ބޭރުގެ ސިފައިން ރާއްޖޭގައި ތިބުމަށް މަޖިލީހުގެ ރުހުން ހޯދަން ޖެހޭ ގޮތުން މުޅި މަޖިލިސް ކޮމިޓީން ފާސްކޮށްފި
ރާއްޖޭން ބޭރުގެ ސިފައިން ރާއްޖޭގައި ތިބުމަށް މަޖިލީހުގެ ރުހުން ހޯދަން ޖެހޭ ގޮތަށް ގާނޫނު އަސާސީއަށް ހުށަހެޅި އިސްލާހު މުޅި މަޖިލިސް ކޮމިޓީން ފާސްކޮށްފި އެވެ.
ބިލު މަޖިލީހަށް ހުށަހެޅުއްވީ ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު (ޝާޑު) އެވެ.
މިއަދުގެ ޖަލްސާއަށް ތައާރަފުކުރި ބިލުގެ ބަހުސް ނިންމާލިއިރު، ބަހުސްގައި ބައިވެރިވެ ވަޑައިގެންނެވީ 13 މެންބަރުންނެވެ. ބަހުސްއަށް އިދިކޮޅު އެމްޑީޕީއަށް ދިން ވަގުތު ހަމަވިއިރު، އެ ޕާޓީން ބަހުސްގައި ބައިވެރިވެ ވަޑައިގެންނެވީ 7 މެންބަރެކެވެ. ދެން އެ ބިލުގެ ބަހުސްގައި ބައިވެރިވެ ވަޑައިގެންނެވީ ޕީއެންސީގެ 5 މެންބަރުންނާ އަދި އަމިއްލަ މެންބަރެކެވެ.
އިސްލާހާ އެކު އެ ބިލު މުޅި މަޖިލިސް ކޮމިޓީން ފާސްކޮށްފައިވަނީ 75 މެންބަރުންގެ ވޯޓުންނެވެ. ބިލު ބަލައި ނުގަތުމަށް ވޯޓު ދެއްވީ 13 މެންބަރުންނެވެ.
އެ ބިލުގެ 4 ވަނަ އިސްލާހުގައި ވަނީ ގާނޫނު އަސާސީގެ 251 ވަނަ މާއްދާގެ (ނ) އަށް ހުށަހަޅާފައިވާ އިސްލާހެކެވެ.
ގާނޫނު އަސާސީގެ އެ މާއްދާގައި ބުނެފައިވަނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްވެގެން މެނުވީ ރާއްޖޭން ބޭރުގެ ފަރާތަކަށް ރާއްޖޭގެ ސަރަހައްދުގެ އެއްވެސް ބައެއް އަސްކަރީ ބޭނުމަކަށް ދީގެންނުވާނެ ކަމަށެވެ.
ހުށަހަޅާފައިވާ އިސްލާހުގައި އިތުރަށް ބުނެފައިވަނީ އެއްބަސްވުމެއްގެ ދަށުން ބާއްވާ އަސްކަރީ ތަމްރީނުތަކުގައި ބައިވެރިވުން ފިޔަވައި, މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްވެގެން މެނުވީ އަސްކަރީ ބޭނުމަކަށް ރާއްޖޭގެ ސަރަހައްދުގައި ބާރުގެ ސިފައިން އެއްވެސް ސިފައެއްގައި އަމަލީ ގޮތުން ހަރަކާތްތެރިވުމަށް ހުއްދަ ދީގެންނުވާނެ ކަމަށެވެ.
އެ ބިލުގެ 1 ވަނަ އިސްލާހުގައި ވަނީ ގާނޫނު އަސާސީގެ 3 ވަނަ މާއްދާގެ އިސްލާހުތަކެކެވެ. އެ މާއްދާއަކީ ދިވެހިރާއްޖޭގެ ސަރަހައްދެވެ.
