ކޮންގްރެސް ޕާޓީގެ ދާއިރާތަކުގެ އިންތިހާބު މާދަމާ
ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) ގެ ދާއިރާތަކުގެ އިންތިހާބު މާދަމާ ބޭއްވުމަށް އެ ޕާޓީން ތައްޔާރުވެއްޖެ އެވެ.
ކޮންގްރެސް ޕާޓީގެ އެތެރޭގެ އިންތިހާބު ބާއްވަން ފުރަތަމަ ނިންމީ އޮކްޓޫބަރު މަހުގެ 19 ވަނަ ދުވަހު އެވެ. އެހެންނަމަވެސް މަގާމުތަކަށް ޝައުގުވެރިވާ ގިނަ ފަރާތްތަކަކުން އިންތިހާބު ބާއްވާ ތާރީހާއި ކުރިމަތިލުމަށް ދެވުނު މުއްދަތު އިތުރުކޮށްދިނުމަށް އެދެމުން ގެންދާތީ ކަމަށް ބުނެ އިންތިހާބު ބާއްވާ ތާރީހު މި މަހުގެ 9 ވަނަ ދުވަހަށް ފަސްކުރި އެވެ.
އަދި އެ ފަހުން ތާރީހަށް ބަދަލު ގެނެސްފައި ވަނީ ޖުމްހޫރީ ދުވަހާ ގުޅިގެން މި މަހުގެ 10 ވަނަ ދުވަސް ރަސްމީ ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ކަނޑައެޅުއްވުމާ ގުޅިގެން ހަފުތާ ބަންދަށް ގިނަ ބަޔަކު ރަށުން ބޭރަށް ދަތުރުކުރާނެތީ ކަމަށް ބުނެ އެވެ.
ކޮންގްރެސް ޕާޓީގެ ދާއިރާތަކުގެ އިންތިހާބުގެ ވޯޓުލުން ކުރިއަށް ގެންދިއުމަށް އެ ޕާޓީން ނިންމާފައި ވަނީ މާދަމާ ހެނދުނު 10:00 އިން ފެށިގެން މެންދުރުފަހު 2:00 އަށެވެ. މާލެ ސަރަހައްދުގައި ބަހައްޓާ ފޮށިތަކުގެ ތެރެއިން މާލޭގެ ފޮށިތައް ހުންނާނީ ދަރުބާރުގޭގަ އެވެ. އެއީ މާލޭގެ ދާއިރާތަކުގެ ފޮށިތަކާ އަދި އަތޮޅުތަކުގެ ފޮށިތަކެވެ. ހުޅުމާލޭގެ ދާއިރާތަކުގެ ފޮށިތައް ރެހެންދި ސްކޫލުގައި ބަހައްޓަން ހަމަޖައްސާފައިވާއިރު، ވިލިމާލެ ދާއިރާގެ ފޮށި ހުންނާނީ މުހިއްޔުއްދީން ސްކޫލުގަ އެވެ. ރަށްރަށުގައި ފޮށިތައް ބަހައްޓާނީ ސްކޫލު އިމާރާތްތަކުގަ އެވެ.
ކޮންގްރެސް ޕާޓީގެ ދާއިރާތަކުގެ އިންތިހާބުގައި ކުރިމަތިލާން ހުޅުވާލާފައިވާ މަގާމުތަކަކީ:
- ދާއިރާގެ ރައީސް އަދި ނައިބު ރައީސް
- ޒުވާނުންގެ ހަރަކާތުގެ ރަށުގެ ރައީސް އަދި އަންހެނުންގެ ހަރަކާތުގެ ރަށުގެ ރައީސް
- ސްޓިއަރިން ކޮމިޓީގެ މެމްބަރު
މަޖިލިހުގެ މެމްބަރުންގެ ގޮތުގައި އެ ޕާޓީ ތަމްސީލުކުރައްވާ މެމްބަރުން ތިއްބެވި ދާއިރާތަކުގެ ރައީސުންނަށް ވާނީ މެމްބަރުންނެވެ. އެ ދާއިރާތަކަށް ހޮވާނީ ނައިބު ރައީސުންނެވެ. އަދި އެ ނޫން ދާއިރާތަކަށް ރައީސުންނާއި ނައިބު ރައީސުން ހޮވާނެ އެވެ. އިންތިހާބުގައި މި މަގާމުތަކަށް 2،095 މެމްބަރުން އިންތިހާބު ކުރާނެ އެވެ.
ކޮންމެ ރަށަކާއި ސިޓީއަކުން ސްޓިއަރިން ކޮމިޓީއެއް ހޮވާއިރު، އާބާދީއަށް ބަލާނެ އެވެ. އެގޮތުން އާބާދީގައި 3،000 މީހުންނަށް ވުރެ މަދުން މީހުން ދިރިއުޅޭ ރަށްރަށުގައި ހޮވާނީ 7 މެމްބަރުންގެ މައްޗަށް އެކުލެވޭ ކޮމިޓީއެކެވެ. އަދި 3،000 އަށް ވުރެ ގިނަ މީހުން ދިރިއުޅޭ ރަށްރަށުންނާއި ސިޓީތަކުގެ ދާއިރާތަކުން ކޮންމެ ދާއިރާއަކަށް 9 މެމްބަރުންގެ މައްޗަށް އެކުލެވޭ ކޮމިޓީއެއް އިންތިހާބު ކުރާނެ އެވެ.
