ހުޅުމާލެ މުނިސިޕަލް ހިދުމަތާ ސިޓީ ކައުންސިލުން ހަވާލު ނުވަނީ މާލީ ތަނަވަސްކަން ނެތުމުން: ފަޒުލް
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދެމުން އަންނަ މުނިސިޕަލް ހިދުމަތްތައް މާލެ ސިޓީ ކައުންސިލުގެ ދަށަށް ބަދަލު ނުކުރެވި ދިގުލައިގެން ދަނީ ސިޓީ ކައުންސިލުގައި އެކަން ކުރުމަށް ބޭނުންވާ ވަސީލަތްތަކާއި މާލީ ތަނަވަސްކަން ނެތުމުގެ ސަބަބުން ކަމަށް އެ ކޯޕަރޭޝަނުގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ.
މާލެ ސިޓީގެ ހުރިހާ މުނިސިޕަލް ހިދުމަތްތަކެއް ސިޓީ ކައުންސިލުގެ ދަށަށް ބަދަލުކުރެއްވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީގެ މިއަދުގެ ބައްދަލުވުމުގައި ކެލާ ދާއިރާގެ ކޮންގްރެސް ޕާޓީގެ މެމްބަރު އަބްދުﷲ ޝަރީފް ކުރެއްވި ސުވާލަކަށް ޖަވާބު ދެއްވަމުން ފަޒުލް ވިދާޅުވީ ސަރުކާރުގެ އަމާޒަށް ވާސިލުވުމަށް ކުރަން ޖެހޭ ހުރިހާ ކަމެއް ނިންމާ އެކަމަށް އެޗްޑީސީން ތައްޔާރަށް ތިބި ކަމަށެވެ. މާލެ ސިޓީ ކައުންސިލުން މާދަމާ ވިޔަސް އެ މަސައްކަތަށް އެދި ހުށަހަޅައިފި ނަމަ އެކަން ކުރާނެ ކަމަށެވެ.
"އެކަމަކު ހަވާލުކުރެވެން އަންނާނީ އަޅުގަނޑުމެންގެ ކޮމާޝަލް ޔުނިޓްސްތައް ނަގާފައި، ދެން ހުރި އޭރިއާތައް. މުނިސިޕަލް ހިދުމަތް ދޭން ބޭނުންވާ ކަމުގައި ވަންޏާމު، އެ ފަރާތްތަކާ ހަވާލުވުމުގެ ފުރުސަތު އެބައޮތް،" ފަޒުލް ވިދާޅުވި އެވެ.
އެޗްޑީސީގެ މެނޭޖިން ޑިރެކްޓަރު ވިދާޅުވި ގޮތުގައި އިއްޔެ މާލެ ސިޓީގެ މޭޔަރާ އަދި ޑެޕިއުޓީ މޭޔަރާ އެކު ބައްދަލުވުމެއް ބޭއްވުނު ކަމުގަ އެވެ. އެ ބޭފުޅުންގެ މައިގަނޑު ކަންބޮޑުވުމަކީ އެޗްޑީސީން ސިޓީ ކައުންސިލަށް ހިދުމަތްދިނުން ބަދަލުވާއިރު، މުޅި އޮޕަރޭޝަނަށް އަންނަ "ފައިނޭންޝަލް ބާޑެން" ކަމުގަ އެވެ.
އެޗްޑީސީން މުނިސިޕަލް ހިދުމަތް ދެމުން އަންނަނީ އެ ކޯޕަރޭޝަނުގެ ގިނަ އަދަދެއްގެ މުވައްޒަފުންގެ އެ މަސައްކަތުގެ ތެރޭގައި ބައިވެރިކުރުވައިގެން ކަމުގައި ފާހަގަކުރެއްވި އެވެ.
"މީގައި މި އޮތް އުދަނގުލަކީ ނުވަތަ ހުރަހަކަށް އަޅުގަނޑު ގަބޫލުކުރަނީ ސިޓީ ކައުންސިލަށް މީގެ ފައިނޭންޝަލް ރިސޯސަސް. މީއޭ ހަމައެކަނި މިކަން ބަދަލު ނުވެ އޮތް އުޒުރަކަށް މިވަނީ،" ފަޒުލް ވިދާޅުވި އެވެ.
ފަޒުލް ވިދާޅުވީ ސިޓީ ކައުންސިލުން ވެސް ތިބީ މުނިސިޕަލް ހިދުމަތް ދިނުމާ ހަވާލުވުމަށް ކަމަށެވެ. އެހެންނަމަވެސް މާލީ ގޮތުން ހަމަޖައްސަން ޖެހޭ ކަންތައްތައް އަދި ހަމަޖެހިފައިނުވާތީ، އެ މަސައްކަތް މަޑުޖައްސާލައިގެން ތިބި ކަމުގެ މައުލޫމާތުދީފައިވާ ކަމަށް ވިދާޅުވި އެވެ.
މިދިޔަ ޖެނުއަރީ މަހު އެޗްޑީސީން ފޯރުކޮށްދޭ ރަށްވެހިކަމުގެ ހިދުމަތްތައް މާލެ ސިޓީ ކައުންސިލުގެ ދަށަށް ބަދަލުކުރަން ފިނޭންސް މިނިސްޓްރީ އާއި އެޗްޑީސީ އަދި ސިޓީ ކައުންސިލާ ދެމެދު އެމްއޯޔޫއެއްގައި ސޮއިކުރި އެވެ. އެހެންނަމަވެސް މިހާތަނަށް އައިއިރު އެކަން ކޮށްފައެއް ނުވެ އެވެ.
Ads by STO
