މަޝްވަރާ ނުހޯދާ ގާނޫނު އަސާސީ ބަދަލު ކުރުމުން ޑިމޮކްރެޓުން ކަންބޮޑުވެއްޖެ
ސަރުކާރުން ކުރިން ބުނެފައިވާ ގޮތަށް ގާނޫނު އަސާސީއަށް ގެނެވޭ ބަދަލުތަކާ މެދު މަޝްވަރާ ކުރުމެއް ނެތި އިސްލާހުތައް ގެެނެސްފައިވާތީ އެކަމުގެ ކަންބޮޑުވުން ދަ ޑިމޮކްރެޓްސްއިން ފާޅުކޮށްފި އެވެ.
ސަރުކާރުގެ ފަރާތުން ގާނޫނު އަސާސީއަށް އިސްލާހުތަކެއް ގެނައުމަށް އިއްޔެ ބޭއްވި ރައްޔިތުންގެ މަޖިލިހުގެ ޖަލްސާއަށް ހުށަހެޅުއްވީ ހުޅުދޫ ދާއިރާގެ ކޮންގްރެސް ޕާޓީގެ މެންބަރު މުހައްމަދު ޝާހިދު (ޝާޑު) އެވެ. އެ ބިލުގެ ބަހުސާއި މުޅި މަޖިލިސް ކޮމިޓީގެ މަސައްކަތް ނިންމާލީ މެންދުރުފަހު އެވެ. މަޖިލީހުން ބިލު ފާސްކޮށްފައި ވަނީ ހަވީރު އެވެ. ފާސް ކުރުމަށް 78 މެންބަރުން ވޯޓު ދެއްވިއިރު، ބިލާ ދެކޮޅަށް 13 މެންބަރަކު ވޯޓު ދެއްވި އެވެ.
އެ އިސްލާހުތައް ރައީސް ޑރ. މުހައްމަދު މުއިއްޒު ރޭ ތަސްދީގު ކުރެއްވުމާ އެކު އިސްލާހުތަކަށް އަމަލު ކުރަން ވަނީ ފަށާފަ އެވެ.
ގާނޫނު އަސާސީއަށް ގިނަ އިސްލާހުތަކެއް ގެނައުމާ ގުޅިގެން ރޭ ޑިމޮކްރެޓްސްއިން ނެރުނު ބަޔާނެއްގައި ބުނީ ގާނޫނު އަސާސީއަށް ބަދަލުތައް ގެންނަވާނީ ސިޔާސީ ޕާޓީތައް ޝާމިލުކޮށް ފުޅާމިނެއްގައި މަޝްވަރާކޮށްގެން ކަމަށް ރައީސް ޑރ. މުހައްމަދު މުއިއްޒު ކުރިން ވިދާޅުވެފައިވާ ކަމަށެވެ. އެހެންނަމަވެސް އެއާ މުޅިން ހިލާފަށް އަމަލު ކުރައްވަމުން ގެންދަވާތީ އެ ޕާޓީން ކަންބޮޑުވާ ކަމަށެވެ.
ސިޔާސީ ޕާޓީތަކާއި އާންމު ރައްޔިތުންގެ ހިޔާލާއި މަޝްވަރާ އާ ނުލައި ގާނޫނު އަސާސީއަށް ގިނަ ބަދަލުތަކެއް ސަރުކާރުން ރައްޔިތުންގެ މަޖިލިހަށް ހުށަހަޅާފައިވާކަން ޑިމޮކްރެޓްސްއިން ފާހަގަކުރި އެވެ. އެ ބަދަލުތަކުގެ ތެރޭގައި އެންޓި-ޑިފެކްޝަން އާ ގުޅޭ ހުށަހެޅުމެއް ހިމެނޭއިރު، މަޖިލިހުގެ މެމްބަރަކު ނިސްބަތްވާ ޕާޓީއަކުން އެ މެމްބަރަކު ވަކިކުރުމުން އެ މެމްބަރެއްގެ ގޮނޑި ގެއްލޭނެ ކަމަށް ބަޔާންކޮށްފައިވާ ކަމަށެވެ.
