ކުޑައިރު ކުޅެން ގެންގުޅުނު ޑޯލްސްގެ ސަބަބުން ފެހުމުގެ ތެރެއަށް
ރާއްޖޭގައި ކޮންމެ މުނަސާބަތެއް ފުރިހަމަ ވަނީ ޒީނަތްތެރިވުމަށްޓަކައި އެތަނަށް ދާ މީހުން ލާ ޗާލު ތަފާތު ހެދުންތަކުންނެވެ. ހާއްސަކޮށް މީހުންގެ ލޮލުގައި ކުޑަކުދިން ލާ ހެދުންތައް އަޅައިގަންނަލެއް އަވަހެވެ. މިފަހަރު ކިޔައިދޭން މި އުޅެނީ ކުޑައިރު ޑޯލްސްއަށް ހެދުން ތައްޔާރުކޮށްގެން ކުޅުނު ދުވަސްތަކުގެ ހުވަފެނުގައި ކުލަޖައްސައި އެކަން ހަގީގަތަކަށް ހެދި ކުއްޖެއްގެ ވާހަކަ އެވެ.
ދައްކަން މިއުޅެނީ "ސްޓިޗް މޯލްޑިވްސް" އިން ތައްޔާރުކުރާ ތަފާތު ހެދުންތަކުގެ ފުރަގަހުގައި މަސައްކަތްކުރާ ނައިމާ އަބްދުލް ރަހްމާން (ނައީ)/ 30އ ގެ ވާހަކަ އެވެ.
ހދ. ކުޅުދުއްފުއްޓަށް އުފަން ނައީ ކުޑައިރު ރަށުގައި ކިޔަވާ އުޅުނުއިރު މަންމަމެން ގަނެދީފައި ހުންނަ ޑޯލްސް ކުޅެން އުޅޭއިރު އަބަދުވެސް އެ އެއްޗެހީގައި ހެދުން ލައްވާ ތަފާތު ގޮތްގޮތަށް ތައްޔާރުކުރުމަކީ އެންމެ ކުރާހިތުން ކުރާ އެއް މަސައްކަތެވެ. ހުސްވަގުތު ހޭދަކުރަނީވެސް އެ މަސައްކަތް ކުރުމުގަ އެވެ.
އުމުރުން 6 އަހަރުގައި ސުކޫލަށް ނުދާތީވެގެން ފޫހިވެގެން ކުރާނެ ކަމެއް ނޯންނާތީ ޑޯލްސްތަކަށް ހެދުން ފަހަން ފެށީ އެވެ. އޭރު ހެދުން ތައްޔާރު ކުރަނީ އަތު ތިނޯހުންނެވެ. އޭރުވެސް ކާޓޫނު ތަކުން ފެންނަ ފެއަރީތަކުގައި ހުންނަ ފިޔަގަނޑު ލައިގެން ހެދުން ފަހާ ހިތުން އޭނާ ދިޔައީ ބޭބެ ގެންގުޅޭ އެއްޗެހި ނަގައިގެން ފިޔަގަނޑު ހަދަމުން ޑޯލްސްއަށް ހެދުން ތައްޔާރު ކުރަމުންނެވެ.
ސްޓިޗް މޯލްޑިވްސް ހިންގާ ނައީ
މާމަ ބުނި ބަހާ އެއްގޮތައް ފެހުމުގެ ދާއިރާއިން ކުރިއަށް ދިއުމުގެ ކުލަ ޖެހުނީ ބަނޑުބޮޑުވެގެން ގޭގައި އިނދެގެން ކުރާނެ މަސައްކަތަކަށް ފަހަން ފެށުމެވެ. އެއީ 2018 ވަނަ އަހަރުގެ ފަހުކޮޅުގައި ވިޔަފާރި ފެށިގެން އައި ގޮތެވެ.
ފިރިމީހާގެ އެހީއާއެކު ވިޔާފާރި ފެށީ މިހާ ބޮޑަށް ވިޔަފާރި ކުރިއަރައި ގިނަ ކަސްޓަމަރުންތަކެއް ލިބޭނެ ކަމުގެ އުންމީދަކު ނޫން ކަމަށް ނައީ ބުންޏެވެ. ނަމަވެސް ލިބުނު ކަސްޓަމަރުންގެ އިތުބާރު ހޯދައި އެމީހުންގެ ހާއްސަ ދުވަސް ދުވަހުގެ ހެދުން ތައްޔާރު ކުރުމުގެ ޑިޒައިނަރަކަށް ނައީ ވެގެން ދިޔަ އެވެ.
