އެމްއެމްސީއަށް މެމްބަރުން އިންތިހާބުކޮށްފި
މޯލްޑިވްސް މީޑިއާ ކައުންސިލް (އެމްއެމްސީ) އަށް މެމްބަރުން އިންތިހާބުކޮށްފި އެވެ.
އެމްއެމްސީގެ 10 މެމްބަރުންގެ ދައުރު ހަމަވަނީ މި މަހުގެ 14 ވަނަ ދުވަހަށެވެ. އެހެންވެ ދައުރު ހަމަވުމުގެ ކުރިން މެމްބަރުން އިންތިހާބު ކުރުމަށް އިއްޔެ ސޯޝަލް ސެންޓަރުގައި އިންތިހާބު ކުރިއަށް ގެންދިޔަ އެވެ.
އެ އިންތިހާބުގައި ޖުމްލަ 22 ކެންޑިޑޭޓުން ވާދަކުރިއިރު، 139 މީޑިއާއަކުން ވަނީ ވޯޓުލާފަ އެވެ.
އެމްއެމްސީއަށް އިންތިހާބުވި މެމްބަރުން:
- ފާތިމަތު ޝަނާ (މިހާރު އޮންލައިން)
- ނަޖާހް މަސްއޫދު (ވަގުތު އޮންލައިން)
- ހަސަން ޝާކިރު (އާފަތިސް)
- ހަފްސީ އަބްދުﷲ (ހަފްސީ ޑޮޓްކޮމް)
- ހުސެއިން ހަސަން (ހަތާވީސް އޮންލައިން)
- ހުސެއިން ސަގީފް (ތިލަދުން އޮންލައިން)
- ނަހުދާ ފާއިޒް (ދިޔަރެސް)
އާންމުންގެ ތެރެއިން އިންތިހާބުވި މެމްބަރުންނަކީ އިބްރާހިމް ފައުޒީ އާއި ފާތިމަތު ފަހުމީ އަދި އިބްރާހިމް މުހައްމަދެވެ.
އިއްޔެ އެމްއެމްސީ މެމްބަރުންގެ ވޯޓުލުން ކުރިއަށް ގެންގޮސްފައިވަނީ އިންތިހާބަށް ވަގުތު ކުޑަތަންވެފައިވަނިކޮށް ޔޫތް އެމްޕަވަމެންޓް، އިންފޮމޭޝަން އެންޑް އާޓްސް މިނިސްޓްރީން ދާއިމީ ވޯޓާސް ލިސްޓަށް ބަދަލުތަކެއް ގެނައުމުން، އިންތިހާބުގެ ސައްހަ ކަމާ މެދު ސުވާލު އުފެދޭ ކަމަށް ބުނެ، އިންތިހާބު ފަސްކުރަން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ގޮވާލާފައިވަނިކޮށެވެ.
އެމްޖޭއޭއިން އޭރު ބުނީ އިއްޔެ ބާއްވަން ހަމަޖެހިފައިވާ އެ އިންތިހާބުގެ ބައެއް ކަންކަން ޔޫތް މިނިސްޓްރީން ކުރިއަށް ގެންދާގޮތުން އިންތިހާބާ މެދު ސުވާލު އުފެދި، ސައްހަކަން ގެއްލޭނެ އެތައް ބައިވަރު ކަންތައްތަކެއް ހިނގަމުންދާ ކަމަށް ގަބޫލު ކުރެވޭ ކަމަށެވެ.
އެމްއެމްސީއަށް އިންތިހާބުވާ މެމްބަރުންގެ ދައުރަކީ ދެ އަހަރެވެ.
