މިނިސްޓަރުންގެ ބަސް: ގެއްލިގެން އެ ދިޔައީ އެތައް ހަނދާނަކާ ގުޅިފައިވާ ތަނެއް؛ އެއީ ދެ ވަނަ ގެ
އިއްޔެގެ ހެނދުނުގެ ވަގުތެއްގައި ހިނގި ނުރައްކާތެރި އަލިފާނުގެ ހާދިސާ އާ ގުޅިގެން ބޮޑު ގެއްލުމެއް ލިބުނު މ. ގްރީން ބިލްޑިންއަކީ ތަނުގައި މަސައްކަތްކުރާ ކޮންމެ މީހަކަށް ވެސް ހާއްސަ ތަނެއް ކަމަށާއި އަނދައިގެން ދިޔައީ ދެ ވަނަ ގެއެއްގެ ގޮތުގައި ދެކެމުން އައި ތަނެއް ކަމަށް ސިފަކުރައްވައިފި އެވެ.
ހައުސިން، ލޭންޑް އެންޑް އާބަން ޑިވެލޮޕްމަންޓް އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އަންނަ ގްރީން ބިލްޑިންގައި އަލިފާން ރޯވެފައި ވަނީ ބުރާސްފަތި ދުވަހުގެ ހެނދުނު 7:30 ހާއިރު އެވެ.
އަލިފާނުގެ ހާދިސާ އާ ގުޅިގެން ތިން މިނިސްޓްރީއެއް ހިންގަމުން އައި އޮފީސް އިމާރާތަށް ބޮޑެތި ގެއްލުންތަކެއްވެ، އެ ތަންތަނުން ދެމުން އައި ހިދުމަތްތައް ވަނީ މެދުކެނޑިފަ އެވެ. މިނިސްޓްރީތަކުގައި މަސައްކަތް ކުރަމުން އައި އެއްވެސް މުވައްޒަފަކަށް އަނިޔާވެފައެއް ނުވެ އެވެ.
"އެކްސް" ގައި ކުރެއްވި ޕޯސްޓެއްގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބު ވިދާޅުވީ "ޓިނު ބިލްޑިން" އަކީ ކޮންސްޓްރަކްޝަން މިނިސްޓްރީ އެހެން ތަނަކަށް ބަދަލުކުރަން ކުރި މަސައްކަތުގައި 2008 ވަނަ އަހަރު ބޭނުންކުރަން ފެށި ތަނެއް ކަމަށެވެ. ވަގުތީ ގޮތުން އެ ތަން ބޭނުންކުރަން ފެށި ނަމަވެސް އެފަހުން އެ ތަން ދާއިމީ ތަނަކަށް ބަދަލުވީ ކަމަށެވެ.
ތަނަކީ ކިތަންމެ އާދައިގެކޮށް ހަދާފައި ހުރި ތަނެއް ނަމަވެސް، އެއީ ތަނުގައި މަސައްކަތްކުރާ ކޮންމެ މީހަކަށް ވެސް ހާއްސަ ތަނެއް ކަމަށެވެ. ހުރިހާ ސާމާނަކާ އެކު އަނދައިގެން އެ ދިޔައީ މުވައްޒަފުންގެ ދެ ވަނަ ގެ ކަމަށާއި އެކަމުން ކޮށްފައިވާ އަސަރު ބޮޑު ކަމަށް ހައުސިން މިނިސްޓްރީގެ ކުރީގެ ޑެޕިއުޓީ މިނިސްޓަރު ފާހަގަކުރެއްވި އެވެ.
ހާދިސާ އާ ގުޅޭގޮތުން ހައުސިން މިނިސްޓަރު ޑރ. އަލީ ހައިދަރު އަހްމަދު ވިދާޅުވީ ގެއްލިގެން ދިޔައީ މިނިސްޓްރީގެ ގިނަ މުވައްޒަފުން ދެ ވަނަ ގެއެއްގެ ގޮތުގައި ދެކެމުން އައި ތަނެއް ކަމަށެވެ. އެއީ އެތައް ހަނދާނަކާއި އެތައް ބައެއްގެ މަސައްކަތާ ގުޅިފައިވާ ތަނެއް ކަަމަށެވެ.