ކުޑަކުދިންގެ ހެދުމަށް ބޮޑަށް ޝައުގުވެރިކަން އުފެދުނީ ޑޯލްސްއާ އެންމެ ގާތްކުރަނީ އެކަމަށްވާތީ
ދިވެހިރާއްޖޭގައި މީހުން ތައްޔާރު ނުކުރާ ކަހަލަ ހެދުން ތައްޔާރު ކުރުމަށް ނައީގެ ޝައުގުވެރިކަން އުފެދިފައި ވެއެވެ. އޭގެތެރެއިންވެސް ބޮޑަށް ކުޑަކުދިންގެ ހެދުމަށް ޝައުގުވެރިކަން އުފެދުނީ ކުޑައިރު ޑޯލްސް ތައްޔާރުކުރުމުގައި އުޅުމުގެ ތެރެއިން ނެވެ.
"ވަރަށް އިންޓްރެސްޓުވޭ މިހާރުވެސް ބޮޑެތި މީހުންނަށްވެސް ކުޑަކުދިންނަށް ފަހާހެން، އެގޮތަށް ހެދުން ފަހަން. ބޭރުގެ ބޮޑެތި ބްރޭންޑްތަކުންވެސް މި ބޭނުންކުރަނީއެއްނުން ކްރިސްޓަލްއާ މިރާ ބޭނުންކޮށްގެން ހެދުން ފަހާފަ، އެގޮތަށް.
ބޮޑެތި މީހުންގެ ހެދުން ފެހުމުގެ ތެރެއިން އެންމެ ފާހަގަކޮށްލެވޭ ހެދުމަކީ އެންމެ ފުރަތަމަ ފެހި ވެޑިން ހެދުން ކަމަށް ނައީ ފާހަގަކުރެ އެވެ. އެ ހެދުން ނިންމަން ނެގީ އެންމެ ދުވަހެއް ކަމަށްވެސް ނައީ ފަހުރުވެރިކަމާއެކު ފާހަގަކުރެ އެވެ.
އެހެން ޕޭޖްތަކާ ހިލާފަށް އިންސްޓެންޓް ޕާޗެސްއަށް ހެދުން ހުންނަނީ ހުންނަ ޝައުގެއްގެ ބޮޑުކަމުން
ހެދުން ފަހާ މީހުން ނުވަތަ ޕޭޖް ތަކުން ހެދުން ފެހުމަށްފަހު ވަގުތުން ގަނެވޭހެން ހުންނަނީ ވަރަށް މަދުންނެވެ. އެއީ ސައިޒުތަކަށް ހެދުން ބައްޓަން ކުރުމަކީ ވަރަށް އުދަނގޫ މަސައްކަތަކަށް ވާތީ އެވެ. ނަމަވެސް އެ ވިސްނުމާ ނައީ ގެ ވިސްނުމާ މުޅިން ހިލާފެވެ. އަމިއްލަ ހެދުން ފަހަން ގަންނަ ފޮއްޗެއް ނުވަތަ ފިހާރައަކުން ރީތި ފޮއްޗެއް ފެންނައިރަށް ގަނެލައިގެން އޭގެން ރީތި ކުޑަކުދިންގެ ހެދުމެއް ތައްޔާރު ކޮށްލުމަކީ ނައީގެ ހޮބީ އެކެވެ. ނައީ ފެހުމަށް ހުންނަ ޝައުގުވެރިކަންވެސް ދައްކައިދޭ އެއް ސަބަބެވެ.
"އެގޮތައް ހަމަ ފޮތިކޮޅެއް އޮތިއްޔާ ހަމަ ދެން ނުހުރެވޭނެ ހެދުމެއް ނުފަހައެއް. އެގޮތައް ޓްރައިކޮށްލާފަ ހިތަށް އަރަނީ ކަސްޓަމަރުންނަށް ދައްކާލާނަމޭ އޭތި ކަމުދޭތޯ. އެހެންވެގެން އަސްލު ޕޭޖަށް ލަނީ."
