މީޑިއާ ބިލް އަނބުރާ ގެންގޮސްފި
މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޯޑްކާސްޓިން ކޮމިޝަން އުވާލައި، "މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން" ގެ ނަމުގައި އާ ކޮމިޝަނެއް އުފައްދަން ރައްޔިތުންގެ މަޖިލިހަށް ހުށަހަޅާފައިވާ 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު' އަނބުރާ ގެންގޮސްފި އެވެ.
އެ ބިލް ހުށަހެޅުއްވީ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރެވެ.
އެ ބިލް އަނބުރާ ގެންގޮސްފައިވާކަން އިއުލާނުކޮށްފައިވަނީ މިއަދުގެ ޖަލްސާގައި މަޖިލީހުގެ ރައީސް އަބްދުއްރަހީމް އަބްދުالله އެވެ.
"13 ނޮވެންބަރު 2024 ގައި ބޭއްވުނު 20 ރައްޔިތުންގެ މަޖިލީހުގެ 49 ވަނަ ޖަލްސާގައި ފުރަތަމަ ކިޔުން އިއްވާފައިވާ ތުޅާދޫ ދާއިރާގެ އިއްޒަތްތެރި މެންބަރު އަބްދުލްހަންނާން އަބޫބަކުރު ހުށަހަޅުއްވާފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލް ރައްޔިތުންގެ މަޖިލީހުގެ ގަވާއިދުގެ 101 ވަނަ މާއްދާގައިވާ ގޮތުގެ މަތިން 19 ނޮވެންބަރު 2024 ގައި އަނބުރާ ގެންދަވާފައިވާތީ އެކަން އިއުލާނުކުރަން
އެ ބިލު އަނބުރާ ގެންދަން ނިންމާފައިވަނީ އެ ބިލު ޕީއެންސީން ބޭރުކޮށްލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި ވަނިކޮށެވެ.
އެ ބިލާ ދެކޮޅަށް ނޫސްވެރިންގެ ހައްގުގައި މަސައްކަތްކުރާ ޖަމިއްޔާ ޖަމާއަތްތަކުން މަސައްކަތްތަކެއް ކޮށްފައިވާއިރު ނޫސްވެރިންގެ ޖަމިއްޔާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިސް ނަގައިގެން 'ހަތަރެއްގެ ހައްގުގައި' ނަމުގައި ކެމްޕެއިނެއްވެސް ކުރިއަށް ގެންދިޔަ އެވެ.
ބިލުގައިވާ ގޮތުން އެ ގާނޫނަށް އަމަލުކުރަން ފެށުމާ އެކު، އެމްއެމްސީ އަދި ބްރޯޑްކޮމް އުވާލެވޭނެ ކަމަށާއި މޯލްޑިވްސް މީޑިއާ އެންޑް ބްރޯޑްކާސްޓިންގެ ނަމުގައި އުފައްދާ ކޮމިޝަނުގައި ތިބޭނީ 7 މެމްބަރުން ކަމަށެވެ.
އޭގެތެރެއިން 4 މެމްބަރުން ކަނޑައަޅާނީ ރައްޔިތުންގެ މަޖިލިހުގެ ރުހުމާ އެކު ރައީސުލްޖުމްހޫރިއްޔާ ކަމަށެވެ.
ބާކީ ތިން މެމްބަރުންނަކީ މީޑިއާއިން އިންތިހާބުކުރާ މެންބަރުން ކަމަށްވި ނަމަވެސް އެ ކޮމިޝަނުގެ ރައީސާއި ނައިބު ރައީސް ކަނޑައެޅުމުގެ ބާރު ލިބިދެނީ ވެސް ރައީސުލްޖުމްހޫރިއްޔާއަށެވެ.
އޭގެ އިތުރުން ބިލުގައި ވަނީ ނޫސް މަޖައްލާއެއްގެ ރަޖިސްޓްރީ ބާތިލުކުރާނެ ހާލަތްތަކާއި ބްރޯޑްކާސްޓްކުރުމުގެ ހިދުމަތްދިނުމުގެ ލައިސަންސް އޮތް ފަރާތަކުން ސުލޫކީ މިންގަނޑާ ނުވަތަ ލައިސަންސް ދިނުމުގެ ޝަރުތަކާ ހިލާފުވެއްޖެނަމަ އަމަލުކުރާނެ ގޮތްތައް ބަޔާންކޮށްފަ އެވެ.
އަދި ނޫސް މަޖައްލާއަކުން ނުވަތަ މީޑިއާގައި މަސައްކަތްކުރާ ފަރާތްތަކާއި ނޫސްވެރިން ބަޔާންކޮށްފައިވާ އުސޫލުތަކާ ހިލާފުވެއްޖެނަމަ އަމަލުކުރާނެ ގޮތްތަކާއި ކުރެވޭނެ ޖޫރިމަނާތައް ބިލުގައި ހިމަނާފައިވެ އެވެ.
