އިންޑިއާއިން ރާއްޖޭގެ ރަށްތަކުގައި މަޝްރޫއުތަކެއް ހިންގަން އެއްބަސްވުމެއްގައި ސޮއިކޮށްފި
ރަށްތަކުގައި މަޝްރޫއުތަކެއް ހިންގަން ދިވެހި ސަރުކާރުން އިންޑިއާ އާއެކު އެއްބަސްވުމެއްގައި ސޮއިކޮށްފި އެވެ.
"ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ފޭސް 3" ގެ އެއްބަސްވުމުގައި ސޮއިކޮށްފައި ވަނީ ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލް އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުގެ ތެރެއިންނެވެ.
އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓަރު ހަލީލެވެ. އިންޑިއާ ސަރުކާރުގެ ފަރާތުން ސޮއިކުރެއްވީ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު އެވެ.
"ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ފޭސް 3" ގެ ދަށުން ކުރިއަށް ގެންދާ ޕްރޮޖެކްޓްތަކަކީ ސީދާ ރައްޔިތުންނަށް އޭގެ ފައިދާ ކުރާ ގޮތަށް އަތޮޅުތަކުގައި ކުރިއަށްގެންދާ ޕްރޮޖެކްޓްތަކެކެވެ.
ފޮރިން މިނިސްޓަރު ހަލީލުގެ ދަތުރުގައި މިއަދު އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރާ މިއަދު ނިއުދިއްލީގައި ބައްދަލުކުރެއްވި އެވެ.
ފޮރިން މިނިސްޓްރީން ބުނީ އެ ބައްދަލު ކުރެއްވުމުގައި އިންޑިއާގެ ހިލޭ އެހީ އާއި ލައިން އޮފް ކްރެޑިޓްގެ ދަށުން ހިނގަމުންދާ މަޝްރޫއުތައް ކުރިއަށްދާ ގޮތާ މެދު ދެ ބޭފުޅުން މަޝްވަރާ ކުރެއްވި ކަަމަށެވެ. އަދި ރާއްޖޭގެ ތަރައްގީގައި އިންޑިއާގެ އިސްދައުރު ފާހަގަކޮށް، އިގުތިސޯދީ ރޮނގުން ދެ ގައުމުގެ ގުޅުން އިތުރަށް ބަދަހިކުރެވޭނެ ގޮތްތަކާ މެދު މަޝްވަރާ ކުރެއްވި ކަމަށެވެ.
ހަމަ އެއާއެކު، ރާއްޖެއަށް މިވަގުތު ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށް އިންޑިއާއިން ދެމުން އަންނަ އެހީތެރި ކަމަށް ދިވެހި ސަރުކާރުގެ ފަރާތުން ހަލީލް ޝުކުރު އަދާކުރެއްވި ކަމަށް ފޮރިން މިނިސްޓްރީން ބުންޏެވެ.
އިންޑިޔާއިން ޒަމާނުއްސުރެ ރާއްޖެ އާ ދޭތެރޭ ބަހައްޓަވައި ގާތްކަން ފާހަގަކުރައްވައި، މި ދަތުރަށްފަހު ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށް މިނިސްޓަރު ވިދާޅުވި ކަމަށް ވެސް އެ މިނިސްޓްރީން ފާހަގަކޮށްފައިވެ އެވެ.
Ads by STO
