Monday, 16 November 2026
Advertisement
Ooredoo — Airfibre (leaderboard)
ރައްޔިތުންގެ މަޖިލިސް

މަޓާޓޯއިން ވެސް ތާއީދުކުރަނީ އިޒްރޭލު ވެރިންގެ ޕާސްޕޯޓު އެކަނި މަނާކުރަން

މަޓާޓޯއިން ވެސް ތާއީދުކުރަނީ އިޒްރޭލު ވެރިންގެ ޕާސްޕޯޓު އެކަނި މަނާކުރަން
އިޒްރޭލުގެ ސަރުކާރާއި އިސްވެރިންނަށް އަމާޒުކޮށް އެ ގައުމުގެ ޕާސްޕޯޓުގައި ރާއްޖެއަށް އެތެރެވުން މަނާކުރަން އެ ޖަމިއްޔާއިން ތާއީދުކުރާ ކަމަށް މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަ އޮޕަރޭޓާސް (މަޓާޓޯ) އިން ބުނެފި އެވެ. އިޒުރޭލު ޕާސްޕޯޓު މަނާކުރުމާ ގުޅޭގޮތުން އިމިގްރޭޝަން ގާނޫނަށް އިސްލާހު ގެންނަން ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއީލް އަހުމަދު ނަސީމް ހުށަހެޅުއްވި ބިލު ބަލައިގަނެ، ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ބިލުގެ މަސައްކަތް ފަށާފައި އޭގެ 5 މަސް ދުވަސް ފަހުން ހިނގަމުން މިދާ ނޮވެމްބަރު މަހުގެ 12 ވަނަ ދުވަހު އެވެ. އިޒްރޭލު ޕާސްޕޯޓް މަނާކުރަން ހުށަހަޅާފައިވާ ބިލާ ގުޅޭގޮތުން ހިޔާލު ހޯދުމަށް 241 ކޮމިޓީގެ މިއަދުގެ ބައްދަލުވުމަށް މަޓާޓޯގެ ބޭފުޅުން ވަނީ ހާޒިރުކޮށްފަ އެވެ. ބައްދަލުވުމުގައި އެ އެސޯސިއޭޝަނުގެ ރައީސް އަބްދުﷲ ގިޔާސް ރިޔާޒް ވިދާޅުވީ އިންޓަނޭޝަނަލް ކްރިމިނަލް ކޯޓް (އައިސީސީ) ފަދަ ތަންތަނުން އިޒްރޭލާ ދެކޮޅަށް ފިޔަވަޅު އަޅަމުންދާތަން ފެންނަ ކަަމަށެވެ.
"އަޅުގަނޑުމެންނަށް ފެންނަނީ ޓާގެޓެޑްކޮށްނޭ ބޮޑަށް ގެންދަން. އިޒްރޭލުގެ ސަރުކާރާއި އިޒްރޭލުގެ އިސްވެރިންނަށް ޓާގެޓްކޮށްގެން ގެންދިޔައިއްޔާ އަޅުގަނޑުމެންނަށް ފެންނަނީ،" ގިޔާސް ވިދާޅުވި އެވެ.
241 ކޮމިޓީން އިއްޔެ ވަނީ ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) ގެ ބޭފުޅުންނާ ވެސް ބައްދަލުކޮށްފަ އެވެ. އެ ޖަމިއްޔާއިން ވެސް ބުނެފައި ވަނީ އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާކުރަން ފެންނަނީ އެ ގައުމުގެ ވެރިންނަށް އެކަނި ކަމަށެވެ. މީކާއީލް ބިލު ހުށަހެޅުއްވި ފަހުން، މިދިޔަ ޖޫން މަހުގެ ދެ ވަނަ ދުވަހު ވަޒީރުންގެ މަޖިލިހުގެ މަޝްވަރާ އާއި ލަފާގެ މަތިން އިޒްރޭލް ޕާސްޕޯޓުގައި ރާއްޖެއަށް ނުވަދެވޭ ގޮތަށް އިމިގްރޭޝަން ގާނޫނަށް ގެންނަން ޖެހޭ ބަދަލުތައް ގެނައުމަށް ރައީސް ޑރ. މުހައްމަދު މުއިއްޒު ނިންމެވި އެވެ. އެފަހުން އެޓާނީ ޖެެނެރަލް އަހުމަދު އުޝާމް ވިދާޅުވެފައި ވަނީ އިޒްރޭލް ޕާސްޕޯޓް އޮތް އެންމެނަށް ޖުމްލަ މާނައެއް ދިނުމުގެ ބަދަލުގައި ބިލުގައި އޮތް ގޮތް ބަދަލު ކުރުމާ މެދު ވިސްނައި ދިރާސާ ކުރަން ޖެހޭ ކަމަށެވެ. އިޒްރޭލު ޕާސްޕޯޓު މަނާކުރާ ބިލުގެ މަސައްކަތް އަންނަ ފެބްރުއަރީ މަހުގެ ނިޔަލަށް ދިގުދަންމާލުމަށް ފުރަތަމަ ނިންމި ނަމަވެސް ކޮމިޓީން މިހާރު މަސައްކަތް ކުރަމުން ދަނީ ބިލުގެ މަސައްކަތް އަވަސް ކުރުމަށެވެ. ބިލާ ގުޅިގެން ބޭނުންވާ މައުލޫމާތު ކަމާ ގުޅުންހުރި އިދާރާތަކުން ހޯދުމުގެ އިތުރުން ސިޔާސީ ޕާޓީތަކާއި މުއައްސަސާތަކުގެ ބަސް ހޯދުމަށް ވެސް ކޮމިޓީން ފާސްކޮށްފައިވެ އެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.