އެ މާއްދާގައި ބުނެފައިވަނީ ރާއްޖޭގެ ސަރަހައްދަކީ ގާނޫނުގައިވާ ގޮތުގެ މަތިން ދަމައިލެވޭ، ރާއްޖޭގެ އާކިޕެލަޖިކް ބޭސްލައިންތަކުގެ ތެރޭގައިވާ ބިމާއި ޖައްވާއި ކަނޑާއި ކަނޑުގެ އަޑީގައިވާ ބިމާއި، ބުނެވިދިޔަ ބޭސްލައިންތަކުން ފެށިގެން ބޭރުގައިވާ ރާއްޖޭގެ ސަރަހައްދީ ކަނޑާއި އެ ކަނޑުގެ އަޑީގައިވާ ބިމާއި އެ ކަނޑާ ގުޅިފައިވާ ޖައްވެއް ކަމަށެވެ.
އޭގެ އިތުރުން ރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ މަދުވެގެން ތިންބައިކުޅަ ދެބައިގެ އަގުލަބިއްޔަތުން ފާސްވާ ގާނޫނަކުން ކަމަށް އެ މާއްދާގައި ބުނެ އެވެ.
އެ މާއްދާގެ (ށ) ގެ ގޮތުގައި ހުށަހެޅި އިސްލާހުގައި ބުނެފައިވަނީ ގާނޫނުގައި ކަނޑައަޅާފައިވާ ރާއްޖޭގެ އެތެރޭ ކަނޑާއި ރާއްޖޭގެ އާކިޕެލަޖިކް ކަނޑާއި ރާއްޖޭގެ ސަރަހައްދީ ކަނޑާއި އެ ކަނޑާ ގުޅިފައިވާ ކަނޑާއި ރާއްޖޭގެ ހާއްސަ އިގުތިސޯދީ ސަރަހައްދަށް އެއްވެސް ބަދަލެއް ގެނެވޭނީ ނުވަތަ އެއިން ސަރަހައްދަކަށް އުނިކަމެއް އަންނަ ފަދަ އެއްވެސް ކަމެއް ކުރެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ މަދުވެގެން ތިންބައިކުޅަ ދެބައިގެ އަގުލަބިއްޔަތުން ފާސްވާ ގާނޫނަކުން ކަމަށެވެ.
އެ އިސްލާހަށް ބާރަށު ދާއިރާގެ ޕީއެންސީގެ މެންބަރު އިބްރާހީމް ޝުޖާއު ހުށަހެޅި އިސްލާހުގައި ބުނެފައިވަނީ ގާނޫނުގައި ކަނޑައަޅާފައިވާ ރާއްޖޭގެ އެތެރޭ ކަނޑާއި ރާއްޖޭގެ އާކިޕެލަޖިކް ކަނޑާއި ރާއްޖޭގެ ސަރަހައްދީ ކަނޑާއި އެ ކަނޑާ ގުޅިފައިވާ ކަނޑާއި ރާއްޖޭގެ ހާއްސަ އިގުތިސޯދީ ސަރަހައްދަށް އެއްވެސް ބަދަލެއް ގެނެވޭނީ ނުވަތަ އެއިން ސަރަހައްދަކަށް އުނިކަމެއް އަންނަ ފަދަ އެއްވެސް ކަމެއް ކުރެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރު ބައިކުޅަ ތިންބައިގެ އަގުލަބިއްޔަތުން ފާސްވާ ގާނޫނަކުން ކަމަށެވެ.
އެ އިސްލާހަަށް ދިއްދޫ ދާއިރާގެ ޕީއެންސީގެ މެންބަރު އަބްދުލްލަތީފް މުހައްމަދު ތާއީދު ކުރެއްވި އެވެ.
އެ ހުށަހެޅުން ފާސްކޮށްފައިވަނީ 83 މެންބަރުންގެ ވޯޓުންނެވެ. އެ ހުށަހެޅުމަށް ވަކި ގޮތަކަށް ވޯޓު ދެއްވާފައި ނުވާ އެއް މެންބަރަކު އިންނެވި އެވެ.
އެ ބިލަކީ މިއަދުގެ ޖަލްސާއަށް ތައާރަފުކޮށް, އިބްތިދާއީ ބަހުސް ނިންމާލާފައިވާ ބިލެކެވެ. އަދި ޖަލްސާ ނިންމާ އޭގެ 15 މިނެޓު ފަހުން ކޮމިޓީގެ މަސައްކަތް ފަށާފައިވެ އެވެ. އަދި ކޮމިޓީގެ މަސައްކަތް 2 ގަޑިއިރާއި 30 މިނެޓު ތެރޭގައި ވަނީ ނިންމާލާފަ އެވެ.
