ކުރީ ސަރުކާރުން ބަދަލު ދިން މައްސަލައިގެ ޖިނާއި ތަހުގީގެއް ހިންގަން ޕީޖީން އަންގައިފި
ނިމިދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ބަދަލުގެ ގޮތުގައި އެކި ފަރާތްތަކަށް ފައިސާއާއި މުދާތައް ދީފައިވާ މައްސަލައިގެ ޖިނާއީ ތަހުގީގެއް ކުރަން ޕްރޮސެކިއުޓާ ޖެނެރަލް (ޕީޖީ) އައްބާސް ޝަރީފް އެންޓި ކޮރަޕްޝަން ކޮމިޝަން (އޭސީސީ) އަށް މިއަދު އަމުރުކޮށްފި އެވެ.
އެމްޑީޕީގެ ސަރުކާރުން އުފެއްދި ސެޓްލްމަންޓް ކޮމިޓީން ބަދަލުގެ ގޮތުގައި އެކި ފަރާތްތަކަށް ދީފައިވާ މުދަލާއި ފައިސާގެ މައްސަލާގައި ސޯލިހާއި އެ ކޮމިޓީގައި ހިމެނިވަޑައިގަންނަވާ ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއީލާއި ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްޗަށް ޖިނާއީ ތަހުގީގެއް ހިންގައި، ދައުވާ ކުރުމަށް ޕީޖީ އަށް ލަފާދިނުމަށް ރައްޔިތުންގެ މަޖިލީހުން ފާސްކޮށްފައިވަނީ މި މަހުގެ 12 ވަނަ ދުވަހެވެ.
އެ މައްސަލައަކީ މަޖިލީހުގެ މާލިއްޔަތު ކޮމިޓީއަށް ހުށަހެޅި މައްސަލައެކެވެ. އެ މައްސަލާގައި ބުނެފައިވަނީ 17 ނޮވެންބަރު 2018 އިން ފެށިގެން 17 ނޮވެންބަރު 2023 ގެ ނިޔަލަށް އެކި ފަރާތްތަކަށް ބަދަލުގެ ގޮތުގައި 36 ރަށަކާއި ފަޅަކާއި ދެ ބިލިއަން ރުފިޔާ ދީފައިވާ ކަމަށެވެ. އަދި ބަދަލުގެ ގޮތުގައި ދީފައިވާ ތަކެތި އަނބުރާ ނެގުމަށް ކަމާބެހޭ އިދާރާތަކަށް އެންގުމަށްވެސް އެ މައްސަލާގައި ބުނެފައިވެ އެވެ.
މާލިއްޔަތު ކޮމިޓީގެ ރިޕޯޓާ ހަވާލާދީ ޕީޖީން ނެރުނު އަމުރުގައި ބުނީ ދައުލަތުގެ އިސް މަގާމުތަކެއް އަދާކުރައްވާފައިވާ ބައެއްގެ މައްޗަށް ދައުލަތުގެ ފައިސާއާއި މުދާ, އެ ތަކެތީގެ ހައްގުވެރިން ފިޔަވައި އެހެން ފަރާތްތަކަށް ލިއްބައިދީ، އަދި ލިއްބައިދިނުމަށް މަސައްކަތްކޮށްފައިވާ ކަމަށް ތުހުމަތުކުރެވޭ ކަމަށެވެ.
ޕީޖީން ބުނީ އެކަމުގައި ދައުލަތުގެ މުވައްޒަފުންތަކެއް ރަސްމީ ވާޖިބުތަކާ ހިލާފަށް، އަދި ދައުލަތަށް ގެއްލުންލިބޭ ގޮތަށް އަމަލުކޮށްފައިވާ ކަމަށް ތުހުމަތުކުރެވޭ ކަންތައްތަކެއް ރިޕޯޓުގައި ފާހަގަކޮށްފައިވާ ކަމަށެވެ.
އެ ކަންކަމަކީ އޭސީސީ އަށް ތަހުގީގުކުރުމުގެ ބާރު ލިބިފައިވާ ކަންތައްތަކެއްކަމަށް ފާހަގަކުރައްވާ ޕީޖީން ބުނީ އެކަމުގައި ޖިނާއީ ތަހުގީގެއް ހިންގުމަށް އެ ކޮމިޝަނަށް މިދިޔަ އަންގާރަ ދުވަހު އަންގާފައިވާނެ ކަމަށެވެ.
އެ މައްސަލާގެ އަވަސް ތަހުގީގެއް ހިންގުމަށާއި ތަހުގީގަށް ކުރިއެރުން ލިބެމުންދާ ވަރަކުން ޕީޖީއާ މަޝްވަރާކުރަމުން ގެންދިއުމަށް ޕީޖީން އޭސީސީއަށް އަންގާފައިވެ އެވެ.
ކުރީ ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ދަށުން ސޮއިކޮށްފައިވާ ބަދަލު ދިނުމުގެ 9 މައްސަލައެއް އެޓާނީ ޖެނެރަލްގެ އޮފީހުން ވަނީ ދާދި ފަހުން ބާތިލުކޮށްފަ އެވެ.
ކުރީ ސަރުކާރުން ބަދަލުގެ ގޮތުގައި ވަނީ ފައިސާއާއި އެކި ރަށްތަކާއި ފަޅެއް ބަދަލުގެ ގޮތުގައި ދީފައިވެ އެވެ.
ބަދަލުގެ ގޮތުގައި ދިން ރަށްތަކުގެ ތެރޭގައިި ނ. އެކުޅިވަރު، ތ. އަތޮޅުގެ ތިން ރަށް ކަމަށްވާ ވަންބަދި، ކަނި އަދި ފުށިީގެ އިތުރުން އއ. މަޑޫގަލި ރ. ވިލިނގިލިއާއި ތާވަތާގެ އިތުރުން ހދ. ހޮނޑާފުށި، ހދ. މުރައިދޫ، ނ. އޮރިމަސް ހިމެނެ އެވެ. އއ. މާފަރު ފަޅު ވެސް ބަދަލުގެ ގޮތުގައި ދީފައިވެ އެވެ.
