ޕީޕީއެމް އުވާލުމުގެ މަސައްކަތް އީސީން ފަށައިފި
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލުމުގެ މަސައްކަތް އިލެކްޝަންސް ކޮމިޝަން (އީސީ) އިން ފަށައިފި އެވެ.
ޕީޕީއެމް އުވާލަން ނިންމާފައިވަނީ މި މަހުގެ ދެވަނަ ދުވަހު ބޭއްވި އެ ޕާޓީގެ ސެނެޓުން ބޭއްވި ބައްދަލުވުމުގަ އެވެ. އެގޮތަށް ނިންމާފައިވަނީ ސެނެޓަށް ވަޑައިގެން ތިއްބެވި 43 މެމްބަރުންގެ އިއްތިފާގުންނެވެ.
އީސީން މިއަދު ކުރި އިއުލާނެއްގައި ބުނީ، ޕީޕީއެމް އުވާލުމުގެ މަސައްކަތް އެ ކޮމިޝަނުން ކުރަމުންދާ ކަމަށެވެ. އެހެންވެ، ޕާޓީގެ ނަމުގައި އެއްވެސް ސިޔާސީ ހަރަކާތެއް ހިންގުން މަނާވެފައިވާ ކަމަށް އެ އިއުލާނުގައި ބުނެފައިވެ އެވެ.
އިތުރަށް އެ އިއުލާނުގައި ބުނީ އެ ޕާޓީ އުވާލުމަށްޓަކައި ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށް ކުރެވޭ މުއާމަލާތްތައް ފިޔަވައި އިތުރު އެއްވެސް މުއާމަލާތެއް ކުރުމުގެ އިހްތިޔާރު ޕީޕީއެމަށް ލިބިގެން ނުވާ ކަމަށެވެ.
ޕާޓީއާ ގުޅިގެން ނިންމަންޖެހޭ އެއްވެސް ކަމެއްވާނަމަ، އުވާލުމުގެ މަރުޙަލާ ނިމުމުގެ ކުރިން އެ ޕާޓީއާ ގުޅިގެން ކުރިއަށް ގެންދިއުމަށް އީސީން އެދިފައިވެ އެވެ.
Ads by STO
