ފިޔޯރީގެ މަސް ފެކްޓްރީގެ މަސައްކަތް އެޕްރީލްގައި ފެށޭނެ: ރައީސް
ގދ. ފިޔޯރީގައި އަޅާ މަސް ފެކްޓްރީގެ އަމަލީ މަސައްކަތް އަންނަ އެޕްރީލް ހިސާބުގައި ފެށޭނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ގދ. ފިޔޯރީއަށް ވަޑައިގެން އެ ރަށުގައި ވާހަކަފުޅު ދައްކަވަމުން ރައީސް ވިދާޅުވީ ރިޔާސީ ކެމްޕޭންގައި ފިޔޯރީގައި މަސް ފެކްޓްރީއެއް ގާއިމުކުރެއްވުމަށް އެމަނިކުފާނު ވެވަަޑައިގެންނެވި ވައުދު ފުއްދަވާނެ ކަމަށެވެ.
އަދި ވައުދާ އެއްގޮތަށް 3،000 ޓަނުގެ މަސް ފެކްޓްރީގެ މަސައްކަތް ވަރަށް އަވަހަށް ފެށިގެންދާނެ ކަމުގެ ޔަގީންކަން ރައީސް ދެއްވި އެވެ.
އަދި ވިދާޅުވީ އެ ފެކްޓްރީ ވެގެންދާނީ ދުވާލަކު 100 ޓަނުގެ ދަޅު މަސް ބަންދުކުރާ ފެކްޓްރީއަކަށް ކަމަށެވެ. އަދި އެތަނުގައި 3،000 ޓަނުގެ މަސް ފިނިކޮށް ރައްކާކުރެވޭ ކޯލްޑް ސްޓޯރޭޖްއަކާ އެކު، 100 ޓަނުގެ ފިޝް މީލް ޕްލާންޓަކާއި 50 ޓަނުގެ އައިސް ޕްލާންޓެއް ވެސް ގާއިމުކުރެވިގެންދާނެ ކަމަށް އެމަނިކުފާނު ވިދާޅުވި އެވެ.
"ޗައިނާގެ ކުންފުންޏަކާ އެކުގައި ސޮއިކުރުމަށް މަސައްކަތް ކުރަނީ. ފައިނޭންސްއިން ކަންތައް ހަމަޖައްސައިގެން އެކަންތައް ކުރިއަށް ގެންދަން މިހާރު ގޮސްފައިވާ ހިސާބުން އެންމެ ލަސްވެގެން އިރާދަކުރެއްވިއްޔާ ފެބްރުއަރީ މަހުގެ ތެރޭގައި އެގްރިމަންޓްގައި ސޮއިކުރެވި އަދި އޭގެ ފަހުން އެންމެ ގިނަ ވެގެން ދެ މަސް ދުވަހުގެ ތެރޭގައި އަމަލީ ގޮތުން ފެކްޓްރީގެ މަސައްކަތް މި ރަށުގައި ފެށޭނެ،" ރައީސް ވިދާޅުވި އެވެ.
ރައީސް ވިދާޅުވީ އެ ފެކްޓްރީއާ އެކު އެ ސަރަހައްދުގެ މަސްވެރިކަމަށް ވަރަށް ބޮޑު ކުރިއެރުމެއް ލިބިގެންދާނެ ކަމަށެވެ.
މަސްވެރިކަމަކީ ދިވެހީންގެ ލޭނާރު ކަމަށާ އަދި އެމަނިކުފާނު އެންމެ އިސްކަން ދެއްވާ އެއް ސިނާއަތަކީ މަސްވެރިކަން ކަމަށް ވިދާާޅުވި އެވެ،
އެމަނިކުފާނު ވިދާޅުވީ މީގެ ކުރީ ސަރުކާރުތަކުން އެކި ވައުދުތައްވެ، އެކި އުއްމީދުތައް ދިނުމަށް ފަހު ވެސް އޭގައި އޮތީ ކުލަ ނުޖެހި ކަމަށެވެ.