ކޮންމެ މީހަކަށްވެސް އެނގޭނެހެން ހެދުން ރީތިވަނީ ހަށިގަނޑަށް ރީތިކޮށް ފަހާފައި ހުންނައިރު އެވެ. އެގޮތަށް ހަމަ ކުޑަކުދިންގެ ހެދުންވެސް ރީތި ވަނީ ހަށިގަނޑަށް ރީތި ވަރަކަށް ހެދުން ހިފިފައި ހުރީމަ އެވެ. ނައީ އިންސްޓެންޓް ޕާޗެސް އަށް ހެދުން ފަހާއިރު ބޮޑަށް ބަލަނީ ކުޑަކުދިންގެ ހެދުން ތައްޔާރު ކުރެވޭތޯ އެވެ. އެއީ އާންމުކޮށް ހަފްތާ ބަންދުގައި ބޮޑަށް މީހުން ރީތި ކުރަނީ ކުޑަކުދިން ކަމަށްވާތީ އެވެ.
"އަސްލު ސައިޒުތަށް ބަލާ ގޮތަކީ އެންމެ ކުޑަކުދިން އެންމެ ޑްރެސްއަޕް ކުރަނީ. އެދުވަހުން އެދުވަހަށް ހަމަ ހެދުން ވިކޭ. ދެން ނުވިކެއްޖިއްޔާ ގިވްއަވޭ އެއްވެސް ދެން ނޫނީ ރައްޓެއްސަކަށް ހަދިޔާއަކަށް ނަމަވެސް ދެން"
އެންމެ ބޮޑު ގޮންޖެހުން
ކޮންމެ މަސައްކަތެއް ފަށާއިރުވެސް އެތަކެށް ގޮންޖެހުމަކާ ކުރިމަތިލާން ޖެހެ އެވެ. އެ ގޮންޖެހުންތައް ގިރާކުރަމުން މި ހިސާބަށް ނައީ އައިސްފައި އެހުރީ ވަރަށް ގިނަ މީހުންގެ އެހީތެރިކަމާއެކު އެވެ. ނައީ އަށް މިކަމުގައި ދިމާވި އެންމެ ބޮޑު ގޮންޖެހުން ކަޑައްތުކުރަން އެއްވެސް ފަސްޖެހުމެއް ނެތި ކަޑައްތުކޮށްފަ އެވެ.
ރާއްޖެއިން ބޭނުންވާ ކުލައެއްގެ ބޭނުން ވައްތަރެއްގެ ފޮތި ހޯދުމަކީ ވަރަށް ބޮޑު ގޮންޖެހުމެކެވެ. ނަމަވެސް ނައީ ކަސްޓަމަރުން ބޭނުން ވައްތަރެއްގެ ފޮތި ހޯދަނީ އެއްވެސް ޝަކުވާއަކާ ނުލައެވެ.
"މާލެއިން ނުލިބޭ މެޓީރިއަލްސް ނުވަތަ އެ ކުލަ ނުލިބެންޏާ އޮންލައިންކޮށްވެސް އޭތި ގެނެސްދެން. ދެން ބައެއްފަހަރު އަމިއްލަ ޓްރިޕްތަކުގައި ދާއިރު، ބޭރުން ވެސް އެއްޗެހި ގެންނަންދެން. ކުޑަކުދިންގެ ހެދުމުގައި ބޮޑަށް މާ އެއްޗެހި ބޭނުންވާތީ ކުލަ ނުލިބެންޏާ ހަމަ އެވެސް ގެންނަން"
ފެހުމުގައި ދިމާވާ ގޮންޖެހުންތަކާ ނައީ ކުރިމަތިލަނީ ހިނިތުންވުމާއެކު
ފޫހިކަމެއް ނެތި ނައީ މި މަސައްކަތް ކުރަނީ އެކަމަށް ކުޑައިރު އުފެދުނު ޝައުގެއްގެ ސަބަބުންނެވެ. އެކަމަށް ހުންނަ ޝައުގެއްގެ ބޮޑުކަމުން ނައީ ވިހައިގެން ހެދުން ފަހަން އިންދާ ތިނޯސް ބިއްދައިގެން ގޮސް ލޮލަށް ހެރުމުންވެސް ފެހުމާ ދުރަކަށް ނުދެ އެވެ. ހަމައެއާއެކު އޭނާގެ ފިރިމީހާވެސް ކޮންސްޓަރަކްޝަން މަސައްކަތްކުރާ މީހުން ގެންގުޅޭ ކަހަލަ އައިނެއް ގެނެސްގެންވެސް ވިޔަފާރީގައި އެހީތެރިކަން ވެވެން އޮތް ވަރަށް ވަމުން ދިޔަ އެވެ.
