އަންހެނެއްގެ ފޭސްބުކް އެކައުންޓް ހެކްކޮށްގެން ފައިސާ ހޯދާ މައްސަލައެއް ބަލަނީ
އަންހެނެއްގެ ފޭސްބުކް އެކައުންޓް ހެކްކޮށްގެން މަކަރާއި ހީލަތުން ފައިސާ ހޯދަމުން އަންނަ މައްސަލައެއް ފުލުހުން ބަލަން ފަށައިފި އެވެ.
ސޯޝަލް މީޑިއާގައި ދައުރުވަމުންދާ ޕޯސްޓެއްގައި ބުނީ އެކި މީސްމީހުން ލައްވާ ގިނަ އަދަދެއްގެ ފައިސާ ޖަމާކޮށްފައި ވަނީ ފުލުހަކާ ގުޅުން އޮންނަ އަންހެނެއްގެ އެކައުންޓަށް ކަމަށްވެ އެވެ. އެ ފައިސާ އަނބުރާދޭން ޑިމާންޑް ކުރުމުން މައްސަލަ ފުލުހުންނަށް އަންގައި، އެކައުންޓް ހެކްވީ ކަމަށް އެކަމުގައި އުޅުނު މީހާ ބުނަމުންދާ ކަމަށެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ އަންހެނެއްގެ ފޭސްބުކް އެކައުންޓު ހެކްކޮށްގެން އެ މީހާގެ ނަމުގައި އެހެން މީހުންގެ އަތުން ފައިސާ ހޯދަމުން އަންނަ ކަމަށެވެ.
އެކައުންޓް ހެކްކޮށް، މީހުންނަށް މެސެޖުކޮށްގެން ފައިސާ ހޯދަމުންދާ މައްސަލަ ފުލުހުންނަށް ރިޕޯޓުކޮށްފައި ވަނީ އިއްޔެ އެވެ.
ނަމަވެސް ހޯދިފައި ވަނީ ކިހާ އަދަދެއްގެ ފައިސާއެއް ކަމެއް އަދި މައްސަލަ އާ ގުޅިގެން މީހަކު ހައްޔަރުކޮށްފައިވާ ކަމަކަށް ފުލުހުން ބުނެފައެއް ނުވެ އެވެ.
އެ މައްސަލަ ފުލުހުން ގެންދަނީ ތަހުގީގު ކުރަމުންނެވެ.
ސޯޝަލް މީޑިއާ އެކައުންޓުތައް ހެކްކޮށްގެންނާއި އެކި ކުންފުނިތަކާއި މުއައްސަސާތަކުގެ ނަމުގައި ސްކޭމް މެސެޖު ފޮނުވައިގެން މަކަރާއި ހީލަތުން ފައިސާ ހޯދާ މައްސަލަތައް ރާއްޖޭގައި ގިނަ އެވެ.
ފުލުހުން ބުނެފައިވާ ގޮތުގައި މި އަހަރުގެ ފުރަތަމަ 8 މަސް ދުވަހުގެ ތެރޭގައި ސްކޭމްގެ މައްސަލަތަކުގައި ގެއްލުނު 2.2 މިލިއަން ރުފިޔާ ހޯދާފައިވާ ކަމުގަ އެވެ.
މިދިޔަ އަހަރު އެފަދަ 1،661 މައްސަލައެއް ރިޕޯޓުކުރިއިރު، އެފަދަ މައްސަލަތަކުގައި 20 މިލިއަން ރުފިޔާ ގެއްލިފައިވާކަން ވެސް ފުލުހުން ފާހަގަކޮށްފައިވެ އެވެ.
