އެމްއެންޔޫ މެރެތަން ފެބްރުއަރީގައި، އެންމެ މޮޅު ހަ ދުވުންތެރިޔަކަށް 10،000 ރުފިޔާ!
މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) ގެ 51 ވަނަ އަހަރީ ދުވަސް ފާހަގަކުރުމުގެ ގޮތުން އަންނަ ފެބްރުއަރީ މަހު "އެމްއެންޔޫ މެރެތަން" ގެ ނަމުގައި ދުވުމުގެ މުބާރާތެއް ބާއްވަން ނިންމައިފި އެވެ.
ކޮންމެ އަހަރަކު ވެސް މެރެތަން ކުރިއަށް ގެންދިއުމަށް ނިންމާ، އެމްއެންޔޫން ބުނީ، އެ މުބާރާތް ބާއްވަނީ ދުޅަހެޔޮ ސިއްހަތެއްގައި ދިރިއުޅުން ބައްޓަންކުރުމަށް ޔުނިވާސިޓީގެ ދަރިވަރުންނާއި މުވައްޒަަފުން އަދި އާންމުންނަށް ހިތްވަރު ދިނުމުގެ މަގުސަދުގައި ކަމަށެވެ.
އެމްއެންޔޫ މެރެތަންގެ ފުރަތަމަ މެރެތަން ބޭއްވުމަށް ހަމަޖެހިފައިވަނީ އަންނަ ފެބްރުއަރީ މަހުގެ 20 ވަނަ ދުވަހާއި 21 ވަނަ ދުވަހު އެވެ. މެރެތަން ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ސެންޓްރަލް ޕާކު ސަރަހައްދުގަ އެވެ.
ފެބްރުއަރީ 20 ވަނަ ދުވަހު ހަވީރު 5:00 ޖަހާއިރު މެރެތަން ފެށުމަށް ހަމަޖެހިފައިވާއިރު، ފުރަތަމަ ކުރިއަށް ގެންދިއުމަށް ނިންމާފައިވަނީ ކުޑަކުދިންނަށް ހާއްސަ ހަރަކާތެކެވެ. އެއީ "ކިޑްސް ޑޭޝް" ގެ ނަމުގައި އުމުރުން 7-4 އަހަރުގެ ކުދިންނަށް ބާއްވާ 2 ކިލޯމީޓަރުގެ މެރެތަންއެކެވެ.
އެމްއެންޔޫ މެރެތަންގެ އެންމެ ދިގުރޭސް ބާއްވާނީ ފެބްރުއަރީ 21 ވަނަ ދުވަހުގެ މެންދަމު 2:00 ޖަހާއިރު އެވެ. އެއީ 42.2 ކިލޯމީޓަރުގެ މެރެތަންއެކެވެ. ދެން ބޭއްވުމަށް ހަމަޖެހިފައިވަނީ 21.2 ކިލޯމީޓަރުގެ ހާފް މެރެތަންއެކެވެ.
އޭގެއިތުރުން 10 ކިލޯމީޓަރާއި 5 ކިލޯމީޓަރުގެ މެރެތަންއެއް ވެސް ބޭއްވުމަށް ހަމަޖެހިފައިވެ އެވެ. އެމްއެންޔޫން ބުނީ ރޭސްތައް ކުރިއަށް ގެންދިއުމަށް ނިންމާފައިވަނީ ކަމާ ބެހޭ ފަރާތްތަކުންދޭ ހުއްދަ އާއެކު ކަނޑައަޅާ 5 ކިލޯމީޓަރުގެ ލޫޕެއްގައި ކަމަށެވެ.
މެރެތަންގައި ބައިވެރިވާ ފަރާތްތަކުން، ބައިވެރިވުމަށް އެދި ހުށަހެޅުމަށް އެދިފައިވަނީ އެމްއެންޔޫން ހިއްސާކޮށްފައިވާ ލިންކެއް މެދުވެރިކޮށެވެ. މެރެތަންގައި ބައިވެރިވާ ފަރާތްތަކަށް ޓީޝާޓާއި ރޭސް ބިބް ލިބިގެންދާނެ އެވެ.
ރޭސްކިޓް ދޫކުރުމުގެ އެކްސްޕޯ އޮންނާނީ ފެބްރުއަރީ 15 ވަނަ ދުވަހުން ފެށިގެން ފެބްރުއަރީ 19 ވަނަ ދުވަހުގެ ނިޔަލަށެވެ. އެ އެކްސްޕޯ އޮންނާނީ އެ މުއްދަތުގައި ކޮންމެ ދުވަހަކު ހަވީރު 4:00 އިން ރޭގަނޑު 8:00 އަށް އެމްއެންޔޫ ހޮސްޕިޓާލިޓީ އެންޑް ޓޫރިޒަމް ސްޓަޑީޒް ފެކަލްޓީގަ އެވެ.
އެމްއެންޔޫން ވަނީ މެރެތަންތަކުގައި ބައިވެރިވެ، ކާމިޔާބު ހޯދާ ފަރާތްތަކަށް ފައިސާގެ އިނާމު ހުށަހަޅާފަ އެވެ. އެގޮތުން ރޭހުގެ އެންމެ މޮޅު ތިން ފިރިހެން އަދި ތިން އަންހެން ދުވުންތެރިންނަށް 10،000 ރުފިޔާގެ އިނާމު ލިބޭނެ ކަމަށް އެ ޔުނިވާސިޓީން ބުނެފައިވެ އެވެ.
އަދި ހާފް މެރެތަން ރޭހުން އެންމެ މޮޅު ތިން ފިރިހެން އަދި ތިން އަންހެން ދުވުންތެރިންނަށް 7،500 ރުފިޔާގެ އިނާމު ދޭނެ އެވެ. ދިހަ ކިލޯމީޓަރުގެ ރޭހުން އެންމެ މޮޅު ތިން ފިރިހެން އަދި ތިން އަންހެން ދުވުންތެރިންނަށް 5،000 ރުފިޔާގެ އިނާމު ލިބިގެންދާނެ އެވެ. އޭގެ އިތުރުން 5 ކިލޯމީޓަރުގެ ރޭހުން އެންމެ މޮޅު ތިން ފިރިހެން އަދި ތިން އަންހެން ދުވުންތެރިންނަށް 3،000 ރުފިޔާ ދިނުމަށް ވެސް ވަނީ ހަމަޖައްސާފަ އެވެ.
