އެއްވެސް ސަރުކާރަކަށް އަހަރު ދުވަހުން ވައުދެއް ނުފުއްދޭނެ، ވަގުތު ނަގާނެ: އަބްދުއްރަހީމް
އެއްވެސް ސަރުކާރަކަށް ވެރިކަމާ ހަވާލުވެ ފުރަތަމަ އަހަރު ދުވަހުގެ ތެރޭގައި ވެރިކަމަށް އަންނަންވި ހުރިހާ ވައުދުތަކެއް ފުއްދިފައިވާ ނުވާ ކަމަށާއި ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅުގެ ތެރެއިން ބައެއް ކަންކަން މިހާތަނަށް އައިއިރު ކުރައްވާފައިވާ ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ސަރުކާރަށް 1 އަހަރު ފުރުމާ ގުޅިގެން ދައުލަތުގެ މީޑިއާއިން ކުރިއަށް ގެންދާ ހާއްސަ ލައިވް ކަވަރޭޖް "52 ހަފުތާ - ސަރުކާރާއެކު ކުރިޔަށް" އަށް ދެއްވި ހާއްސަ ބަސްދީގަތުމެއްގައި އަބްދުއްރަހީމް ވިދާޅުވީ ރައީސް ވަރަށް ގިނަ ކަންކަމަށް ވައުދުވެވަޑައިގެންނެވި ކަމަށެވެ. އެގޮތުން ވެވަޑައިގެންނެވި ވައުދުފުޅުތައް ފުއްދުމަށް އެމަނިކުފާނު މަސައްކަތްޕުޅު ކުރައްވާ ކަމަށެވެ.
ރައީސް ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ފޮތެއްގެ ސިފައިގައި ލިޔެ، ޗާޕުކުރައްވައި ހުވާ ކުރެއްވުމުގެ ކުރިން ވަނީ ނެރުއްވާފަ އެވެ.
ރާއްޖޭގެ 160 އަށް ވުރެ ގިނަ ރަށުގެ ކައުންސިލް އިދާރާތަކަށް ފޮތުގެ ޗާޕުތައް ހަދިޔާކުރައްވާފައިވާކަން އަބްދުއްރަހީމް ފާހަގަކުރެއްވި އެވެ.
"އެއްވެސް ސަރުކާރަކަށް ވެރިކަމަށް އައިސް އެއް އަހަރު ދުވަހުގެ ތެރޭގައި ވެރިކަމަށް ވަޑައިގަންނަވަން ވެގެން އެވާ ހުރިހާ ވައުދެއް ނުއެއް ފުއްދޭނެ. އެކަމަށް ވަގުތު ނަގާނެ،" އަބްދުއްރަހީމް ވިދާޅުވި އެވެ.
ވެރިކަންކުރާ ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) ގެ ޗެއާޕާސަން ވިދާޅުވި ގޮތުގައި ރައީސް ގެންދަވަނީ ފަހަރަކު ކަމެއް ކުރައްވަމުން ކަމުގަ އެވެ.
ވެވަޑައިގެންނެވި އެންމެ ބޮޑު ވައުދަކީ ރާއްޖޭގައި ގާއިމުވެގެން ތިބި އިންޑިއާގެ ސިފައިން އަނބުރާ އެ ގައުމަށް ފޮނުވާލުން ކަމަށާއި އެކަން ކުރައްވާފައިވާ ކަމުގަ އެވެ. އެގޮތުން އެކަން ކުރެއްވީ ޑިޕްލޮމެސީގެ ރީތި އުސޫލުން ކަމުގަ އެވެ.
ބޭރުގެ އަސްކަރީއަކުން ރާއްޖޭގައި ގާއިމުވެތިބިޔަ ނުދޭނެ ކަަމަށް ވިދާޅުވި ވިދާޅުވުމަކީ ވެރިކަމަށް ރައީސް އިންތިހާބު ކުރުމުގައި ރައްޔިތުން އެންމެ ބޮޑަށް ބެލި އެއް ކަންތައް ކަމުގައި އަބްދުއްރަހީމް ފާހަގަކުރެއްވި އެވެ.
