވިދާޅުވީ ރައީސް މުއިއްޒު ވެރިކަމާ ހަވާލުވެވަޑައިގެންނެވުމާ އެކު ބާރުތައް ޖަމާކުރައްވަން ފެށީ ކަމަށެވެ.
މިސާލެއްގެ ގޮތުގައި ސޯލިހު ނެންގެވި މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވައިލުމަށްފަހު ރައީސުލްޖުމްހޫރިއްޔާގެ ފުރިހަމަ ކޮންޓްރޯލް އޮންނަ ކޮމިޝަނެއް އުފެއްދުމަށް ގާނޫނު އިސްލާހު ކުރުމަށް ރައްޔިތުންގެ މަޖިލީހުގެ ތުޅާދޫ ދާއިރާގެ އަމިއްލަ މެންބަރު އަބްދުﷲ ހަންނާން މަޖިލީހަށް ހުށަހަޅާފައިވާ ބިލަށެވެ.
އެއީ އަމިއްލަ މެންބަރަކު ހުށަހެޅި ބިލަކަށްވިޔަސް އެކަން ކޮށްފައިވަނީ ސަރުކާރު އަޑީގައި އޮވެގެން ކަމަށް ސޯލިހު ނިސްބަތްވެވަޑައިގެންނަވާ އިދިކޮޅު އެމްޑީޕީން ތުހުމަތުކުރެ އެވެ. އެ ބިލަށް ފާޑު ކިޔަމުން ސޯލިހު ވިދާޅުވީ ބިލުގެ ބޭނުމަކީ ސަރުކާރުގެ ބާރުގެ ދަށަށް ނޫސްވެރިން ގެންދިޔުން ކަމަށެވެ.
"ބިލުގައި މިއޮތީ އުފައްދަވާ ނޫސްވެރިކަމާ ބެހޭ ކޮމިޓީގެ ދަށުން މެޖޯރިޓީ ރައީސް އައްޔަންކުރައްވާ ބޭފުޅުން، ހަތް ބޭފުޅުންގެ ތެރެއިން ހަތަރު ބޭފުޅުން އެއީ ރައީސް އައްޔަންކުރައްވާ ބޭފުޅުންގެ ގޮތުގައި ތިބެގެން މުޅި މީޑިއާ ކޮންޓްރޯލްކުރުމުގެ މަސައްކަތް ފަށާފަ"
ސޯލިހު ވިދާޅުވީ އެއީ ޑިމޮކްރެސީގައި އެޅޭނެ އެންމެ ނުރައްކާތެރި ފިޔަވަޅު ކަމަށެވެ. އަދި މިއީ ރާއްޖޭގެ ތާރީހުގައި އެންމެ ހާލުގައި ޖެހިފައި އޮތް ދުވަސްވަރުކަންވެސް ސޯލިހު ވަނީ ފާހަގަކުރައްވާފަ އެވެ.
މަސްވެރިންނަށް މި ސަރުކާރުން ވެފައިވާ ވައުދު ނުފުއްދޭ ކަމަށް ބުނެ ސޯލިހު ވަނީ އެކަމަށްވެސް ފާޑުކިޔާފަ އެވެ.
"ވީ ވައުދު އެ އޮތީ 20 ރުފިޔާ އަށް ވުރެ ބޮޑު އަދަދުގައި މަސް ގަންނާނަމޭ އަދި 48 ގަޑިއިރު ތެރޭގައި އޭގެ އަގު މަސްވެރިންނަށް ލިބޭނެ ކަމާއި، އަދި އެ ޑޮލަރުން މަސްވެރިންނަށް ލިބޭނެ ކަމަށް އޮތް ވައުދު ނުފުދި އެއަށްވުރެ 16 ރުފިޔާއަށް މަސްގަނެފަ އެ ލާރި ނުދެވި އެދަނީ ދެ ހަފްތާ ތިން ހަފްތާ ވެގެން ދާއިރު"
ޓޫރިޒަމް ސެކްޓާ އަދި ޓެކްސީ ޑްރައިވަރުންގެ ހާލަތައް ރިއާޔަތްކޮށް ވާހަކަ ދައްކަވަމުން ސޯލިހު ވިދާޅުވީ އެންމެ ނިކަމެތި މީހާވެސް މިހާރު ސިއްހީ ފަރުވާއަށް ސަލާން ޖަހަން ޖެހިފައިވާ ކަމަށެވެ. އެމަނިކުފާނު ވިދާޅުވި ގޮތުގައި މުޅި ސަރުކާރުގެ ސިޔާސަތުގެ އަމާޒު ހުރިގޮތުން ފެންނަނީ ނާއުންމީދީ މަންޒަރު ކަމަށެވެ. ވެރިކަމަށް ވަޑައިގަތުމަށް ރައީސް މުއިއްޒު ވެވަޑައިގެންނެވި ވައުދާ ހިލާފުވެވަޑައިގެންފައިވާ ކަމަށާއި، ސަރުކާރުން ދަނީ ކެނޑިނޭޅީ ދޮގު ހަދައި އޮޅުވާލަމުން ކަމަށް ވިދާޅުވި އެވެ.
ސޯލިހު ވިދާޅުވީ ފުރަތަމަ ދުވަހުވެސް ސިފަވެގެންދިޔައީ މި ސަރުކާރު ވިރާސީ ރަސްކަމަކަށް މިސްރާބު ޖަހާފައިވާ މަންޒަރު ކަމަށެވެ. ހުދުމުހުތާރު ސިފަތައް ސަރުކާރުން ފާޅުވަމުންދާ ކަމަށްވެސް ވިދާޅުވި އެވެ.
"ރައީސްއެއްގެ މުއުމެންޑް ހަމަ ބަރާބަރަށް ދެއްވާ ފަރާތްތަކަށް ދެމުން ގެންދާނެ، އަޅުގަނޑު ގެއިން ނިކުތްކަމާ މިއަދު ގަޑިއެއްގައި އެތަނަކަށް ދެވޭނެ ކަމާއި މި ހުރިހާ އެއްޗެއް އެތާ ތިއްބެވި ބޭފުޅުންނަށް އިނގި ވަޑައިގަންނަވާނެ. އެހެން ނަމަވެސް އެތަނަށް ގޮސް އަޅުގަނޑު ފޭބި ތަނުން ރިސީވްކޮށްލާނެ މީހަކުވެސް ނުދުރުވޭ"
އެކަންކަން އެހެން ހުރުމުން ދޭހަވަނީ ޑިމޮކްރެސީ ވެރިކަން ކަޝިޔާރުވެފައިވާ މަންޒަރު ކަމަށް ވިދާޅުވި އެވެ.
