ދުންފަތް ކޮންޓްރޯލުކުރަން އެކުލަވާލާ މާސްޓާ ޕްލޭނަށް ހިޔާލު ހޯދަނީ
ދުންފަތް ކޮންޓްރޯލް ކުރުމަށް ސަރުކާރުން އެކުލަވާލާ 5 އަހަރުގެ މާސްޓަ ޕްލޭނަށް އާންމުންގެ ހިޔާލާއި މަޝްވަރާ ބޭނުންވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވެއްޖެ އެވެ.
ނާޒިމް އެހެން އެދިވަޑައިގަތީ ހެލްތު މިނިސްޓްރީ އާއި ދައުލަތުގެ މީޑިއާ ގުޅިގެން ބޭއްވި "ދަފަރާ" ޕެނަލް ޑިސްކަޝަންގައި ވާހަކަ ދައްކަވަމުންނެވެ.
ހެލްތު މިނިސްޓްރީން ބުނީ އެ ޕެނަލް ޑިސްކަޝަންގެ މަގުސަދަކީ ދުންފަތް ކޮންޓްރޯލް ކުރުމުގެ މާސްޓަ ޕްލޭންއަށް ހިޔާލު ހޯދައި އެކަމާ ގުޅޭގޮތުން މަޝްވަރާ ކުރުން ކަމަށެވެ. މިނިސްޓަރު ވިދާޅުވީ މާސްޓަ ޕްލޭން އެކުލަވާލުމުގެ މަސައްކަތަށް ވޯލްޑް ހެލްތު އޯގަނައިޒޭޝަންގެ އެހީތެރިކަން ލިބޭ ކަމަށާއި އެ ޖަމިއްޔާގެ ޓީމެއް މިހާރު ރާއްޖެ އައިސްފައިވާ ކަމަށެވެ.
އެ ޖަމިއްޔާގެ އެހީތެރިކަން މިކަމަށް ލިބުނު ނަމަވެސް ދުންފަތް ކޮންޓްރޯލް ކުރުމުގެ މާސްޓަ ޕްލޭން އެކުލަވާލުމަކީ ރައްޔިތުންނާ ގުޅުންހުރި ކަމަކަށްވާތީ ދިވެހި ރައްޔިތުންގެ ބައިވެރިވުން މިކަމުގައި އޮތުމަކީ ސަރުކާރުން ބޭނުންވާ ކަމެއް ކަމަށް ނާޒިމް ވިދާޅުވި އެވެ. އަދި މާސްޓަ ޕްލޭން އެކުލަވާލުމުގެ ބޭނުމަކީ ދެމެހެއްޓެނެވި ގޮތެއްގައި ދުންފަތް ކޮންޓްރޯލް ކުރުމުގެ މަސައްކަތް ކުރިއަށް ގެންދިޔުން ކަމަށެވެ.
"ދުންފަތުން މުޖުތަމައު ދުރުހެލި ކުރެވިއްޖެ ނަމަ ސިއްހީ ކަންކަމަށް ކުރަން ޖެހޭ ފަރުވާގެ ހަރަދު ކުޑަވެ، ދައުލަތަށް ލިބޭ އާމްދަނީގެ ބޮޑުބައެއް ތައުލީމާއި އެހެނިހެން ކަން ކަމަށް ހަރަދު ކުރެވޭނެ،" މިނިސްޓަރު ވިދާޅުވި އެވެ.
ދުންފަތާ ދުރުހެލިވާން ބޭނުންވާ ފަރާތްތަކަށް ހާއްސަކޮށް މިހާރު ވަނީ ކްއިޓްލައިނެއް ގާއިމުކޮށްފަ އެވެ. ނަމްބަރަކީ 1676 އެވެ. އެ ނަމްބަރުން ދުންފަތަށް ދެވިހިފާފައިވާ ފަރާތްތަކުން ހުއްޓާލުމަށް ބޭނުންވާ އެހީތެރިކަން ދޭނެ އެވެ. ކްއިޓްލައިނުގެ ހިދުމަތް 24 ގަޑިއިރު ލިބޭނެ އެވެ.
ދުންފަތުގެ އިސްތިއުމާލުކުރުމުގެ މައްސަލައަށް ދާއިމީ ހައްލެއް ހޯދަން މާސްޓަޕްލޭނެއް އެކުލަވާލަން ރައީސް ޑރ. މުހައްމަދު މުއިއްޒު ނިންމަވާފައިވާކަން ރައީސް އޮފީހުން ހާމަކޮށްފައި ވަނީ މިދިޔަ އޮކްޓޫބަރު މަހުގެ 17 ވަނަ ދުވަހު އެވެ.
އެ އޮފީހުން ބުނެފައިވާ ގޮތުގައި މާސްޓަ ޕްލޭންގައި ދުންފަތާ ދުރު މުޖުތަމައެއް ބިނާކުރުމަށް އިޖުތިމާއީ ގޮތުން ހަރަކާތްތެރިވާ ފަރާތްތަކާއި ދުންފަތުގެ އިސްތިއުމާލުނުކުރާ ރަށްރަށް ފާހަގަކުރުމަށް އިނާމެއް ތައާރަފުކުރުމާ އެކު، އެ އިނާމު ލިބޭ ރަށެއްގެ އިޖުތިމާއީ ކަމަކަށް މާލީ އެހީތެރިކަން ދިނުން ފަދަ ކަންކަން ހިމެނޭ ކަމުގަ އެވެ.
