ގައުމިއްޔަތުގެ އިސްވަރުގެ ފުރަތަމަ މަހާސިންތާ މާދަމާ ބާއްވަނީ
ދިވެހި ގައުމިއްޔަތުގެ އިސްވަރުގެ ފުރަތަމަ މަހާސިންތާ މާދަމާ ބާއްވަން ނިންމާފައިވާ ކަމަށް ދިވެހި ލެންގުއޭޖް، ކަލްޗާ އެންޑް ހެރިޓޭޖް މިނިސްޓްރީން ބުނެފި އެވެ.
"ކަޅުއޮށްފުންމި، ދިވެހި ގައުމިއްޔަތުގެ ދަރުބާރު" ގެ ނަމުގައި ކުރިއަށްގެންދާ މި މަހާސިންތާ ބޭއްވުމަށް ހަމަޖެހިފައިވަނީ ދިވެހިރާއްޖޭގެ އިސްލާމީ ޔުނިވާސިޓީގަ އެވެ. މާދަމާ ހެނދުނު 9:00 ގައި ފަށާ މަހާސިންތާ ފެށުމުގެ ރަސްމިއްޔާތު ޝަރަފުވެރި ކޮށްދެއްވާނީ ނައިބު ރައީސް ހުސައިން މުހައްމަދު ލަތީފެވެ.
ހެރިޓޭޖް މިނިސްޓްރީން ބުނީ މި މަހާސިންތާއަކީ ދިވެހި ގައުމިއްޔަތުގެ އިސްވަރުގެ ފަރާތުން ކޮންމެ ހުޅަނގު މޫސުމަކާއި އިރުވައި މޫސުމެއްގައި ބޭއްވުމަށް ހަމަޖެހިފައިވާ މަހާސިންތާތަކުގެ ފުރަތަމަ މަހާސިންތާ އެވެ. މިއީ ދިވެހި ގައުމިއްޔަތުގެ އިސްވަރުގެ މަސްއޫލިއްޔަތުތަކާއި ޒިންމާތަކުގެ ތެރޭގައި ހިމެނޭ ދިވެހި ގައުމިއްޔަތުގެ އިލްމު ފެތުރުމުގެ ޒިންމާގެ ދަށުން ބާއްވާ އިލްމީ މަހާސިންތާއެކެވެ.
މަހާސިންތާގެ މަގުސަދަކީ، ދިވެހިވަންތަކަމުގެ ދާއިރާގައި ހަރަކާތްތެރިވާ ބައިވެރީންގެ މެދުގައި ވިސްނުމާއި އިލްމު ހިއްސާކުރުމުގެ މަންސައެއްގެ ގޮތުގައި ދާއިމުވެ އޮތުމެވެ. އަދި ދިވެހީންގެ ރަށްވެހިކަމާއި ވަޒަންވެރިކަމާއި ކަނޑުވެރިކަމަށް މަގުފަހިވާނޭ ވިސްނުމާއި އިލްމުތައް ރާއްޖެއަށް ވެހިކުރުމަށް ހިތްވަރުދީ ކުރިއެރުވުން ހިމެނޭ ކަމަށް ހެރިޓޭޖް މިނިސްޓްރީން ބުންޏެވެ.
އެގޮތުން މާދަމާ ބާއްވާ މަހާސިންތާއަކީ މި އަހަރުގެ ހުޅަނގު މޫސުމުގެ ދޮށަ ނަކަތުގެ، އިލްމީ ދަރުބާރެވެ. ދަރުބާރު ކުރިއަށް ގެންދަން ހަމަޖެހިފައިވަނީ ތިން ދަންފަޅިއަކަށް ބަހާލައިގެންނެވެ. އެކި ދާއިރާތަކުގެ އިލްމީ ތަޖުރިބާކާރުން ދަރުބާރުގައި ބައިވެރިވެވަޑައިގެންނެވުމަށް ވަނީ ހަމަޖެހިފަ އެވެ.
ރާއްޖޭގެ އިސްލާމީ ޔުނިވާސިޓީ އާއި ހެރިޓޭޖް މިނިސްޓްރީ ގުޅިގެން ކުރިއަށް ގެންދާ މި މަހާސިންތާގައި، އެކި ދާއިރާތަކުގެ ތަޖުރިބާކާރު ބޭފުޅުން ތަފާތު 9 އިލްމީ ކަރުދާހެއް ހުށަހަޅުއްވާނެ އެވެ. އޭގެ ތެރޭގައި ރާއްޖެއަށް އިސްލާމްދީން ތައާރަފުވުމާއި ތަރައްގީވެގެން އައި ގޮތާ ބެހޭ ދިރާސާތަކާއި ދިވެހިބަހާއި ސަގާފަތް އަދި އިހުގެ އިސްލާމީ ފަރުމާތަކާ ބެހޭ ދިރާސީ ހުށަހެޅުންތައް ހިމެނެ އެވެ.
އެ މިނިސްޓްރީން ބުނީ ރާއްޖެ އުފެދިފައިވާ ގޮތުގެ އިލްމީ ކަރުދާސްތައް މަހާސިންތާގެ ބައިވެރިންނަށް ހިއްސާކޮށްފައިވާ ކަމަށެވެ.
ދިވެހި ގައުމިއްޔަތުގެ އިސްވަރު އިފްތިތާހުކޮށްދެއްވާފައި ވަނީ މި އަަހަރުގެ ގައުމީ ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒެވެ. އިސްވަރުގެ އޮފީސް ރަސްމީކޮށް ހުޅުވާފައި ވަނީ މި މަހުގެ 17 ވަނަ ދުވަހު އެވެ.
