އަމީންގެ ވާހަކަ ފައްޔާޒު ދެއްކީ އީސީން ނަސޭހަތް ދީފައިވަނިކޮށް
ސިޔާސީ އެއްވުންތަކުގައި ގާނޫނާ ހިލާފު ވާހަކަ ދައްކާތީ އިދިކޮޅު މައި ޕާޓީ، އެމްޑީޕީގެ ލީޑާޝިޕަށް އިލެކްޝަންސް ކޮމިޝަން (އީސީ) އިން ނަސޭހަތް ދީފި އެވެ.
އީސީގެ މެންބަރު ހަސަން ޒަކަރިއްޔާ "ދެން" އޮންލައިނަށް މިއަދު ވިދާޅުވީ އެމްޑީޕީން މި ފަހުން ބޭއްވި ޖަލްސާ/އެއްވުންތަކުގައި ގާނޫނާ ހިލާފު ވާހަކަތައް ދެއްކުމުގެ އިތުުރުން މާރާމާރީއަށް ހިތްވަރުދޭ ގޮތަށް ވާހަކަ ދައްކާފައިވާ މައްސަލަތަކެއް ކޮމިޝަނަށް ހުށަހެޅުނު ކަމަށެވެ. އެކަން ބެލުމަށް ފަހު އެ ޕާޓީއަށް އިއްޔެ ނަސޭހަތުގެ ސިޓީ ފޮނުވާފައިވާ ކަމަށް ޒަކަރިއްޔާ ވިދާޅުވި އެވެ.
ގާތްގަނޑަކަށް 50،000 އެއްހާ މެންބަރުންގެ މައްޗަށް އެކުލެވޭ އެމްޑީޕީއަށް ނަސޭހަތް ދީފައިވަނީ ސިޔާސީ ޕާޓީގެ ގާނޫނުގެ 7 ވަނަ މާއްދާގެ ހ ގެ ދަށުންނެވެ. އެ މާއްދާގައި ބުނާ ގޮތުން ސިޔާސީ ޕާޓީއަކުން ގާނޫނުއަސާސީ އާއި ގާނޫނާ ހިލާފު އަމަލެއް ހިންގުން އަދި ޓެރަރިޒަމަށް ވާގިދޭ އަމަލެއް ހިންގައިގެން ނުވާނެ އެވެ. އަދި ހަރުކަށި އަމަލު ހިންގުމަށް ގޮވާލުމާއި އެކަމަށް ހިތްވަރު ދިނުންވެސް އެ މާއްދާގެ ދަށުން މަނާވާނެ އެވެ. ނަސޭހަތަށް ފަހު އެކަން ތަކުރާރުވާ ނަމަ ޖޫރިމަނާކުރާނެ އެވެ.
ރައީސް ޑރ މުހައްމަދު މުއިއްޒަށް، ރާއްޖޭގެ ފުރަތަމަ ރައީސް އަމީން ދީދީއަށް ހެދިގޮތް ހަދަން ޖެހޭ ކަމަށް ބުނެ އެމްޑީޕީން ކުޅުދުއްފުށި ސިޓީގައި ބޭއްވި ޖަލްސާއެއްގައި މީހަކު ދެއްކި ވާހަކަ ދިފާއުކޮށް އެކަމަށް ހިތްވަރުދޭ ގޮތަށް ފައްޔާޒު ވާހަކަ ދެއްކެވީ ނަސޭހަތުގެ ސިޓީ ފޮނުވި ފަހުން ކަމަށް ޒަކަރިއްޔާ ވިދާޅުވި އެވެ.
"ރައްޔިތުންނަށް ދެރަ ދިނީމަ ހަމަ މުހައްމަދު އަމީނަށް ހެދިހެން ހަދަން ޖެހޭނީ، އެހެން ގޮތެއްތޯ ކޮން ގޮތެއްތޯ ހަދާނީ،" އެ މީހާގެ ވާހަކަ ދިފާއުކޮށް ފައްޔާޒު ވިދާޅުވި އެވެ.
އެ ވާހަކަތައްވެސް އީސީގެ ސަމާލު ކަމަށް އައިސްފައިވާ ކަމަށާއި ފުލުހުންނާ ގުޅިގެން މައްސަލަ ބަލަމުންދާ ކަަމަށް ޒަކަރިއްޔާ ވިދާޅުވި އެވެ. އެ މައްސަލާގައި ފުލުހުން އަދި އެއްޗެއް ނުބެނެ އެވެ.
ނަމަވެސް މައްސަލަ ބަލައި ފައްޔާޒާ މެދު ފިޔަވަޅު އަޅަން ސަރުކާރުގެ އިސްވެރިންނާ މަޖިލީހުގެ މެންބަރުން ދަނީ ގޮވާލަމުންނެވެ. މަޖިލީހުގެ މިއަދުގެ ޖަލްސާއަށް ވަނީ އެކަމާ ގުޅިގެން ކުއްލި މައްސަލައެއް ވެސް ހުށަހަޅާފަ އެވެ. މިލަންދޫ ދާއިރާގެ ޕީއެންސީ މެންބަރު ހަސަން މުފީދު ހުށަހެޅުއްވި ކުއްލި މައްސަލާގައި ބަހުސްކުރި މެންބަރުން ގޮވާލީ ފައްޔާޒު ހައްޔަރުކުރަންށެވެ. އެއީ ޓެރަރިޒަމަށް ހިތްވަރުދޭ ފަދަ އަމަލެއްގެ ގޮތުގައި މެންބަރުން ސިފަކޮށްފައިވެ އެވެ.
ޖޫރީމައިނާއިން ފުއްދާނުލެވޭނެ ހައްޔަރުކޮށް ތަޙުގީގު ކުރޭ