މިނިސްޓަރު ވިދާޅުވި ގޮތުގައި ކުރިމަތިވި ބޮޑު ގޮންޖެހުމާ އެކު ވެސް، ހިދުމަތްތައް އަލުން ދޭން ފެށޭނެ ގޮތް ހަމަޖެއްސުމަށް މިނިސްޓްރީގެ ޓީމުން ވަރުބަލިކަމެއް ނެތި މަސައްކަތް ކުރަމުންދާ ކަމުގަ އެވެ.
ދިމާވި ދަތި ހާލަތާ ގުޅިގެން އެހީތެރިކަން ފޯރުކޮށްދެމުން އަންނަ ފަރާތްތަކުން ކުރަމުން ދަނީ އަގުނުކުރެވޭ ވަރުގެ މަސައްކަތްތަކެއްކަން ފާހަގަކުރައްވާ ރޭ "އެކްސް" ގައި ކުރެއްވި ޕޯސްޓުގައި އެމަނިކުފާނު ވަނީ ގޮންޖެހުންތަކުން އަރައިގަނެ، ކުރިއަށް ދިއުމުގައި މިނިސްޓްރީގެ މުވައްޒަފުން ސާބިތުވެ ތިބިކަން ހާމަކުރައްވާފަ އެވެ.
ހާދިސާ ހިނގިއިރު މިނިސްޓަރު ހުންނެވީ ތައިލެންޑުގަ އެވެ. އެ ގައުމަށް ވަޑައިގެންނެވީ އދ. އިން ބާއްވާ ސެޝަން އޮފް ދަ ކޮމިޓީ އޮން ސްޓެޓިސްޓިކްސްގެ 9 ވަނަ ބައްދަލުވުމުގައި ބައިވެރިވެވަޑައިގަތުމަށެވެ. އެހެންނަމަވެސް ދަތުރު ކުރުކޮށްލެއްވުމަށް ފަހު ރޭގެ ވަގުތެއްގައި ވަނީ ރާއްޖެއަށް ވަޑައިގެންފަ އެވެ.
ގްރީން ބިލްޑިންގައި ހިނގި އަލިފާނުގެ ހާދިސާ އާ ގުޅިގެން ހައުސިން މިނިސްޓްރީން އިއްޔެ ނެރުނު ނޫސް ބަޔާނެއްގައި ބުނެފައި ވަނީ ގެދޮރުވެރިޔާ ސްކީމާ ގުޅޭ ހުރިހާ މައުލޫމާތާއި ލިޔުންތަކަކީ އެ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތުތަކެއް ކަމަށް ވާތީ، ހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށެވެ.
ހާދިސާ އާ ގުޅިގެން ސަލާމަތާއި ރައްކާތެރި ކަމަށް ކުރެވެން ހުރި ކަންކަމާ ގުޅޭގޮތުން ކަމާ ގުޅޭ ފަރާތްތަކާ މަޝްވަރާ ކުރަމުންދާ ކަމަށް ވެސް ބުނެފައިވެ އެވެ.
ކޮންސްޓްރަކްޝަން މިނިސްޓްރީން ނެރުނު ބަޔާނުގައި ބުނީ ހިދުމަތްތަައް އަލުން ފެށޭނެ ތާރީހެއް ކަނޑައެޅުމަށްފަހު، އެކަން ވަގުތުން އިއުލާނުކުރާނެ ކަމަށެވެ. މިނިސްޓްރީން ވަނީ ވީހާވެސް އަވަހަށް ހިދުމަތްތައް އަލުން ފެށުމަށް މަސައްކަތް ކުރާނެ ކަމުގެ ޔަގީންކަން ދީފަ އެވެ.
އަލިފާނުގެ ހާދިސާ ހިނގި ސަރަހައްދު އެމްއެންޑީއެފްގެ ފަޔަ އެންޑް ރެސްކިޔު ސާވިސަސްއިން އަދިވެސް ދަނީ މޮނިޓަކުރަމުންނެވެ.
