ތިނަދޫ ސިޓީގެ ދަރަޖަ ބާތިލުކުރަން ހައި ކޯޓަށް ހުށަހެޅި މައްސަލަ ބޭރުކޮށްލައިފި
ގދ. ތިނަދޫއަށް ސިޓީއެއްގެ ދަރަޖަ ދިނުމަށް މިދިޔަ ސަރުކާރުން ނިންމެވިއިރު، އެ ރަށުގައި 10،000 މީހުން ހަަމަނުވާ ކަމަށް ބުނެ ސިޓީގެ ދަރަޖަ އަތުލުމަށް އެދި، ހައި ކޯޓަށް ހުށަހެޅި މައްސަލަ ދުސްތޫރީ މައްސަލަ ބަލައިނުގަތުމަށް ނިންމައިފި އެވެ.
ރައީސް އޮފީހަށް ރައްދުވާ ގޮތަށް މިދިޔަ މަހުގެ 21 ވަނަ ދުވަހު އެ މައްސަލަ ހުށަހެޅުއްވީ ގާނޫނު ވަކީލު, މުހައްމަދު ރާބިގު އަހުމަދެވެ.
އެ މައްސަލާގައި ހައިކޯޓުގެ ރަޖިސްޓްރާ, މަރިޔަމް ހޫރުޝީދާ ނިންމި ނިންމުމުގައި ބުނެފައިވަނީ އެ ގަރާރާ ގުޅޭ ހުށަހެޅުންތަކަކީ ރާއްޖޭގެ ސުޕްރީމް ކޯޓުގެ ގަޒިއްޔާއެއްގައި ދުސްތޫރީ ގޮތުން ހައިކޯޓަށް ބެލޭނެ ކަމަށް ކަނޑައެޅިފައިވާ ފަދަ ހުށަހެޅުމަކަށް ނޫން ކަމަށެވެ.
"ދެން" އަށް ލިބިފައިވާ މައްސަލައިގެ ލިޔުމުގައިވާ ގޮތުން މިދިޔަ ސަރުކާރުން ތިނަދޫއަށް ސިޓީއެއްގެ ދަރަޖަ ދިނުމުގައި ރަސްމީ އާބާދީގެ އަސްލަކަށް ބަލާފައިވަނީ އޭރުގެ ތިނަދޫ ކައުންސިލުން ހިއްސާކުރި ލިޔުންތަކެއް ކަމަށް ބުނެފައިވެ އެވެ. އަދި އެ ލިޔުމުގައި 10،150 މީހުން ހަމަކޮށްފައިވަނީ ސައްހަ ނޫން މައުލޫމާތު ހިމަނައިގެން ކަމަށް ބުނެފައިވެ އެވެ.
ކޯޓަށް ހުށަހެޅުނު މައްސަލައިގައި ފާހަގަކޮށްފައިވާ ގޮތުން، 10،000 މީހުން ހަމަކުރުމަށް ތަކުރާރުކޮށް އައިޑީކާޑު ބޭނުންކޮށްފައިވާ ކަމަށާއި، އެވަގުތު މަރުވެފައިވާ 115 މީހުން އާބާދީގައި ހިމަނާފައިވާކަން ފާހަގަކޮށްފައިވެ އެވެ. އަދި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ރެޖިސްޓްރީ ލިސްޓަށް ބެލުމުން އެ އަދަދު 196 އަށް އަރާ ކަމަށް ވެސް ބުނެފައިވެ އެވެ.
އިތުރަށް އެ ލިޔުމުގައި ބުނެފައިވާ ގޮތުން ޑީއެންއާރުގެ ރެޖިސްޓްރީ ލިސްޓާއި ކައުންސިލްގެ ލިސްޓު އަޅާކިޔުމުން ބޮޑު ފަރަގެއް ފާހަގަވާން ހުރި ކަމަށެވެ. އެ ލިޔުމުގައި ބުނެފައިވާ ގޮތުން މި މަހުގެ 17 ވަނަ ދުވަހާ ހަމައަށް ޑީއެންއާރުގެ ރެޖިސްޓްރީން ދައްކާ ގޮތުން ތިނަދޫގެ އާބާދީއަކީ 7،924 އެވެ.
އެކަންކަން ފާހަގަކޮށް ރާގިބު ހުށަހެޅުއްވި ދުސްތޫރީ މައްސަލާގައި އެދިފައިވަނީ ތިނަދޫއަކީ ސިޓީއެއްގެ ގޮތުގައި ކަނޑައެޅި ނިންމުމާއި އެ ނިންމުމާ ގުޅިގެން އަޅާފައިވާ އިދާރީ ހުރިހާ ފިޔަވަޅުތައް ބާތިލު ކުރުމަށެވެ.
ލާމަރުކަޒީ ގާނޫނު ބުނާ ގޮތުން ސިޓީއެއްގެ ދަރަޖަ ލިބެނީ ރަށެއްގެ ރެޖިސްޓްރީގައިވާ އެރަށުގެ އާބާދީ މަދުވެގެން 10،000 އިން މައްޗަށް އެރުމުންނެވެ.
ތިނަދޫއަށް ސިޓީއެއްގެ ދަރަޖަ ދިނުމަށް އެދި ތިނަދޫގެ ކައުންސިލުން ލޯކަލް ގަވަމަންޓް އޮތޯރިޓީ (އެލްޖީއޭ) އަށް ސިޓީއެއް ވެސް ފޮނުވާފައިވެ އެވެ.
2022 އަހަރު ކައުންސިލުން، އެލްޖީއޭއަށް ލިޔެކިޔުންތައް ފޮނުވުމުން އޭރު އެލްޖީއޭގެ ސީއީއޯ އަފްޝަން ލަތީފް ވަނީ ރަށުގެ ރެޖިސްޓްރޭޝަން އާބާދީ މަދު ނަމަވެސް ރަށުން ހިދުމަތް ހޯދާ މީހުންގެ އާބާދީ 12،000 އަށް އަރާ ކަމަށް ކައުންސިލާ ހަވާލާދީ ވިދާޅުވެފަ އެވެ.
Ads by STO
