ރާއްޖެއަށް ވައި ނުސާފު، މާސްކް އަޅައި ރައްކާތެރިވާން އިލްތިމާސްކޮށްފި
މާލެ ސަރަހައްދުގެ ޖައްވު ފުދޭވަރަކަށް ބޮޑަށް ނުސާފުވެފައިވާތީ މާސްކް އަޅައި ރައްކާތެރިވާން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފި އެވެ.
ދިވެހިރާއްޖޭގެ ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ވިލިމާލެ ކެމްޕަސް އިމާރާތުގައި ބަހައްޓާފައި ހުންނަ އެއާ ކޮލިޓީ މޮނިޓަރިން ސިސްޓަމުން ދައްކާ ގޮތުގައި މާލެ ސަރަހައްދުގެ ވައިގެ ކޮލިޓީ މިވަގުތު ހުރީ 122 ގަ އެވެ.
މިހާރު ވައިގެ ކޮލިޓީ ހުރީ ނާޒުކު ފަރާތްތަކުގެ ސިއްހަތަށް ނުރައްކާތެރިވާ މިންވަރެއްގަ އެވެ. މި މިންވަރުގައި ނާޒުކު ހާލަތުގައިވާ ފަރާތްތަކަށާއި އެހެން މީހުންނަށް ވެސް ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑެވެ. ވުމާ އެކު ބޭރަށް ނިކުންނަން ޖެހޭ ހާލަތްތަކުގައި މާސްކް އެޅުމަށް ވަނީ އިލްތިމާސްކޮށްފަ އެވެ.
މާލެ ސަރަހައްދުގެ ވައިގެ ކޮލިޓީ މެދުމިނަށް އަންނާނެ ކަމަށް ލަފާކޮށްފައި ވަނީ މިއަދު ހަވީރު 6:00 އިން ފެށިގެނެވެ.
ގައުމީ މޫސުމާ ބެހޭ އިދާރާ، މެޓް އޮފީހުން މީގެކުރިން ބުނެފައިވާ ގޮތުގައި އާންމުކޮށް ވައި ނުސާފުވަމުން ދަނީ އިރުވައި މޫސުމާ ދިމާކޮށް ކަމުގަ އެވެ. ޑިސެމްބަރު މަހާއި މާޗް މަހާ ދެމެދު އާންމު ގޮތެއްގައި ވައިގެ ކޮލިޓީ ދަށްވާ ކަމުގަ އެވެ.
އެޗްޕީއޭއިން މިއަދު "އެކްސް" ގައި ކުރި ޕޯސްޓެއްގައި ވަނީ ވައި ނުސާފު ވަގުތުތަކުގައި ރައްކާތެރިވެ ސަމާލުކަން ދޭންވީ ކަންތައްތައް ފާހަގަކޮށްފަ އެވެ. އެގޮތުން ފާހަގަކޮށްފައިވާ ކަންކަމަކީ:
- ފުއްޕާމެ އާއި ހިތުގެ ބައްޔާއި އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުން
- ބޭރަށް ނިކުންނަން ޖެހޭ ހާލަތްތަކުގައި ރައްކާތެރި މާސްކް އެޅުން
- ކުޑަކުދިންނާއި ދޮށީ އުމުރުގެ މީހުންނާ އަދި މާބަނޑު މީހުން ބޭރުގައި ގިނަ ވަގުތު ހޭދަ ނުކުރުން
- ތުއްތު ކުދިން ބޭރަށް ނުނެރުން
- ގޭގެ ދޮރުތައް ލައްޕާފައި ބެހެއްޓުން
- ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންތައްތައް މަޑުޖައްސާލުން
މިފަހުން ކޮންމެ އަހަރެއްގެ އިރުވައި މޫސުމުގައި ޖައްވު ނުސާފުވުމުގެ ސަބަބުން ފުސް ކަމުގެ އަސަރު ރާއްޖެއަށް ކުރެ އެވެ.
އެކަން މެދުވެރިވަނީ އުތުރު އިންޑިއާގެ ސަރަހައްދުތަކުން އަންނަ ވައި ނުސާފުވުމާ ގުޅިގެންނެވެ. އެ ވައިގައި ފެކްޓްރީތަކުން އަރާ ދުމާއި ހިރަފުސް ހިމެނޭއިރު، ފުސްކަމުގެ ސަބަބުން ލޮލަށް ފެންނަ ދުރުމިން ދަށްވެ، ދަތުރުފަތުރުކުރަން ދަތިވެ، ސިއްހީ މައްސަލަތަކާ ދިމާވެ އެވެ.