ޑިމޮކްރެޓްސްއިން ބުނި ގޮތުގައި އެންޓި-ޑިފެކްޝަން ނުވަތަ ރައްޔިތުންގެ މަޖިލިހުގެ މެމްބަރަކު ޕާޓީ ބަދަލު ކުރުމުން އެ މެމްބަރެއްގެ ގޮނޑި ގެއްލޭނެ އުސޫލެއް ގާނޫނު އަސާސީގައި ކަނޑައެޅުމަކީ އެ ޕާޓީން ތާއީދުކުރާ ކަމެއް ކަަމުގަ އެވެ.
"ނަމަވެސް ސަރުކާރުން ހުށަހަޅާފައިވާ ހުށަހެޅުމުގައި ވާގޮތުން ރައްޔިތުންގެ މަޖިލީހުގެ މެމްބަރެއްގެ ގޮނޑި ގެއްލުވާލުމަށް ބޭނުންވެއްޖެ ކޮންމެ ފަހަރަކު ފަސޭހަކަމާ އެކު އެ ޕާޓީއަކުން އެ މެމްބަރަކު ވަކިކޮށްލުމުން އެ މެމްބަރެއްގެ ގޮނޑި ގެއްލިދެ އެވެ،"
އެ ޕާޓީން މީގެކުރިން ވެސް މަޖިލިހުގައި ވަކާލާތުކޮށްފައި ވާނީ، އާންމު ރައްޔިތުންގެ ވޯޓުން އިންތިހާބުކޮށްފައިވާ މެމްބަރަކު، ޕާޓީއަކުން ކަނޑާލުމުން އެ މެމްބަރެއްގެ ގޮނޑި އޮޓޮމެޓިކުން ގެއްލިދާ ގޮތް ވުމަކީ ހަމަޖެހޭ އުސޫލެއް ނޫން ކަމަށް ކަމުގައި ޑިމޮކްރެޓްސްއިން ބުނެ އެވެ.
ސަރުކާރުން ގާނޫނު އަސާސީއަށް ހުށަހަޅާފައިވާ އަނެއް ބަދަލުގައިވާ ގޮތުން، ކުރު ރާސްތާ އާއި މެދު ރާސްތާ އާއި އަދި ދިގު ރާސްތާގެ ޕްލޭންތައް އެކުލަވާލުމުގެ އިހުތިޔާރު ރައީސުލްޖުމްހޫރިއްޔާއަށް ލިބިދީފައިވެ އެވެ.
އެކަމާ ގުޅިގެން އެ ޕާޓީން ވަނީ އެކަން ކުރުމުގައި އެހެން އެއްވެސް ފަރާތެއްގެ ޝާމިލުވުމެއް ރުހުމެއް ނުވަތަ މަޖިލިހުން ފާސްކުރުމެއް އޮންނަން ޖެހޭނެ ކަމަށް ބަޔާންކޮށްފައި ނުވާކަން ފާހަގަކޮށްފަ އެވެ.
"އެއިރެއްގައި ވެރިކަމުގައި ހުންނަވާ ރައީސުލްޖުމްހޫރިއްޔާއަކު އެފަދަ ޕްލޭނެއް އެކުލަވާލުމުން، ދެން އެއަށް އިންތިހާބުކުރެވޭ ރައީސުން އެއަށް ތަބާވާން ޖެހޭ ކަމެއް ނުވަތަ ނޫން ކަމެއް ވެސް އެނގެން ނެތްކަން ފާހަގަކުރަމެވެ،"
ޑިމޮކްރެޓްސްއިން ވަނީ ސަރުކާރުން ކުރިން ބުނި ގޮތަށް ގާނޫނު އަސާސީއަށް ގެނެވޭ ބަދަލުތަކުގެ މަޝްވަރާތައް ފުޅާ ދާއިރާއެއްގައި ބާއްވައި، އެކަމުގައި ސިޔާސީ ޕާޓީތަކާއި އާންމު ރައްޔިތުން ޝާމިލު ކުރުމަށް ސަރުކާރަށް ގޮވާލާފަ އެވެ.
