ޚަބަރު ސިޔާސީ

ކޮރަޕްޝަނަށް ފުރުސަތު ނުދޭނެކަން ރައީސް ދަނީ ސާބިތުކޮށްދެއްވަމުން: އާދަމް ޝަރީފް

މުޙައްމަދު ޢަތީފް ، ދެން އޮންލައިން
ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު / ފޮޓޯ:ދެން އިމޭޖްސް

ކޮރަޕްޝަނަށް އެއްވެސް ފުރުސަތެއް ނުދެއްވާނެކަން ރައީސް ޑރ. މުހައްމަދު މުއިއްޒުގެ ނިންމެވުންތަކުން ސާފުވާ ކަމަށް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

Ads by STELCO

މިނިސްޓަރު އެހެން ވިދާޅުވީ މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ފަށާފައިވަނިކޮށެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.

ސޯޝަލް މީޑިއާގައި ދައުރުވާ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި މާލެ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ. އޭނާގެ އިތުރުން އިތުރު މީހަކަށް ވެސް އެގޮތަށް ރަޖިސްޓްރީ ހަދައިދީފައިވެ އެވެ.

މައްސަލަ އާ ގުޅިގެން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އެޗްޑީސީގެ ޗެއާމަން ފިޔަވައި އެ ކުންފުނީގެ ޑިރެކްޓަރުންގެ ބޯޑުގެ ހުރިހާ މެންބަރުން ސަސްޕެންޑްކޮށްފަ އެވެ. އޭގެ ތެރޭގައި ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވެސް ހިމެނިވަޑައިގަންނަވަ އެވެ.

"އެކްސް" ގައި މިއަދު ކުރެއްވި ޕޯސްޓުގައި އާދަމް ޝަރީފް ވިދާޅުވެފައި ވަނީ ރައްޔިތުންގެ ހައްގަކަށް އުނި ކަމެއް ލިބޭނެ އެއްވެސް ކަމެއް ރައީސަށް އެނގިވަޑައިގެން ހިނގިޔަ ނުދެއްވާނެ ކަމަށެވެ. އަދި އެ ޔަގީންކަން އެމަނިކުފާނަށް އޮތް ކަމަށެވެ.

"ރާއްޖެއިން ކޮރަޕްޝަން މަދުކުރެވޭނީ ކޮރަޕްޝަނަށް މަގުފަހިވާ ކޮންމެ ކަމަކަށް ހުރިހާ މުއައްސަސާތަކުންނާއި އާންމު ރައްޔިތުން ވެސް ނޫނެކޭ ބުނެގެން. އެ ހިތްވަރު އެންމެންގެ ކިބައިގައި ހުންނަން ވާނެ،" މިނިސްޓަރު ވިދާޅުވި އެވެ.

އެމްޑަބްލިއުއެސްސީން ބުނެފައި ވަނީ އެ މައްސަލަ އާ ގުޅިގެން ފަޒީލް މިއަދުން ފެށިގެން ހުރިހާ ޒިންމާތަކަކުން ވަކިކޮށް، އޮފީހަށް ނުނިކުމޭ ގޮތަށް ސަސްޕެންޑްކޮށްފައިވާ ކަމަށެވެ.

ކަމަކީ އާންމު މަސްލަހަތު މަތީ މިންވަރަކަށް އެކުލެވޭ ކަމަކަށްވާތީ ފުރިހަމަ ޖިނާއީ ތަހުގީގެއް ހިންގަން ޖެހޭ ކަމެއް ކަމަށް ދެކި މައްސަލައިގެ ފުރިހަމަ ތަހުގީގެއް ހިންގަން ޕްރޮސެކިއުޓާ ޖެނެރަލް އައްބާސް ޝަރީފް ވެސް ވަނީ މިއަދު އަމުރުކުރައްވާފަ އެވެ.

ޕީޖީ އޮފީހުން ބުނެފައި ވަނީ ގާނޫނު އަސާސީގެ ދަށުން ޕީޖީއަށް ލިބޭ ބާރުގެ ދަށުން "ބިންވެރިޔާ" އަދި "ގެދޮރުވެރިޔާ" ސްކީމްގެ ފޯމު ބަލައިގަތުމާއި ފްލެޓާއި ގޯތި ލިބޭ ފަރާތްތައް ކަނޑައެޅުމާއި ގޯއްޗާއި ފްލެޓު ދޫކުރުމުގައި އަމަލުކޮށްފައިވާ ގޮތުގެ ތަހުގީގެއް ހިންގުމަށްފަހު އެކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭ ނަމަ އެކަން ތަހުގީގު ކުރުމަށްފަހު ދައުވާ ކުރުމަށް ޓަކައި ހުށަހެޅުމަށް ފުލުހުންނާއި އޭސީސީއަށް އަމުރުކޮށްފައިވާ ކަމަށެވެ.

އެ އަމުރުގައި ވަނީ މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފުތާއަކު 1 ފަހަރު ޕީޖީ އާ ހިއްސާކުރަމުން ގެންދިއުމަށާއި މައްސަލައިގެ އަވަސް ތަހުގީގެއް ހިންގުމަށެވެ.

Ads by Ooredoo

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!