ހައުސިންއާ ގުޅުންހުރި މައުލޫމާތު ނުގެއްލޭ ކަމުގެ ޔަގީންކަން މުއްތަލިބު ދެއްވައިފި
ހައުސިން މިނިސްޓްރީ އިމާރާތުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގެ ސަބަބުން ހައުސިންއާ ގުޅުންހުރި އެއްވެސް މައުލޫމާތެއް ނުގެއްލޭ ކަމުގެ ޔަގީންކަން ކޮންސްޓްރަކްޝަން އެންޑް އިންފްރާންސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ދެއްވައިފި އެވެ.
މުއްތަލިބު އެ ޔަގީންކަން ދެއްވި އަލިފާނުގެ ހާދިސާއާ ގުޅިގެން މައުލޫމާތު ދެއްވުމަށް އިދާރާތައް ގުޅިގެން މިއަދު ދަރުގޭގައި ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުންނެވެ.
މިނިސްޓަރު ވިދާޅުވީ، މިހާތަނަށް ބެލި ބެލުމުން ދައުލަތުގެ އިދާރާތަކުގެ ގިނަ މައުލޫމާތުތައް ރައްކާކުރެވިފައި އެބަހުރި ކަމަށެވެ. އަދި އެ ހާދިސާގެ ސަބަބުން މަދުވަނީ ކޮން މައުލޫމާތުތަކެއްތޯ ބެލުމުގެ މަސައްކަތް ކުރެވެމުންދާ ކަމަށް ވިދާޅުވި އެވެ.
"ސީދާ ރައްޔިތުންނާ ގުޅުންހުރި ކަންތައްތަކަށް ބަލާނަމަ، ހައުސިން އާ ގުޅުންހުރި އެއްވެސް އިންފޮމޭޝަނެއް ގެއްލިފައިނުވާކަމާއި އެ އެއްޗެހި މިހާރުވެސް އެބަހުރިކަން އަޅުގަނޑުމެންނަށް ޔަގީން ކުރެވޭ،" މުއްތަލިބު ވިދާޅުވި އެވެ.
އޭނާ ވިދާޅުވީ، އަލަށް ލޯނަށް އެޕްލައި ކުރި މީހުންގެ ފޯމުތަކާއި ޑޭޓާތައް ވެސް ކްލައުޑްގައި ރައްކާކުރެވިފައި އެބަހުރިކަން ޔަގީންކުރެވޭ ކަމަށެވެ. އޭގެ ތެރެއިން ވެސް ބަލަން ޖެހެނީ ފާއިތުވެދިޔަ ދުވަސްތަކުގައި މިނިސްޓްރީއިން ކުރި މަސައްކަތްތަކުގެ ޑޭޓާތަކުން ގެއްލުންވީ ކިހާ ވަރެއްތޯކަން ކަމަށް މުއްތަލިބު ވިދާޅުވި އެވެ.
އަލިފާނުގެ ހާދިސާ ހިނގި ސަރަހައްދުން ސާވާތަކުގެ ސްޓޯރޭޖް ނަގައިގެން އެތަކެތީގައި ހުރި ޑޭޓާތައް ރިކަވާ ކުރުމުގެ މަސައްކަތް މިހާރު ކުރަމުން އަންނަ ކަމަށް މިނިސްޓަރު ވިދާޅުވި އެވެ.
"ދައުލަތުގެ ވަރަށް ބައިވަރު މައުލޫމާތުތައް ގެއްލިގެންނެއް ނޫން މިއުޅެނީއެއް" ވިދާޅުވި އެވެ. އަދި ފާހަގަކުރެއްވީ ސަރުކާރުން ރައްޔިތުންނަށް ބޭނުންވާ ކަންތައްތައް ކޮށްދިނުމަށް ބޭނުންވާ މައުލޫމާތުތައް ރިކަވާ ކުރެވޭނެ ކަމަށާއި، އެ އެއްޗެހި ހުންނާނެ ކަމަށެވެ. އެހެންވެ، ރައްޔިތުން އެކަމާ ކަންބޮޑު ނުވުމަށް މިނިސްޓަރު އެދިވަޑައިގެންނެވި އެވެ.
މުއްތަލިބު އެހެން ވިދާޅުވެފައިވާއިރު، ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. އަލީ ހައިދަރު އަހްމަދު ވަނީ އަލިފާނުގެ ހާދިސާ އާ ގުޅިގެން މިނިސްޓްރީގެ ސާވާއަށް ވެސް ވަރަށް ބޮޑަށް ގެއްލުންވެ، އެއަށް "އެކްސެސް" ވުމުގެ ފުުރުސަތު ވަރަށް ކުޑަ ކަމަށް ވިދާޅުފަ އެވެ.
އިއްޔެ ދައުލަތުގެ މީޑިއާއަށް ދެއްވި އިންޓަވިއުއެއްގައި ހައިދަރު ވިދާޅުވީ، އަލިފާނުގައި އެ މިނިސްޓްރީގައި ހުރި ހުރިހާ ލިޔެކިޔުންތަކާ އަދި ޑޭޓާއެއް ނެތި ގޮސްފައިވާ ކަމަށެވެ. އަދި މިހާރު އަންދާޒާކުރެވިފައިވާ ގޮތުން ހައުސިން މިނިސްޓްރީގެ ސާވާ ސަލާމަތް ނުކުރެވޭނެ ކަމަށެވެ.
