ގުރައިދޫގައި ތުއްތު ކުއްޖަކު މަރުވުން: ހެލްތް ސެންޓަރަށް ގެންދިޔައީ ނޭވާލާން އުދަނގޫވެގެން
ކ. ގުރައިދޫގައި 4 މަހުގެ ކުއްޖެއްގެ މަރުގައި ޝައްކުތަކެއް އުޅޭތީ ފުލުހުން އެ މައްސަލަ ތަހުގީގުކުރަން ފަށާފައިވާއިރު، އެ ރަށު ހެލްތު ސެންޓަރަކަށް ގެންދިޔައިރުވެސް އެ ކުއްޖާ މަރުވެފައިވާކަން އެނގިއްޖެ އެވެ.
އެ މަރާ ގުޅޭ ގޮތުން "ދެން"އާ ވާހަކަ ދައްކަމުން ގުރައިދޫ ކައުންސިލު މެންބަރު އިބްރާހިމް ޝަލީޒް ވިދާޅުވީ އެ ތުއްތު ކުއްޖާ ހެލްތު ސެންޓަރަށް ގެންދިޔައީ ނޭވާލާން އުދަނގޫވެގެން ކަމަށެވެ.
"އަޅުގަނޑަށް މައުލޫމާތު ލިބުނީ އެ ދެމަފިރިން (ކުއްޖާގެ މަންމަ އާއި ބައްޕަ) ނިދަން އުޅެފައި ބެލި އިރު އެ ކުއްޖާ ނޭވާ ނުލާހެން ހީވެގެންނޭ ހެލްތް ސެންޓަރަށް ގެންދިޔައީ،" ޝަލީޒް ވިދާޅުވި އެވެ. އޭނާ ވިދާޅުވީ، އެކުއްޖާ ހެލްތް ސެންޓަރަށް ގެންދިޔައީ ރޭ ދަންވަރު 12:45 ހާއިރު ކަމަށެވެ.
ޑޮކްޓަރާ ހަވާލާދީ ޝަލީޒް ވިދާޅުވީ، ހެލްތު ސެންޓަރަށް ގެންދިޔައިރުވެސް އެ ކުއްޖާ މަރުވެފައިވާ ކަމަށެވެ. އަދި ކުއްޖާގެ ނޭފަތުން ލޭވޭސް ފޭބި ކަމަށް ޑޮކްޓަރާ ހަވާލާދީ އޭނާ ވިދާޅުވި އެވެ.
"އަޅުގަނޑު ވަރަށް ކައިރިން ކުއްޖާ ދުށިން. ބޭރު ފުށުން އެއްވެސް އަނިޔާއެއް ވެސް ފެންނާކަށް ނެތް" ޝަލީޒް ވިދާޅުވި އެވެ.
އެ ކުއްޖާގެ ހަށިގަނޑު ރޭ ތިނެއް ޖެހިހާއިރު މާލެ ގެނެސްފައިވާއިރު، މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ، މަރުވި ކުއްޖާގެ އޮޓޮޕްސީ ހަދަން ހަށިގަނޑު ބޭރަށް ފޮނުވަން ހަމަޖެހިފައިވާ ކަމަށެވެ.
އެ ތުއްތު ކުއްޖާގެ މަރާ ގުޅޭ އިތުރު ތަފްސީލެއް ފުލުހުން ހިއްސާ ކޮށްފައެއް ނުވެ އެވެ. އަދި އެ ކުއްޖާގެ އާއިލާގެ ބަހެއްވެސް ލިބޭގޮތް ވަނީ ނުވެފަ އެވެ.
ފުލުހުން ދަނީ އެ މައްސަލަ ތަހުގީގު ކުރަމުންނެވެ.
