ވެރިކަމާ ހަވާލުވުމުގެ ކުރިން އައިއެމްއެފުން އޮތީ ގައުމު ބަނގުރޫޓުވެދާނެ ކަމުގެ އިންޒާރުދީފައި: ރައީސް
ވެރިކަމާ ހަވާލުވުމުގެ 6 ދުވަސް ކުރިން އިންޓަނޭޝަނަލް މަނިޓަރީ ފަންޑު (އައިއެމްއެފް) އިން އޮތީ ރާއްޖެ ބަނގުރޫޓުވެދާނެ ހާލަތަކަށް ގޮސްދާނެކަމުގެ އިންޒާރުދީފައި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
"ރައްޔިތުންނާ އެކު ކުރިއަށް - ހަފުތާ 52" ފާހަގަކުރުމަށް ސޯޝަލް ސެންޓަރުގައި މިރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ ސަރުކާރާ ހަވާލުވުމުގެ 6 ދުވަސް ކުރިން އައިއެމްއެފުން ރިޕޯޓެއް ނެރުނު ކަމަށެވެ. އެ ރިޕޯޓުގައި ގައުމު އޮތް ހާލަތު ބުނެދީފައިވާ ކަމަށެވެ. ގައުމު އޮތީ 120 ބިލިއަން ރުފިޔާއަށް ވުރެ ބޮޑު ދަރަންޏެއް ދައްކަން ޖެހިފައިވާ ހާލަތުގައި ކަމަށެވެ.
"ގައުމު ބަނގުރޫޓުކޮށްލަން ރާވާފައި. އިގުތިސޯދު މެނޭޖުނުކޮށް، ކުރަން ނޭގި 5 އަހަރު ދުވަހުގެ ތެރޭގައި އަދި އެ އަހަރުގެ ސަޕްލިމެންޓަރީ ބަޖެޓު ވެސް އޭރު އޮތް ބަޖެޓު ހުސްކޮށް، އިތުރަށް ހަރަދުކޮށްފައި ގާނޫނު އަސާސީ އާ ހިލާފަށް ރައްޔިތުންގެ މަޖިލިހުގެ ހުއްދަ ނުހޯދާ ބަޖެޓު ފާސްނުކޮށް ހަރަދުކޮށްފައި ލީގަލައިޒްކުރަން ވެގެން ވެއްދީ ޑޮކިއުމެންޓެއް،" ރައީސް ވިދާޅުވި އެވެ.
އެމްޑީޕީގެ ވެރިކަމުގައި 8.4 ބިލިއަން ރުފިޔާ ޗާޕުކުރިކަން އެމަނިކުފާނު ފާހަގަކުރެއްވި އެވެ. ވިދާޅުވީ މި އަހަރުގެ އެޕްރީލު މަހާ ހިސާބުން ރާއްޖޭން ސޮވެރިން ޑިފޯލްޓެއް އިއުލާނު ކުރަން ޖެހިދާނެ ކަމަށް އޭރު މާލީ އިދާރާތަކުން ލަފާކުރި ކަމަށެވެ. އިދާރާތަކުން އެހެން ބުނަމުން ދިޔައީ 5 އަހަރު ދުވަހުގެ ތެރޭގައި 50.9 ބިލިއަން ރުފިޔާގެ އިތުުރަށް 22.7 ބިލިއަން ރުފިޔާ ހަރަދުކޮށްފައިވާ ކަމަށެވެ. އަށް ބިލިއަން ރުފިޔާ ޗާޕުކުރިއިރު، ދަރަނީގެ އިންޓްރެސްޓް އަހަރަކު 1.4 ބިލިއަން ރުފިޔާއަށް އަރުވަމުން ދިޔަ ކަމަށް ރަައީސް ވިދާޅުވި އެވެ.
އިތުރަށް ވިދާޅުވި ގޮތުގައި އެ ހާލަތާ އެކު ދައުލަތަށް ލިބޭ ކޮންމެ 100 ރުފިޔާއަކުން 24 ރުފިޔާ ހޭދަކުރަން ޖެހެނީ ލޯނު އަނބުރާ ދެއްކުމަށް ކަމުގަ އެވެ. އޭގެތެރެއިން 16 ރުފިޔާ ހަރަދުކުރަން ޖެހެނީ ދަރަނީގެ އިންޓްރެސްޓްގެ ގޮތުގައި ކަމުގަ އެވެ.
"މި ހާލަތު މިހެން އޮތަސް އަޅުގަނޑުމެން ފައިސާ ޗާޕުނުކޮށް، ދައްކަން ޖެހޭ ދަރަނި ދެއްކުމުގައި އަޅުގަނޑުމެންގެ ސިޔާސަތުތައް ބައްޓަންކޮށް، އަޅުގަނޑުމެން މިއަދާ ހަމައަށް މި އައީ ބަނގުރޫޓުނުވެ،" ރައީސް ވިދާޅުވި އެވެ.
ސަރުކާރުގެ 52 ހަފުތާގައި އެންމެން ގުޅިގެން ކުރެވުނު އެންމެ ބޮޑު މަސައްކަތަކީ މި ހާލަތުން އަރައިގަތުން ކަމުގައި އެމަނިކުފާނުގެ ވާހަކަފުޅުގައި ފާހަަގަކުރެއްވި އެވެ.