"ހަމަ އެއާ އެކީގައި ރާއްޖޭގެ މިނިވަންކަމާއި އިސްތިގުލާލު ބުރޫއަރާނެ އެއްވެސް ކަމެއް ނުކުރައްވާނެ ކަމަށް ވިދާޅުވި. އެގޮތުގައި މިއަދާ ހަމައަށް ހިފަހައްޓައިފި. މިހިރީ ކާމިޔާބީތައް،" އަބްދުއްރަހީމް ވިދާޅުވި އެވެ.
މިދިޔަ 1 އަހަރު ދުވަހު ސަރުކާރުން ހޯދި ކާމިޔާބީތަކުގައި ބައެއް ބޭފުޅުންނަށް އަތްނުލެވި ހިނގައިދާނެ ކަމަށް ވިދާޅުވި އެވެ. ކޮންމެ ކާމިޔާބީއަކީ އަތްލެވޭ އެއްޗެއް ނޫން ކަމަށާއި އަނެއް ބައި ކާމިޔާބީތަކަކީ ލޮލަށް ވެސް ފެންނަ އެއްޗެއް ނޫން ކަމަށެވެ.
އަބްދުއްރަހީމް ވިދާޅުވީ ރައީސް ވެރިކަމަށް ވަޑައިގަތުމަށް ވެވަޑައިގެންނެވި ވައުދުފުޅުތަކުގެ ތެރެއިން އެންމެ މުހިންމު އެއް ވައުދުފުޅަކީ އެމަނިކުފާނަށް ވެރިކަން ލިބިވަޑައިގަންނަވާ ހިސާބުން ފެށިގެން ރާއްޖޭގައި ފައިސާ ޗާޕުކުރުން ނިމުމަކަށް ގެންނަވާނެ ކަމަށް ވެވަޑައިގެންނެވި ވައުދުފުޅު ކަމަށެވެ. އެކަމަކީ އަތްނުލެވޭ އަދި ލޮލަށް ނުފެންނަ ކާމިޔާބީއެއް ކަމަށާއި އެކަން މިހާރު ނިމިފައިވާ ކަމަށެވެ.
އެހެންނަމަވެސް އެކަމަކީ އިގުތިސޯދީ ވިސްނުމަކުން ވިސްނާއިރު ވަރަށް ބޮޑު ކާމިޔާބީއެއް ކަމުގައި އަބްދުއްރަހީމް ފާހަގަކުރެއްވި އެވެ.
ރައީސް މުއިއްޒު ވެރިކަމާ ހަވާލުވެވަޑައިގެންނެވިއިރު، ގައުމު އޮތް ގޮތް ހެޔޮ ވިސްނޭ ކޮންމެ މީހަކަށް ވެސް އެނގޭނެ ކަމަށެވެ. ޕާޓީގައި ހިމެނިވަޑައިގަންނަވާ ބޭފުޅުންގެ ތެރެއިން ބައެއް ބޭފުޅުންނަށް ވެސް ގަބޫލު ކުރެއްވިފައި އޮތީ ފައިސާ ޗާޕުކޮށްގެން ނޫނިއްޔާ ކުރިއަށް ނުދެވޭނެ ކަމުގައި ކަަމަށް އަބްދުއްރަހީމް ވިދާޅުވި އެވެ.
"އެެހެންނަމަވެސް އެމަނިކުފާނު ވެވަޑައިގެންނެވި ވައުދުގެ މަތީގައި ދެމިހުންނަވާ ވޭތުވެދިޔަ އެއް އަހަރު ދުވަހުގެ ތެރޭގައި ފައިސާ ޗާޕުނުކުރައްވާ ދައުލަތަށް ލިބުނު އާމްދަނީއަކުން މެނޭޖްކުރައްވައިގެން މިއަދާ ހަމައަށް ވަޑައިގަތް ވަޑައިގަތުމަކީ، އެއީ ވަރަށް ބޮޑު ކާމިޔާބީއެއްގެ ގޮތުގައި އަޅުގަނޑު ސިފަ ކުރަނީ،" އަބްދުއްރަހީމް ވިދާޅުވި އެވެ.
Ads by STO
