ތިނަދޫ ސިޓީގެ ދަރަޖަ ބާތިލްކުރަން ކޯޓަށް ދިޔުމުން ރާގިބު ވަކިކޮށްފި
ގދ. ތިނަދޫއަށް ސިޓީއެއްގެ ދަރަޖަ ދިނުމަށް މިދިޔަ ސަރުކާރުން ނިންމިއިރު، އެ ރަށުގައި 10،000 މީހުން ހަަމަނުވާ ކަމަށް ބުނެ ސިޓީގެ ދަރަޖަ އަތުލުމަށް އެދި، ދައުލަތާ ދެކޮޅަށް ހައި ކޯޓަށް ދުސްތޫރީ މައްސަލައެއް ހުށަހެޅި ކްލައިމެޓް ޗޭންޖް އެންޑް އެންވަޔަރަމެންޓު މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާގިބު އެ މަގާމުން ވަކިކޮށްފި އެވެ.
ހައިކޯޓުގެ ރެޖިސްޓްރީން ދައްކާގޮތުން މިދިޔަ ބުރާސްފަތި ދުވަހު އެ މައްސަލަ ރައީސް އޮފީހަށް ރައްދުވާ ގޮތަށް ހުށަހެޅުއްވީ ގާނޫނީ ވަކީލުކަންވެސް ކުރައްވާ ރާގިބެވެ.
"ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން... ޑެޕިއުޓީ މިނިސްޓަރު މުހައްމަދު ރާގިބު އަހްމަދު މިއަދު އެމަގާމުން ރައީސުލްޖުމްހޫރިއްޔާ ވަކިކުރައްވައިފި" ރައީސް އޮފީހުގެ ތަރުޖަމާނު އެކްސް ގައި ކުރެއްވި ޕޯސްޓެއްގައި ވިދާޅުވި އެވެ.
"ދެން" އަށް ލިބިފައިވާ މައްސަލައިގެ ލިޔުމުގައިވާ ގޮތުން މިދިޔަ ސަރުކާރުން ތިނަދޫއަށް ސިޓީއެއްގެ ދަރަޖަ ދިނުމުގައި ރަސްމީ އާބާދީގެ އަސްލަކަށް ބަލާފައިވަނީ އޭރުގެ ތިނަދޫ ކައުންސިލުން ހިއްސާކުރި ލިޔުންތަކެއް ކަމަށް ބުނެފައިވެ އެވެ. އަދި އެ ލިޔުމުގައި 10،150 މީހުން ހަމަކޮށްފައިވަނީ ސައްހަ ނޫން މައުލޫމާތު ހިމަނައިގެން ކަމަށް ބުނެފައިވެ އެވެ.
ކޯޓަށް ހުށަހެޅުނު މައްސަލައިގައި ފާހަގަކޮށްފައިވާ ގޮތުން، 10،000 މީހުން ހަމަކުރުމަށް ތަކުރާރުކޮށް އައިޑީކާޑު ބޭނުންކޮށްފައިވާ ކަމަށާއި، އެވަގުތު މަރުވެފައިވާ 115 މީހުން އާބާދީގައި ހިމަނާފައިވާކަން ފާހަގަކޮށްފައިވެ އެވެ. އަދި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ރެޖިސްޓްރީ ލިސްޓަށް ބެލުމުން އެ އަދަދު 196 އަށް އަރާ ކަމަށް ވެސް ބުނެފައިވެ އެވެ.
އިތުރަށް އެ ލިޔުމުގައި ބުނެފައިވާ ގޮތުން ޑީއެންއާރުގެ ރެޖިސްޓްރީ ލިސްޓާއި ކައުންސިލްގެ ލިސްޓު އަޅާކިޔުމުން ބޮޑު ފަރަގެއް ފާހަގަވާން ހުރި ކަމަށެވެ. އެ ލިޔުމުގައި ބުނެފައިވާ ގޮތުން މި މަހުގެ 17 ވަނަ ދުވަހާ ހަމައަށް ޑީއެންއާރުގެ ރެޖިސްޓްރީން ދައްކާ ގޮތުން ތިނަދޫގެ އާބާދީއަކީ 7،924 އެވެ.