ގޭތެރޭ މަސައްކަތް ކުރަމުން ގްރޭޑް އެކެއްގައި އުޅޭ ދަރިފުޅު ގޮވައިގެން ނައީ ދަނީ ފުލް ޓައިމްކޮށް މި މަސައްކަތް ކުރަމުންނެވެ. އެވަރުންވެސް ދަރިފުޅަށް ވަގުތު ދެމުން ހުރިހާ އޯޑަރުނައިގެން ނުނިންމެ އެވެ.
އުންމީދަކީ ސްޓިޗް މޯލްޑިވްސް ބްރޭންޑް މުޅި ރާއްޖެއަށް އިނގިގެން ދިއުން
ކުޑަކުދިންގެ ހެދުމަށް ޝައުގުވެރިކަން އުފެދިގެން ފަހަންފެށި ހެދުންތައް ފިހާރައެއްގައި އަޅުވާލާފައި ހުރުން އެއީ ނައީ ދެކޭ އެންމެ ބޮޑު ހުވަފެނެވެ. ނަމަވެސް ފިހާރަ ހުޅުވުމަށްފަހުވެސް އެހެން މީހަކަށް އަމިއްލަ އައިޑިއާ ގެނެވޭނެ ކަމަށް ނައީ ގަބޫލެއް ނުކުރެ އެވެ.
"ފިހާރަ ހުޅުވާފަ ބޭރު މީހަކަށްވުރެ ބޮޑަށް ދިވެއްސަކު ބޭނުންވަނީ. ދިވެހި ކުއްޖަކު ގެނެސްގެން އެ ކުއްޖެއް ޓްރެއިން ކުރަން ދާ ވަގުތައް ބޭރު މީހެއް ގެންނާނަން. ދެން ބޮޑަށް ފެހުމަށްވުރެ، ފެހުމުގައި އެހީތެރިކަން ހޯދަން ކުއްޖެއް ގެންނާނީ"
ފުލްޓައިމް މަންމައެއްގެ ވަޒީފާ އަދާކުރަމުން ސްޓިޗް މޯލްޑިވްސް ހިންގަނީ
މިކަމުގައި އެންމެ ބޮޑު ސަޕޯޓެއްދޭ މީހުންނަށް ވަރަށް ބޮޑު ޝުކުރެއް
ނައީގެ މަސައްކަތުގައި އޭނާގެ ފިރިމީހާގެ އިތުރުން އާއިލާ އާއި ދައްތަ އަދި ބެސްޓްފްރެންޓް ގެ އެހީތެރިކަމާ އެއްބާރުލުން ވަރަށް ބޮޑަށް ލިބެ އެވެ. ނައީ ގަބޫލުކުރާ ގޮތުގައި ހެދުމެއް ނުފެހިގެން އުޅޭ ވަގުތުގައި އެމީހުންގެ ފަރާތުން ލިބޭ ހިތްވަރުގެ ބަސްތަކަކީ މަސައްކަތުގައި ކުރިއަށް ދިއުމަށް ލިބޭ އެންމެ ބޮޑު ހިތްވަރެވެ.
ކުރަން ޝައުގު ހުރިއްޔާ ކުރެވޭނެ މަސައްކަތެއް
މި މަސައްކަތް ކުރަން ފަށައިފިއްޔާ ކޮންމެ ކުއްޖަކަށްވެސް ކުރެވޭނެ ކަމަށް ނައީ ގަބޫލުކުރެ އެވެ. މަސައްކަތައް ވަގުތު ހޯދައިގެން ކުރަން ކެރެންޔާ ވަރަށް ބޮޑު އާމްދަނީ އެއް ލިބޭ މަސައްކަތެއް ކަމަށްވެސް ނައީ ފާހަގަކުރެ އެވެ.
Ads by STO
