މިދިޔަ މަހު ޒަކާތު ފަންޑުން ބޭސްފަރުވާއަށް 5 ލައްކަ ހޭދަކުރި
މިދިޔަ އޮކްޓޯބަރު މަހު ޒަކާތު ފަންޑުން ފަގީރުންނާއި މިސްކީނުންނަށް ބޭސްފަރުވާގެ އެހީގެ ގޮތުގައި 5 ލައްކައަށް ވުރެ ގިނަ ރުފިޔާ ހޭދަކޮށްފި އެވެ.
ދިވެހިރާއްޖޭގެ ޒަކާތު ހައުސްއިން އާންމުކުރި ތަފާސް ހިސާބު ރިޕޯޓުން ދައްކާ ގޮތުގައި މިދިޔަ މަހު ފަގީރުންނާއި މިސްކީނުންނަށް ބޭސްފަރުވާގެ އެހީގެ ގޮތުގައި ޖުމްލަ 529،702 ރުފިޔާ ވަނީ ހަރަދުކޮށްފަ އެވެ.
މި ފައިސާ މައިގަނޑު ގޮތެއްގައި ހޭދަކުރީ ކެންސަރު ބައްޔަށް ފަރުވާ ކުރުމަށާއި ހިތުގެ އޮޕަރޭޝަންތައް ކުރުމަށާއި ކިޑްނީ ބަލިތަކަށާއި ސިކުނޑީގެ އޮޕަރޭޝަންތަކުގެ އިތުރުން ޓްރާންސްޕްލާންޓްތައް ހެދުމަށެވެ.
އެހީގެ ގޮތުގައި ދީފައިވާ މިންވަރު:
- ކެންސަރަށް ފަރުވާކުރުމަށް: 348،037.50 ރުފިޔާ
- ހިތުގެ އޮޕަރޭޝަނަށް: 33،924.00 ރުފިޔާ
- ޓްރާންސްޕްލާންޓަށް: 25،443.00 ރުފިޔާ
- ކިޑްނީ ބަލިތަކަށް: 80،569.50 ރުފިޔާ
- ސިކުނޑީގެ އޮޕަރޭޝަނަށް: 33،924.00 ރުފިޔާ
- އެހެނިހެން ބަލިތަކަށް: 470،696 ރުފިޔާ
ތަފާސް ހިސާބުތަކުން ދައްކާ ގޮތުގައި ޒަކާތު ފަންޑުން އެހީ ދޫކޮށްފައި ވަނީ 124 މީހުންނަށެވެ. ޒަކާތު ހައުސްއިން ބުނީ މި މީހުންގެ ތެރޭގައި އެކި ސަބަބުތަކާ ހުރެ ސެޕްޓެމްބަރު މަހު އެހީ ހަމަޖެހިފައިވާ މީހުން ވެސް ހިމެނޭ ކަމަށެވެ.
މި މަހު އެހީގެ ގޮތުގައި ދިނުމަށް ނިންމާފައި ވަނީ ޖުމްލަ 992،594 ރުފިޔާ އެވެ.
ޒަކާތު ފަންޑުން ކުރި އެހެނިހެން ހަރަދުތަކުގެ ތެރޭގައި ޒަކާތުގެ މަސައްކަތް ކުރުމަށް ޒަކާތު ފަންޑުން މުސާރަދޭ ގޮތަށް ނަގާފައިވާ މުވައްޒަފުންގެ އުޖޫރަ ދިނުމަށް އާމިލުންގެ ބައިން ކޮށްފައިވާ ހަރަދު ހިމެނެ އެވެ. އެގޮތުން އިދާރީ މުވައްޒަފުންގެ އުޖޫރައިގެ ގޮތުގައި 252،722.24 ރުފިޔާ ވަނީ ހޭދަކޮށްފަ އެވެ. އަދި ރާއްޖޭން ބޭރަށް ކުރި ދަތުރުތަކަށް 92،363 ރުފިޔާ ހޭދަކޮށްފައިވާ ކަމަށް ވެސް އެ ހިސާބުތަކުން ދައްކަ އެވެ.
ޒަކާތު ހައުސް މެދުވެރިކޮށް ޔަތީމު ކުދިންނަށް މާލީ އެހީ ލިބޭނެ ނިޒާމެއް ހަމަޖެއްސުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓްރީން މިދިޔަ އޭޕްރިލް މަހު ހާމަކޮށްފައިވެ އެވެ.
ދިވެހިރާއްޖޭގެ ޒަކާތު ހައުސްއިން ދެމުންދާ ހިދުމަތްތަކަށް ފަސޭހަކުރުމުގެ ގޮތުން "ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ" ގެ ހިދުމަތަށް 'ވަންގަވް' މެދުވެރިކޮށް އެދެވޭނެ އިންތިޒާމް މި މަހުގެ 4 ވަނަ ދުވަހު ވަނީ ހަމަޖައްސާފަ އެވެ.
އިސްލާމިކް މިނިސްޓްރީން ދަނީ ޒަކާތު ހައުސް ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން މޯލްޑިވްސް ޒަކާތު ހައުސްގެ ބިލްޑިން އެޅުމަށް ހުޅުމާލެއިން ބިމެއް ހަމަޖައްސައި، އަންނަ އަހަރު އެ ހައުސްއަށް ހާއްސަ އިމާރާތް އެޅުމުގެ މަސައްކަތް ކުރިއަށް ގެންދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ވިދާޅުވެފަ އެވެ.
ދިވެހިރާއްޖޭގެ ޒަކާތު ހައުސްގެ ނަމުގައި އިދާރާއެއް ރައީސް ޑރ. މުހައްމަދު މުއިއްޒު އުފައްދަވާފައި ވަނީ މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހު އެވެ. އިސްލާމިކް މިނިސްޓްރީގެ ދަށުން ހިނގަމުންދާ ތަނެއްގެ ގޮތުގައި ހަމަޖައްސައި އުފެއްދި އިދާރާގެ ބޭނުމަކީ ރާއްޖޭގެ ޒަކާތުގެ ނިޒާމު ހަރުދަނާ ކުރުމުގެ މަސައްކަތާއި ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެ ގޮތަށް ޒަކާތު ފަންޑު ތަރައްގީ ކުރުމުގެ މަސައްކަތް ކުރުމެވެ.
