ފިހާރައަކުން 5 ފޯނު ވަގަށް ނެގީ ގޭ ބަންދުގައި ހުރި މީހެއް
ބަންދު ހުކުމެއްގައި ހުރި މީހަކު ފޯނު ފިހާރައެއް ފަޅާލައި ވައްކަންކޮށްގެން ހައްޔަރުކޮށްފި އެވެ.
އެ މައްސަލައިގައި ހައްޔަރުކުރީ ރ. މީދޫ، ބުލްބުލްގެ، އަޒްމީލް މުހައްމަދު (40އ) އެވެ.
ފުލުހުން އޭނާާގެ މައްޗަށް ކުރަނީ ރޭ ފަތިހު ހަތަރެއް ޖަހާކަންހާއިރު މާފަންނުގައި ހުންނަ "ސްޕައި އެންޑް ޓެކް" މޯބައިލް ފިހާރަ ދޮރު ހަލާކުކޮށްލައިގެން ވަދެ އެ ފިހާރައިން ވައްކަން ކުރިކަމުގެ ތުހުމަތެވެ.
ފުލުހުން ބުނީ އޭނާ ހައްޔަރުކޮށް، ބަލައި ފާސްކުރިއިރު އެ ފިހާރައިން ވަގަށް ނަގާފައިވާ ކަމަށް ބެލެވޭ 5 ފޯނު ފެނުނު ކަމަށެވެ.
އެ މައްސަލައިގައި އޭނާގެ ބަންދަށް ކްރިމިނަލް ކޯޓުން މިއަދު ވަނީ 15 ދުވަހުގެ ބަންދުގެ މުއްދަތު ޖަހައިދީފަ އެވެ.
ފުލުހުން ބުނީ އަޒްމީލަކީ މިދިޔަ އޮކްޓޫބަރު މަހުގެ ހަ ވަނަ ދުވަހު "ކްރޭވެސް ޓޭކްއަވޭ" ރެސްޓޯރަންޓުން ވައްކަންކޮށްފައިވާ މައްސަލަ އާ ގުޅިގެން ކުށް ސާބިތުވެ، 5 މަހާއި 22 ދުވަހަށް ގޭބަންދު ކުރުމަށް މި އަހަރުގެ ނޮވެމްބަރު މަހުގެ 6 ވަނަ ދުވަހު ކްރިމިނަލް ކޯޓުން ހުކުމްކޮށްފައިވާ މީހެއް ކަމަށެވެ.
އަދި އޭނާއަކީ މީގެކުރިން އެކި މައްސަލަތަކާ ގުޅިގެން 59 ފަހަރެއްގެ މަތިން ހައްޔަރުކޮށްފައިވާ، މަސްތުވާތަކެތި ބޭނުންކުރުމާއި ވައްކަމާއި ފޭރުމުގެ ކުށުގެ ރެކޯޑު ވެސް އޮންނަ މީހެއް ކަމަށް ފުލުހުން ބުނެފައިވެ އެވެ.
ތަކުރާރުކޮށް ވައްކަމުގެ މައްސަލަތަކުގައި މިފަދަ މީހުން ހައްޔަރު ކުރުމުގެ މައްސަލަތައް ގިނަ އެވެ. އަދި އެފަދަ މައްސަލަތަކުގައި ގިނައީ މަސްތުވާތަކެތި ބޭނުންކުރާ މީހުންނެވެ.
Ads by STO
