ކުރީގެ ރައީސް އަމީނަށް ހެދި ގޮތް ރައީސަށް ހަދާނެ ކަމަށް ބުނި މައްސަލަ ބަލަނީ
ރާއްޖޭގެ ފުރަތަމަ ރައީސް މުހައްމަދު އަމީން ދީދީއަށް ރައްޔިތުން ހެދި ގޮތް ރައީސް ޑރ މުހައްމަދު މުއިއްޒަށްވެސް ހަދަން ޖެހިދާނެ ކަމަށް ބުނެ ރައީސަށް އިންޒާރުދިން މައްސަލަ އެއް ފުލުހުން ބަލަން ފަށައިފި އެވެ.
ރައީސަށް އިންޒާރުދޭ މޭރުމަކުން ވާހަކަ ދައްކާފައިވަނީ "ގާނޫނުއަސާސީގެ ދިފާއުގައި" ނަމުގައި ރޭ ކުޅުދުއްފުށީ ސިޓީގައި އިދިކޮޅު އެމްޑީޕީން ބޭއްވި ޖަލްސާއެއްގައި ވާހަކަ ދެއްކި އަބްދުއްރަހްމާން އިސްމާއިލް ކިޔާ މީހެކެވެ.
ރައީސް އަމީންގެ ވެރިކަމުގައި ރާއްޖެއަށް ދުންފަތް އެތެރެކުރުން މަނާކުރުމުން ކަން ހިނގައި ދިޔަ ގޮތުގެ ވާހަކަ ދައްކަމުން އެ މީހާ ބުނީ "އަމީން ކުޅުއްވީ ދުންފަތާ" ކަމަށެވެ. އަދި "ރައީސް މުއިއްޒު ކުޅުއްވަނީ ގާނޫނުއަސާސީއާ" ކަމަށެވެ.
"މުހައްމަދު އަމީނަށް ވީގޮތްވެސް ފެނިގެންދާނެ ދިވެހިރާއްޖޭގެ އެންމެހާ ލޮބުވެތި ރައްޔިތުންނަށް. އެހެންވީމާ ގާނޫނުއަސާސީއާ ކުޅޭ ކަމަށް ވަނީ ވިއްޔާ ފެންނާނެ ރީތި ކެއްސެއް ލިބިގެންދާނެ"
އަމީންގެ ވެރިކަމުގައި އެމަނިކުފާނު ބޭސްފަރުވާއަކަށް ކޮލަމްބޯގައި ހުންނަވަނިކޮށް ސަރުކާރުގައި އިސްކޮށް ތިބި ބަޔަކު ބަގާވަތްކޮށް, ވެރިކަން ވައްޓާލާ ނައިބު ރައީސް އިބުރާހީމް ނާސިރު ވެރިއަކަށް ހަމަޖެއްސެވި އެވެ. އަދި އަމީން ރާއްޖެވަޑައިގަތުމާއެކު ދޫނިދޫގައި ބަންދުކޮށްފައި ބެހެއްޓުމުން އެމަނިކުފާނަށް ތާއީދުކުރައްވާ ރައްޔިތުން ނާސިރު ވެރިކަމަށް ގެނައުމަށް މަސައްކަތްކުރެއްވި އެވެ.
އެ މަސައްކަތުގެ ތެރެއިން ހިނގި ހަމަޖެނުޖެހުމުގައި އަމީނަށް އަނިޔާކުރުމަށްފަހު ފަޅުގައި އޮތް ދޯންޏަކަށް އެއްލާލި އެވެ. އެމަނިކުފާނު އަވަހާރަވީ ކ. ގާފަރަށް އަރުވާލާފައި ހުއްޓާ ސިއްހީ ހާލުކޮޅު ގޯސްވެގެން ކ. ވިހަމަނާފުށްޓަށް ގެންދިޔަ ފަހުންނެވެ.
