އެމްޑީޕީން ރާއްޖޭގެ ފަތުރުވެރިކަން ފޫނުބެއްދޭވަރުގެ ކަމެއް ނުކުރާނެ: ޕީއެންސީ
ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން އަދި މަދަނީ ޖަމިއްޔާއަކުން ރާއްޖޭގެ ފަތުރުވެރި ކަމަށް އަދި ދިވެހި އިގުތިސޯދަށް ފޫނުބެއްދޭވަރުގެ ގެއްލުމެއް ލިބިދާނެ ނުރައްކާތެރި އަމަލެއް ނުހިންގާނެ ކަމުގެ ޔަގީންކަން ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ) އިން ދީފި އެވެ.
ޕީއެންސީން މިއަދު ބަޔާނެއް ނެރެފައިވަނީ އެ ޕާޓީން ހ. ވެޔޮވިލާގައި ރޭގައި ބޭއްވި ޖަގަހަ ޖަލްސާގައި ރައްޔިތުންގެ މަޖިލީހުގެ ފޭދު ދާއިރާގެ ކުރީގެ މެންބަރު މުހަައްމަދު ނިހާދު ދެއްކެވި ވާހަކައަކާ ގުޅުވައިގެންނެވެ.
އެ ޖަލްސާގައި ވާހަކަ ދައްކަވަމުން ނިހާދު ވަނީ ބުރާސްފަތި ދުވަހަށް ރާއްޖެއަށް މި އަހަރު ޒިޔާރަތްކުރާ ފަތުރުވެރިންގެ އަދަދު 2 މިލިއަނާ ހަމަކުރަން މަސައްކަތް ކުރަމުންދާ މި ދަނޑިވަޅުގައި ފަތުރުވެރި ކަމަށް ހުރަސް އެޅުމަށް އިދިކޮޅު މައި ޕާޓީ، އެމްޑީޕީން ރިސޯޓުތަކަށް އަރަން އުޅޭ ކަމަށް ތުހުމަތުކޮށްފަ އެވެ.
ޕީއެންސީން ބުނީ ސިޔާސީ ޕާޓީތަކާއި މަދަނީ ޖަމިއްޔާތައް މަސައްކަތްކުރަނީ ގާނޫނީ އިމުގެ ތެރޭގައި ކަމަށެވެ. އަދި އެ އިމުން ބޭރުވާ ނަމަ އަޅަން ޖެހޭ ފިޔަވަޅުތައް ދައުލަތުގެ ކަމާ ބެހޭ އިދާރާތްތަކުން އަޅާނެކަމުގެ ޔަގީންކަން އެ ޕާޓީއަށް އޮތް ކަމަށެވެ.
ރާއްޖެއަކީ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން އަބަދުވެސް މަސައްކަތް ކުރަމުންދާނެ ކަމަށް ޕީއެންސީން ބުންޏެވެ. އަދި ފަތުރުވެރި ކަމަށް އިންވެސްޓްކޮށްފައިވާ ފަރާތްތަކުގެ އިންވެސްޓްމެންޓުތައް ރައްކާތެރިކޮށްދިނުމަށް ސަރުކާރުން އަދާކުރަން ޖެހޭ ޒިންމާތައް އެންމެ ފުރިހަމައަށް އަދާކުރާނެކަމުގެ އިތުބާރު އޮތް ކަަމަށެވެ.
ފަތުރުވެރިންނާއި އިންވެސްޓަރުންނަށް ރައްކާތެރިކަމާއި، ސުލްހަވެރިކަމާއި އަމާން މަންޒިލެއް ގޮތުގައި ރާއްޖެ ބޭއްވުމަށް ދައުލަތުގެ މުއައްސަސާތަކުން ކުރާ މަސައްކަތްތައް ވެސް ޕީއެންސީން ވަނީ ފާހަގަކޮށްފަ އެވެ.
އެއްވެސް ފަރާތަކުން ބައިނަލްއަގުވާމީ ދުނިޔޭގައި ރާއްޖޭގެ ޝުހުރުތަށް އުނިކަން އަތުވާނެ ގޮތައް އެއްވެސް އަމަލެއް ނުކުރުމަށް ބަޔާނުގައި އިލްތިމާސްކޮށްފައިވެ އެވެ.
މި މައްސަލަ އާ ގުޅިގެން އެމްޑީޕީން ވެސް މިއަދު ވަނީ ބަޔާނެއް ނެރެފަ އެވެ. އެ ބަޔާނުގައި ވަނީ ނިހާދު ދެއްކި ވާހަކަތައް ސީރިއަސް މައްސަލައެއްގެ ގޮތުގައި ބަލައި ރާއްޖެއަށް ޒިޔާރަތްކުރާ ފަތުރުވެރިންނާއި ސިނާއަތުގައި މަސައްކަތް ކުރަމުންދާ ހުރިހާ މުވައްޒަފުންނާ އަދި ފަތުރުވެރިންނަށް ހިދުމަތްދޭ ހުރިހާ ވިޔަފާރިއެއްގެ ސަލާމަތާއި ރައްކާތެރިކަން ކަށަވަރު ކޮށްދިނުމަށް ކަމާ ގުޅުންހުރި ހުރިހާ އިދާރާތަކަށް ގޮވާލާފަ އެވެ.
މައްސަލަ އާ ގުޅިގެން ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު މިހާރު ވަނީ ސަސްޕެންޑްކޮށްފަ އެވެ.
