ރައީސުލްޖުމްހޫރިއްޔާ ޑރ މުހައްމަދު މުއިއްޒު، މިއަދު ކެބިނެޓަށް ބަދަލުތަކެއް ގެންނަވައި، ބައެއް މިނިސްޓްރީތަކުގެ ނަން ބަދަލުކުރައްވައިފި އެވެ.
ކެބިނެޓަށް އައްޔަންކުރެއްވި ބޭފުޅުންނަށް މަގާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު އޮތީ، މިއަދު ހެނދުނު ރައީސް އޮފީހުގަ އެވެ.
އެ ރަސްމިއްޔާތުގައި ކެބިނެޓަށް އައްޔަނުކުރެއްވީ:
- ފިނޭންސް އެންޑް ޕްލޭނިން މިނިސްޓަރަކަށް ތ. ބުރުނި، ނިވައިދޮށުގެ، މޫސާ ޒަމީރު
- ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓަރަކަށް މއ. ވެނީލާ، ޑރ އަލީ ހައިދަރު އަހްމަދު
- އެގްރިކަލްޗަ އެންޑް އެނިމަލް ވެލްފެއަ މިނިސްޓަރަކަށް މއ. މާރާދަގެ، ޑރ މަރްޔަމް މާރިޔާ
- ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރަކަށް ގދ. ފިޔޯރީ، ގުލްބަކާގެ، ޑރ އަބްދުﷲ މުއްތޮލިބް
ކެބިނެޓަށް އައްޔަނުކުރެއްވި ބޭފުޅުންނަށް ހުވާލައިދެއްވީ ސުޕްރީމް ކޯޓުގެ ފަނޑިޔާރު އަލީ ރަޝީދު ހުސައިނެވެ. ހުވާކުރެއްވުމަށްފަހު، އެ ބޭފުޅުން ވަޒީރުންގެ މަޖިލީހުގެ މެންބަރުންގެ ހުވާގެ އިގުރާރުގައި ސޮއިކުރެއްވި އެވެ.
ރައީސް އޮފީހުން ބުނީ މި ބަދަލުތަކަށްފަހު ރައީސް ވަނީ ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އުވާލައްވައި، އެ މިނިސްޓްރީގެ މަސައްކަތްތައް ފިނޭންސް އެންޑް ޕްލޭނިން މިނިސްޓްރީއަށާއި ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީއަށް ބަދަލުކުރައްވާފައި ކަަމަށެވެ.
އެ ރަސްމިއްޔާތަށްފަހު ރައީސް ވަނީ މިއަދު އައްޔަނުކުރެއްވި 4 ވަޒީރުންނާ ބައްދަލުކުރައްވާފަ އެވެ. އެ ބައްދަލުކުރެއްވުމުގައި ކުރިއަށް އޮތް އަހަރަކީ ސަރުކާރުގެ މަސައްކަތްތައް މިހާރަށް ވުރެ އިތުރަށް ހަރުދަނާކޮށް، ބާރު ސްޕީޑުގައި ކުރިއަށްގެންދިއުމަށް ނިންމަވާފައިވާ އަހަރެއް ކަމުގައި ރައީސް ވިދާޅުވި ކަމަށެވެ. އަދި މިނިސްޓްރީގެ އޮނިގަނޑު އެކުލަވާލުމުގައި ބަދަލުވާ މުވައްޒަފުންނަށް ދަތިނުވާނެ ގޮތަށް ކަންކަން ހަމަޖެއްސެވުމަށް އެމަނިކުފާނު ބާރުއެޅުއްވި ކަމަށް ވެސް ރައީސް އޮފީހުން ބުންޏެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އެއްކޮށްލައި އުފެއްދި އާ މިނިސްޓްރީގެ ހިންގުން ހަވާލުކުރެއްވި މުއްތޮލިބު ކުރިން ހުންނެވީ ކޮންސްޓްރަކްޝަން މިނިސްޓަރަަކަށެވެ. އަދި މި ބަދަލާ އެކު ހައުސިން މިނިސްޓަރަކަށް ހުންނެވި ހައިދަރުއާ ހަވާލުކުރެއްވީ ހަޔާ އެޑިއުކޭޝަން މިނިސްޓްރީ އެވެ.
އެގްރިކަލްޗާ މިނިސްޓަރަކަށް ހުންނެވި ޑރ އައިޝަތު ރަމީލާ އިސްތިއުފާ ދެއްވުމާ ގުޅިގެން އެ މިނިސްޓްރީ ވަގުތީ ގޮތުން ހިންގެވުމާ ހަވާލުވެވަޑައިގެން ހުންނެވީ، މިއަދު އެ މިނިސްޓްރީއަށް އައްޔަންކުރެއްވި މާރިޔާ އެވެ. އެކަމަނާ ކުރިން ހުންނެވީ ހަޔާ އެޑިޔުކޭޝަން މިނިސްޓަރަކަށެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އެއްކޮށްލަން ނިންމިއިރު، އެ ދެ މިނިސްޓްރީ ހިންގަމުން އައި ގްރީން ބިލްޑިންގައި ނުރައްކާތެރި އަލިފާނުގެ ހާދިސާއެއް ހިނގައި ބޭނުން ނުކުރެވޭ ވަރަށް ގެއްލުންވެފައިވަނީ މީގެ ދެ ހަފުތާ ކުރިންނެވެ.
އެ ހާދިސާ އާ ގުޅިގެން އެ ދެ މިނިސްޓްރީގެ ހިދުމަތް ވަގުތީ ގޮތުން ދެމުން އަންނަނީ ދަރުބާރުގެއިންނެވެ.
ކެބިނެޓަށް ގެންނަން ނިންމި މި ބަދަލާ އެކު ސަރުކާރުގައި ދެން އޮންނާނީ 21 މިނިސްޓްރީއެކެވެ. އަދި މިއީ މި ވެރިކަމުގައި ކެބިނެޓަށް ގެނައި ދެ ވަނަ ބަދަލެވެ. މީގެކުރިން ބަދަލު ގެނެސްފައިވަނީ ފިނޭންސް މިނިސްޓަރަކަށް ހުންނެވި ޑރ މުހައްމަދު ޝަފީގު އިސްތިއުފާ ދެއްވުމާ ގުޅިގެންނެވެ.
އެކަމާ ގުޅިގެން ފިނޭންސް މިނިސްޓަރުގެ މަގާމަށް ފޮރިން މިނިސްޓަރަކަށް ހުންނެވި މޫސާ ޒަމީރު އަދި ހެލްތު މިނިސްޓަރު ޑރ އަބްދުﷲ ހަލީލު، ފޮރިން މިނިސްޓްރީއަށް ބަދަލުކުރެއްވި އެވެ. އަދި ހެލްތު މިނިސްޓަރަކަށް އައްޔަންކުރެއްވީ ރައީސް އޮފީހުގެ މިނިސްޓަރަކަށް ހުންނެވި އަބްދުﷲ ނާޒިމެވެ.
ކޮމެންޓް