މަޖިލީހުގެ އިދާރާއަށް މީޑިއާ ޑިރެކްޓަރަކު ހޯދަނީ
ރައްޔިތުން މަޖިލީހުގެ އިދާރާއަށް މީޑިއާ އެންޑް ކޮމިއުނިކޭޝަންސް ޑިރެކްޓަރެއް ހޯދަން މިއަދު އިއުލާނު ކޮށްފި އެވެ.
މީގެކުރިން އެ މަގާމުގައި ހުރީ ހަސަން ޒިޔާއު އެވެ. އޭނާ އެ މަގާމު އަދާކުރަން ފެށީ 2019 ވަނަ އަހަރު އެވެ. ނަމަވެސް މިދިޔަ އޮކްޓޯބަރު މަހުގެ 21 ވަނަ ދުވަހު ޒިޔާއު މަގާމުން ވަކިކޮށްފައިވެ އެވެ. މީޑިއާތަކަށް މައުލޫމާތު ދެމުން އެދުވަހު ޒިޔާއު ވިދާޅުވީ، މަގާމުން ވަކިކޮށްފައިވަނީ ޕާލަމެންޓަރީ ސާވިސް ގަވާއިދުގެ ކޯޑު އޮފް ކޮންޑަކްޓާ ހިލާފުވިކަމަށް ބުނެ ކަމަށެވެ.
ޒިޔާއު ވިދާޅުވީ އޭނާގެ މަގާމަކީ ސިޔާސީ މަގާމަކަށް ނުވާއިރު އޭނާ މަގާމުން ވަކިކުރީ ޕާލަމެންޓަރީ ސާވިސްގެ ގަވައިދާ ހިލާފަށް ކަމަށެވެ.
މަޖިލީހުގެ އިދާރާއިން ވަނީ އަލުން އެ މަގާމަށް މީހަކު ހޯދަން އިއުލާނު ކޮށްފަ އެވެ. އެ އިއުލާނުގައިވާ ގޮތުން މަގާމަށް ކުރިމަތިލުމުގެ ފުރުސަތު ހުޅުވާލެވިފައިވަނީ އަންނަ މަހުގެ 5 ވަނަ ދުވަހުގެ ނިޔަލަށެވެ.
އެ މަގާމުގެ އެންމެ ދަށް ޝަރުތަކަށް ބަޔާން ކޮށްފައިވަނީ ނޫސްވެރިކަމުގެ ދާއިރާއިން ގައުމީ ސަނަދުތަކުގެ އޮނިގަނޑު ލެވެލް 7 ގެ ސަނަދެއް ހާސިލްކޮށްފައިވުމާއެކު ނޫސްވެރިކަމުގެ ދާއިރާއިން މަދުވެގެން 6 އަހަރު ދުވަހުގެ މަސައްކަތު ތަޖުރިބާ ލިބިފައިވުމެވެ. މީޑިއާ ޑިރެކްޓަރުގެ މުސާރައަކީ މަހަކު 15,950 ރުފިޔާ އެވެ. މުސާރާއިގެ އިތުރަށް ހަމަޖެހިފައިވާ އުސޫލުން އިތުރު އެލަންވެންސްތައް ލިބޭނެ އެވެ.
އެ މަގާމަށް ކުރިމަތިލުމަށް ހުށަހަޅަންވާނީ މަޖިލީހުގެ އިދާރާއިން ދީފައިވާ ލިންކް މެދުވެރިކޮށް ކަމަށް ބުނެފައިވެ އެވެ.
Ads by STO
