ބައިނަލްއަގުވާމީ ކޯޓުތަކުގެ އަމުރުތައް ތަންފީޒުކުރާނަން: އިހްސާން
ރާއްޖޭގެ ސިޔާސަތު ބަދަލުނުވާ ކަމަށާއި ވަކި މީހަކު އިސްތިސްނާނުކޮށް ބައިނަލްއަގުވާމީ ކޯޓުތަކުގެ އަމުރުތައް ތަންފީޒުކުރާނެ ކަމަށް ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން ވިދާޅުވެއްޖެ އެވެ.
ރާއްޖެއެމްވީ އިން ޝާއިއުކުރި ހަބަރަކަށް ރައްދުދެއްވައި "އެކްސް" ގައި ރޭ ކުރެއްވި ޕޯސްޓެއްގައި އިހްސާން ވިދާޅުވީ ރާއްޖެއަކީ ބައިނަލްއަގުވާމީ ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ތަންފީޒުކުރާނެ ގައުމެއް ކަމަށެވެ. ސޯޝަލް މީޑިއާގައި ބައެއް މީހުން ވަނީ އިންޓަނޭޝަނަލް ކްރިމިނަލް ކޯޓު (އައިސީސީ) އިން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރަން އަމުރު ނެރެފައިވާއިރު އޭނާ ރާއްޖެ އައިސްފި ނަމަ ހައްޔަރުކުރާނެތޯ ސުވާލުކޮށްފަ އެވެ.
އެކަމާ ގުޅޭގޮތުން ބައެއް ނޫސްތަކަށް މައުލޫމާތު ދެއްވަމުން އިހްސާން ވިދާޅުވެފައި ވަނީ ނަތަންޔާހޫ ރާއްޖެ އަތުވެއްޖެ ނަމަ ހައްޔަރުކުރާނެ ކަމަށެވެ.
އިހްސާންގެ ޕޯސްޓުގައި ރާއްޖެއެމްވީގެ ހަބަރަށް އިޝާރަތްކޮށް ވިދާޅުވެފައި ވަނީ އެ ނޫހަށް "އެކްސްގައި އެކަކު އަނެކަކާ ކުރާ ސުވާލުތަކުގެ ހިސާބު ބެލެހެއްޓުމުގެ ދާއިރާއިން" ހިތްވަރުދިނުމުގެ އިނާމުދޭން ފެނިވަޑައިގަންނަވާ ކަމަށެވެ. އެހެންނަމަވެސް، އޭނާ ވަނީ އެ ޕޯސްޓް ޑިލީޓްކުރައްވާފަ އެވެ.
މިއަދު "އެކްސް" ގައި ކުރެއްވި ޕޯސްޓެއްގައި އިހްސާން ވިދާޅުވީ ބައިނަލްއަގުވާމީ ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ރާއްޖެއިން ތަންފީޒުކުރާނެ ކަމަށެވެ. ރޭގައި އޭނާ ފާހަގަކުރެއްވެވީ އެ ވާހަކަ ކަމަށެވެ.
ބައެއް ނޫސްތަކުން ގުޅުމުން އެ ވާހަކަ ތަކުރާރުކޮށްފައިވާނެ ކަމަށާ އަދި އިތުރު ސުވާލުތަކަށް ޖަވާބު ވެސް ދީފައިވާނެ ކަމަށް ވިދާޅުވި އެވެ.
މިނިސްޓަރު ވިދާޅުވި ގޮތުގައި ބުރާސްފަތި ދުވަހުގެ ރޭ "އެކްސް" ގައި ކުރެއްވި ޕޯސްޓް ޑިލީޓް ކުރެއްވީ ހެޔޮއެދޭ ބައެއް ބޭފުޅުން އެ ޕޯސްޓުގައި މީޑިއާއަކަށް ނިސްބަތްކޮށް ވިދާޅުވި ވާހަކައަކީ ރަސްމީ ހައިސިއްޔަތުން ވިދާޅުވާން އެންމެ ރަނގަޅު ވާހަކައެއް ކަމަށް ނުދެކޭ ކަމަށް ފާހަގަކުރެއްވުމުން ކަމުގަ އެވެ.
"އެއްވެސް ހާލެއްގަ ޕޯސްޓުގައިވާ ސްޓޭޓްމަންޓް އަދި ރާއްޖޭގެ ސިޔާސަތު ބަދަލުވުމަކުންނެއް ނޫން. މިކަން މީސްމީޑިއާގައި މީހުންނަށް އޮޅޭގޮތަށް ފަތުރަމުންދާތީ ސާފުކޮށްދެން،" އިހްސާން ވިދާޅުވި އެވެ.
އައިސީސީން ވަނީ ނަތަންޔާހޫގެ އިތުރުން އިޒްރޭލުގެ ކުރީގެ ޑިފެންސް މިނިސްޓަރު ޔޯވް ގަލަންޓް އަދި ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރު ކުރުމަށް އަމުރު ނެރެފަ އެވެ. އެފަދަ އަމުރެއް ނެރެދިނުމަށް އައިސީސީގެ ޕްރޮސެކިއުޓަ ކަރީމް ހާން އެދިފައި ވަނީ މިދިޔަ މެއި މަހުގަ އެވެ. އެހެންނަމަވެސް ނަތަންޔާހޫ ވަނީ މި މަހުގެ ކުރީކޮޅު ގަލަންޓް ޑިފެންސް މިނިސްޓަރުކަމުން ވަކިކޮށްފަ އެވެ.
އައިސީސީގައި 124 ގައުމެއް ހިމެނޭއިރު، އެ ކޯޓުގެ އަމުރެއް ރައްދުވާ މީހަކު އެއިން ގައުމަކަށް ހިނގައްޖެ ނަމަ ހައްޔަރުކުރަން ޖެހެ އެވެ. ނަމަވެސް އެފަދަ އަމުރުތައް ތަންފީޒު ކުރުމުގެ ބާރު އައިސީސީއަށް ލިބިދީފައެއް ނުވެ އެވެ.
