އެސްއޯއީތަކުން ގެސްޓު ހައުސް ހެދުމުގެ ނަތީއްޖާ ރަނގަޅެއް ނުވާނެ: ޒަމީރު
ސަރުކާރު ހިއްސާވާ ކުންފުނިތައް ނުވަތަ ސްޓޭޓް އޯން އޯންޑް އެންޓަޕްރައިޒެސް (އެސްއޯއީ) ތަކުން ގެސްޓްހައުސްއާއި ރިޒޯޓް ހަދައި، ވިޔަފާރި ކުރަން ފެށުމުން އޭގެ ނަތީޖާ ރަނގަޅެއް ނުވާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
ރައްޔިތުން މަޖިލީހުގެ މިއަދުގެ ޖަލްސާއަށް ހާޒިރުވެވަޑައިގެން މެމްބަރުން ކުރިމަތި ކުރެއްވި ސުވާލުތަކަށް ޒަމީރު ޖަވާބު ދެއްވާފައިވެ އެވެ. މިނިސްޓަރާ ސުވާލުކުރުމުގެ ފުރުސަތުގައި ވެލިދޫ ދާއިރާގެ މެމްބަރު މުހައްމަދު އައްބާސް ވަނީ ހައްޖު ކޯޕަރޭޝަނުން ގެސްޓްހައުސް އެޅުމާއި ގުޅޭ ގޮތުން ސުވާލު ކުރައްވާފަ އެވެ.
ހައްޖު ކޯޕަރޭޝަނުން ވަނީ ކ. މާފުށި ކައުންސިލްގެ ކުންފުންޏާ ގުޅިގެން އުފައްދާ ސަބްސިޑަރީ ކުންފުންޏަކުން އެ ރަށުގައި ސިޓީ ހޮޓަލެއް އަޅައި، "ހަލާލް ޓޫރިޒަމް" ތައާރަފް ކުރަން ނިންމާފަ އެވެ. ސިޓީ ހޮޓާ އެޅުމަށް މާފުށިން ބިން ވެސް ހަމަޖެހިފައިވާ ކަމަށް އެ ކޯޕަރޭޝަނުން ބުނެފައިވެ އެވެ.
މެމްބަރުގެ ސުވާލަށް ޖަވާބު ދެއްވަމުން ޒަމީރު ވިދާޅުވީ، ހައްޖު ކޯޕަރޭޝަނުން ގެސްޓް ހައުސް ހިންގުމުގެ މަސައްކަތް ކުރުން އެއީ ފައިދާހުރި ގޮތެއްތޯ ބެލުމަށް އެ ކޯޕަރޭޝަނުގެ ބޯޑާއި ހިއްސާދާރުން ވިސްނަން ޖެހޭ ކަމަށެވެ.
"ހުރިހާ ކުންފުނިތަކުން، އެޗްޑީސީއާއި، ހައްޖު ކޯޕަރޭޝަނާއި، ފެނަކައާއި އެންމެން ވެގެން ގެސްޓްހައުސްއާ ރިޒޯޓް ހެދީމަ އަޅުގަނޑަށް ހީވަނީ އޭގެ ނަތީޖާ ރަނގަޅެއް ނުވާނެހެން،" މިނިސްޓަރު ވިދާޅުވި އެވެ.
އެ ކޯޕަރޭޝަނުން ހަވާލުވަނީ ފަންޑް ލިބުމުން، އެ ފަންޑު މެނޭޖްކޮށް، އެއިން މީހުން ހައްޖަށް ފޮނުވުންކަން މިނިސްޓަރު ފާހަގަ ކުރެއްވި އެވެ. އަދި ވިދާޅުވީ، ނަތީޖާ ރަނގަޅުވާނީ، ކުންފުނީގައި އެކްސެސް ފަންޑު ހުރެއްޖެނަމަ އެކަމުގެ ސްޕެޝަލިސްޓުންނާ ހަވާލުކޮށްގެން ފަންޑު މެނޭޖްކޮށްގެން އޭގެ ފައިދާ ކުންފުންޏަށް ހޯދުމުން ކަމަށެވެ.
ހައްޖު ކޯޕަރޭޝަނަކީ ފައިދާވާ ކުންފުންޏަކަށް ހެދުމަށް އެ ކުންފުނިން އަންނަނީ ރިއަލް އެސްޓޭޓް ދާއިރާއަށް އިންވެސްޓް ކުރުމުގެ މަސައްކަތް ކުރަމުންނެވެ. މާފުށީގައި ސިޓީހޮޓާ ތަރައްގީ ކުރުމުގެ މަސައްކަތުގެ އިތުރުން، ހުޅުމާލޭގައި ލަގްޒަރީ އެޕާޓްމެންޓް އަޅައިގެން ވިއްކުމަށް ވެސް އެ ކުންފުނިން ވަނީ ނިންމާފަ އެވެ.
Ads by STO
