ސުލްހަވެރި މުޖުތަމައެއް ބިނާކުރުމުގައި ރާއްޖެ ދެމި އޮންނާނެ: ރައީސް
ޑިމޮކްރަސީގެ މައިގަނޑު ތަނބުތައް ކަމުގައި ހިމެނޭ ކަރާމާތާއި ހަމަހަމަކަމާއި އިންސާފުވެރި މުޖުތަމައެއް ގާއިމު ކުރުމުގައި ރާއްޖެއިން ދަނީ ސާބިތުކަން ދައްކަމުން ކަމަށާއި ސުލްހަވެރި މުޖުތަމައެއް ބިނާކުރުމުގައި މި ގައުމު ދެމިއޮންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ފާހަގަކުރަމުން އަންނަ އިންސާނީ ހައްގުތަކުގެ ދުވަހާ ގުޅިގެން "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ މި ދުވަސް ފާހަގަކުރާއިރު، ހައްގުތައް ގުޅިލާމެހިފައިވާ މިންވަރު ހަނދާންކޮށްދޭ ކަމަށެވެ. އެހެން މީހުންގެ ހައްގުތަކަށް ވަކާލާތު ކުރުމަކީ އަމިއްލަ ހައްގުތައް ރައްކާތެރި ކުރުމުގެ މުހިންމުކަން ހަނދާން ކޮށްދޭ ކަމެއް ކަމަށެވެ. މި އުސޫލަކީ މީގެ 75 އަހަރު ކުރިން އުފެދުނު ޔޫއެންއެޗްޑީއާރުގެ އަސާސް ކަމަށެވެ.
އެމަނިކުފާނު ވިދާޅުވި ގޮތުގައި ޑިމޮކްރަސީގެ މައިގަނޑު ތަނބުތައް ކަމުގައި ހިމެނޭ ކަރާމާތާއި ހަމަހަމަކަމާއި އިންސާފުވެރި މުޖުތަމައެއް ގާއިމު ކުރުމުގައި ރާއްޖެއިން ދަނީ ސާބިތުކަން ދައްކަމުން ކަމުގަ އެވެ.
"މި ސަރުކާރަކީ އަޅުގަނޑުމެންގެ ހާއްސަ ޖިއޮގްރަފީ އާއި އެއްގޮތްވާ ގޮތުގެ މަތިން ސިއްހީ ހިދުމަތާއި ތައުލީމާއި އަދުލު އިންސާފަށް ހަމަހަމަކަމާ އެކު ވާސިލުވެވޭނެ ސިޔާސަތުތަކާއި ގާނޫނުތައް އެކުލަވާލައި ސުލްހަވެރި އެންމެން ބައިވެރިވާ މުޖުތަމައެއް ބިނާކުރަން މަސައްކަތް ކުރާ ސަރުކާރެއް،" ރައީސް ވިދާޅުވި އެވެ.
އެ ކަންކަމުގެ އިތުރުން ނޫސްވެރިކަމުގެ މިނިވަންކަމާއި މަސައްކަތްތެރިންގެ ހައްގުތަކާއި މިންތީގެ ހަމަހަމަކަމާ އަދި އަންނަން އޮތް ޖީލުތަކަށް ދެމެެހެއްޓެނިވި ތިމާވެއްޓެއް ގާއިމުކުރަން ހާއްސަ އަހައްމިއްޔަތު ކަމެއް ދީފައިވާ ކަަމަށް ވެސް ރައީސް ފާހަގަކުރެއްވި އެވެ.
ބައިނަލްއަގުވާމީ އިންސާނީ ހައްގުތަކުގެ ދުވަހުގެ ގޮތުގައި ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަސް ފާހަގަކުރަނީ ޔުނިވާސަލް ޑެކްލަރޭޝަން އޮފް ހިއުމަން ރައިޓްސް ނުވަަތަ އިންސާނީ ހައްގުތަކާ ބެހޭ ބައިނަލް އަގުވާމީ މުއާހަދާ ގައުމުތަކުން ތަސްދީގުކޮށް އަމަލުކުރަން ފެށި ދުވަހާ ގުޅުވައިގެންނެވެ. އެ ކަމަށް މިއަދު ފުރުނީ 76 އަހަރެވެ. މި އަހަރުގެ ޝިޔާރަކީ "އަހަރެމެންގެ ހައްގުތައް، އަހަރެމެންގެ މުސްތަގުބަލު. މިހާރުން މިހާރަށް." އެވެ.
Ads by STO
