އިޒްރޭލު ހުއްޓުވަން ހުރިހާ ބާރެއް ބޭނުންކުރަން ޖެހޭ: ރައީސް
އިޒްރޭލުން ފަަލަސްތީނުގައި ހިންގަމުން އަންނަ ޖަރީމާތަކުގައި ޒިންމާވާން ޖެހޭ ފަރާތްތައް ޖަވާބުދާރީ ކުރުވުމަށް ބައިނަލްއަގުވާމީ މުޖުތަމައު އެއްބައިވެ، އެ ގައުމެއްގެ ސިޔާސީ ވިސްނުމާއި އިގުތިސޯދީ ބާރުގެ އެކަމުގައި ހިފަން ރައީސް ޑރ. މުހައްމަދު މުއިއްޒު ގޮވާލައްވައިފި އެވެ.
ރައީސް އެހެން ވިދާޅުވީ ފަލަސްތީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަގުވާމީ ދުވަހުގެ މުނާސަބަތާ ގުޅުވައި "އެކްސް" ގައި މިއަދު ކުރެއްވި ޕޯސްޓެއްގަ އެވެ.
ފަލަސްތީނުން މިނިވަންކަން ހޯދުމަށް ކުރަމުންދާ ބުރަ މަސައްކަތަކީ ރާއްޖެއަށް ވެސް ލިބޭ ބުރައެއްކަން ފާހަގަކުރައްވާ ރައީސް ވިދާޅުވީ، ފަލަސްތީނުގެ ހައްގުގައި ރާއްޖެއިން ދޭ އެއްބާރުލުމަކީ، މި ގައުމުގެ އެންމެހާ ރައްޔިތުންގެ ނަމުގައި ދޭ އެއްބާރުލުމެއް ކަމަށެވެ.
އިޒްރޭލަށް ހަތިޔާރު ވިއްކުން މި ހިނދުން މި ހިނދަށް ހުއްޓާލުމަށާއި ހަނގުރާމައިގެ ޖަރީމާތަކުގައި ޒިންމާވާން ޖެހޭ ފަރާތްތައް ޖަވާބުދާރީ ކުރުވުމަށް، ބައިނަލްއަގުވާމީ މުޖުތަމައު އެއްބައިވުމަށް ރައީސް ގޮވާލެއްވި އެވެ.
"އިޒްރޭލުން ފަލަސްތީނުގައި ހިންގަމުންދާ ހަނގުރާމައިގެ ޖަރީމާތަކާއި ޖަރީމާތައް ހިންގުމުގައި ޒިންމާވާ ފަރާތްތައް ޖަވާބުދާރީ ކުރުވަން ބައިނަލްއަގުވާމީ މުޖުތަމައު އެއްބައިވެ، ގައުމުތަކުގެ ސިޔާސީ އަދި އިގުތިސޯދީ ބާރުގެ ބޭނުން ކުރުމަށް އަޅުގަނޑު ގޮވާލަން،" ރައީސް ވިދާޅުވި އެވެ.
ފަލަސްތީނުގެ ރައްޔިތުން ބަރުދާސްތު ކުރަމުންދާ ބޭއިންސާފާއި އަނިޔާވެރިކަމާ އަދި ދިރިއުޅެމުން ގެންދާ ހިތްދަތިކަމުގެ ހަނދާންތައް އާކޮށްދޭ ކޮންމެ ދުވަހަކީ ފަލަސްތީނުގެ ރައްޔިތުންނާ އެކު ދެމިތިބުމުގެ އަޒުމް އާކޮށްދޭ ކަމެއްކަން އެމަނިކުފާނު ފާހަގަކުރެއްވި އެވެ. އަދި އެ އަޒުމް ވަރުގަދަ ވެގެންދާ ކަމަށާއި، އެ ރައްޔިތުންނާ މެދު ބޭއިންސާފުން ހިންގާ ކަންކަމަކީ ތާރީހުގައި ޖެހިފައިވާ ލައްގަނޑެއް ކަމަށް ސިފަކުރެއްވި އެވެ.
ފަލަސްތީނުގެ ރެފިއުޖީންގެ ހައްގުގައި އދ. ގެ ރިލީފް އެންޑް ވޯކްސް އެޖެންސީ (ޔޫއެންއާރުޑަބްލިއުއޭ) އިން އަދާކުރަމުންދާ މުހިންމު ދައުރަށް 75 އަހަރަށް ވުރެ ގިނަ ދުވަސްވެފައިވާ ކަމަށް ވިދާޅުވި އެވެ. އަދި އެދިވަޑައިގެންނެވީ އެ އެޖެންސީން ކުރަމުން އަންނަ ހައްސާސް މަސައްކަތްތަކަށް ހުރިހާ ގައުމުތަކުން ވެސް އެއްބާރުލުން ދިނުމަށެވެ.
އިތުރަށް ވިދާޅުވީ ފަލަސްތީނުގެ ރައްޔިތުން ކުރަމުންދާ ޖިހާދަކީ ދިވެހިންގެ އަމިއްލަ ކަމެއްގެ ގޮތުގައި ގަބޫލުކޮށް، ބަލައިގަންނަ ކަމަކީ ދެބަސްވެވެން ނެތް ކަމެއް ކަމަށެވެ.
އަދި ފަލަސްތީނުގެ ރައްޔިތުންނަށް އަދުލުއިންސާފާއި މިނިވަންކަން ހޯދައިދިނުމަށް ކުރާ މަސައްކަތުގައި ދުނިޔޭގެ ކުރިމަތީގައި ސާބިތުކަމާ އެކު އަޑުއުފުލުމުގައި ފަހަތަށް ނުޖެހި، ދިވެހީން ދެމިތިބޭނެކަމުގެ ޔަގީންކަން އާކުރެއްވި އެވެ.
