ކުޑަކުދިންގެ ރައްކާތެރިކަން ކުރިއަރުވަން ޔުނިސެފާ އެކު މަސައްކަތް ކުރާނަން: ނައިބު ރައީސް
ކުޑަކުދިންގެ ލާބަ އާއި ރައްކާތެރިކަން ކުރިއެރުވުމަށް ކުރިއަށް އޮތްތަނުގައި ކުރިއަށްގެންދާ ހަރަކާތްތަކުގައި ޔުނައިޓެޑް ނޭޝަންސް ޗިލްޑްރަންސް ފަންޑް (ޔުނިސެފް) އާ ގުޅިގެން މަސައްކަތް ކުރާނެ ކަމަށް ނައިބު ރައީސް ހުސައިން މުހައްމަދު ލަތީފް ވިދާޅުވެއްޖެ އެވެ.
ނައިބު ރައީސް އެހެން ވިދާޅުވެފައި ވަނީ ޔުނިސެފްގެ އެސިސްޓެންޓް ސެކްރެޓަރީ ޖެނެރަލް އަދި ޑެޕިއުޓީ އެގްޒެކެޓިވް ޑިރެކްޓަރު، މެނޭޖްމަންޓް، ހަނާން ސުލައިމާނާ އެކު ކުރެއްވި މަޝްވަރާތަކުގެ ތެރެއިންނެވެ.
ރައީސް އޮފީހުގައި ބުރާސްފަތި ދުވަހުގެ ހެނދުނު ބޭއްވި ބައްދަލުކުރެއްވުމުގައި ނައިބު ރައީސް ވަނީ ޔުނިސެފުން ރާއްޖެއަށް ދެމުން ގެންދާ އެއްބާރުލުމާއި އެހީތެރި ކަމަށް ޝުކުރު އަދާކުރައްވާފަ އެވެ. އަދި އިޖުތިމާއީ ކައުންސިލުގެ މުގައްރިރުގެ ހައިސިއްޔަތުން، ކުޑަކުދިންގެ ލާބަ އާއި ރައްކާތެރިކަން ކުރިއެރުވުމަށް ކުރިއަށް އޮތްތަނުގައި ކުރިއަށްގެންދާ ހަރަކާތްތަކުގައި ޔުނިސެފާ ގުޅިގެން މަސައްކަތް ކުރައްވާނެކަމުގެ ޔަގީންކަން ދެއްވި އެވެ.
އެ ބައްދަލުވުމުގައި ޔުނިސެފްގެ އެސިސްޓެންޓް ސެކްރެޓަރީ ޖެނެރަލް ވިދާޅުވީ ތައުލީމާއި ސިއްހީ ހިދުމަތާއި ކުޑަކުދިންގެ ހައްގުތައް ހިމާޔަތް ކުރުމުގައި ރާއްޖެއިން ފާހަގަކޮށްލެވޭ ކުރިއެރުންތަކެއް ހޯދާފައިވާ ކަމަށެވެ. ރާއްޖޭގެ އާބާދީގެ ގާތްގަނޑަކަށް ސައްތައިންސައްތަ މީހުންނަކީ ލިޔަންކިޔަން ދަންނަ ބައެއްކަން ފާހަގަކުރައްވައި އެކަމަނާ ވަނީ ވަރަށް ބޮޑަށް ތައުރީފު ކުރައްވާފަ އެވެ.
އޭގެ އިތުރުން މި ސަރުކާރުގެ 20 އަހަރުގެ ގައުމީ ތަރައްގީގެ މާސްޓަ ޕްލޭނަށް ތާއީދުކުރައްވާ ކަމަށް ވިދާޅުވެ، މޫސުމަށް އަންނަ ނޭދެވޭ ބަދަލުތަކުގެ މައްސަލަ އާއި ކުޑަކުދިންގެ ހައްގުތައް ނިގުޅައިގަތުމާ ގުޅުންހުރި މަޝްވަރާތަކުގައި ކުޑަކުދިން ބައިވެރިކުރުމުގެ މުހިންމުކަމުގެ މައްޗަށް ވެސް އެކަމަނާގެ ވާހަކައިގައި އަލިއަޅުއްވާލެއްވި އެވެ.
