އިންޓަނެޓް މެދުވެރިކޮށް ކުރާ ކުށްތައް ގާނޫނުގައި ހިމަނަން ހުށަހެޅި ބިލް ފާސްކޮށްފި
އިންޓަނެޓް މެދުވެރިކޮށް ކުރާ ކުށްތައް ގާނޫނު އަސާސީގައި ހިމަނަން ހުށަހެޅި ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.
މަޖިލީހުގެ މިއަދުގެ ޖަލްސާގައި އެ ބިލު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 58 މެންބަރުންގެ އިއްތިފާގުންނެވެ.
ސަރުކާރުގެ ފަރާތުން މާފުށީ ދާއިރާގެ މެންބަރު ހުސައިން ރިޒާ އާދަމް ހުށަހެޅުއްވި އެ ބިުގެ ބޭނުމެއްގެ ގޮތުގައި ބުނެފައިވަނީ ސައިބާ ކްރައިމާ ގުޅުންހުރި އަމަލުތައް ކުށެއް ކަމުގައި ކަނޑައެޅުމެވެ.
ކުށްކަމުގައި ކަނޑައަޅަން ބިލުގައި ހުށަހަޅާފައިވާ ކަންކަން:
- ހުއްދަނެތި ކޮމްޕިއުޓަރުތަކަށް އެކްސެސްވުން
- އިތުރު ކުށެއް ކުރުމަށް މަގުފަހިކުރުމުގެ ނިޔަތުގައި ހުއްދަނެތި ކޮމްޕިއުޓަރުތަކަށް އެކްސެސްވުން
- ހުއްދަނެތި ކޮމްޕިއުޓަރު ޑޭޓާ އިންޓަސެޕްޓުކުރުން
- ހުއްދަނެތި ކޮމްޕިއުޓަރު ޑޭޓާއަށް އިންޓަފިއާކުރުން
- ހުއްދަނެތި ކޮންޕިއުޓާ ސިސްޓަމަކަށް އިންޓަފިއާކުރުން
- ނަހަމަގޮތުގައި ޑިވައިސްތައް ބޭނުންކުރުން
- ސައިބާ ވަޔަލެންސްގެ އަމަލުތައް
- ކޮމްޕިއުޓަރާ ގުޅުންހުރި ފޯޖަރީގެ އަމަލުތައް
- ކޮމްޕިއުޓަރާ ގުޅުންހުރި އޮޅުވާލުމުގެ އަމަލުތައް
- ކޮޕީރައިޓާ އެއާ ގުޅޭ އެހެނިހެން ހައްގުތަކަށް އަރައިގަތުމުގެ އަމަލުތައް
ނަމަވެސް ކޯޓު އަމުރެއްގެ ދަށުން ނުވަތަ ގާނޫނަކުން ބާރު ލިބިގެން ދޫކޮށްފައިވާ ހުއްދައެއްގެ ދަށުން އެ ކޯޓު އަމުރުގައި ނުވަތަ ހުއްދައިގައި ބަޔާންކުރާ ގޮތުގެ މަތިން ކޮންޕިއުޓަރަކަށް, ޕްރޮގްރާމަކަށް, ޑޭޓާއަކަށް, އެއިން އެއްޗެއްގެ ވަކި ބަޔަަކަށް އެކްސެސްވުމަކީ ކުށެއް ނޫން ކަމަށް ބުނެފައިވެ އެވެ.
އެ ބިލު މަޖިލީހުގެ ޖުޑީޝަރީ ކޮމިޓީން ދިރާސާކޮށްފައިވާއިރު އެ ކޮމިޓީން ކުރި ދިރާސާގެ މައްޗަށް އެކުލަވާލި ރިޕޯޓް, އެ ކޮމިޓީގެ މުގައްރިރު, މަނަދޫ ދާއިރާގެ މެންބަރު ހުސްނީ މުބާރިކް ހުށަހެޅުއްވި އެވެ.
ކޮމިޓީ ރިޕޯޓް ހުށަހަޅުއްވަމުން ހުސްނީ ވިދާޅުވީ އެ ބިލާ ގުޅިގެން ކޮމިޓީން އާންމުގެ ހިޔާލަށް ހުޅުވާލި ކަމަށާއި އެކަމާ ގުޅުންހުރި އިދާރާތަކުން ލިޔުމުން ހިޔާލު ހޯދަން ފޮނުވި ކަމަށެވެ. އަދި ލިބުނު ހިޔާލުތަކުގެ އަލީގައި ގުޅުންހުރި އިދާރާތަކާ މަޝްވަރާކުރެއްވި ކަމަށްވެސް ވިދާޅުވި އެވެ.
މެންބަރު ވިދާޅުވީ އެ ބިލަކީ ކޮންޕިއުޓަރު މެދުވެރިކޮށް ކުރަމުންދާ ކުށްތައް ގާނޫނުގައި ކަނޑައެޅިގެން ނެތީމާ ދިމާވާ ގޮންޖެހުންތައް ހައްލުކުރުމަށް ހުށަހެޅި ބިލެއް ކަމަށެވެ.
