ޖަލުގައި ބަނޑުހައިހޫނުކަމުގެ ހަޅުތާލެއް ކުރާތާ 3 ދުވަސް
މާފުށީ ޖަލުގައި ގައިދީންތަކެއް ބަނޑުހައިހޫނުކަމުގެ ހަޅުތާލުކުރަމުންދާތާ 3 ދުވަސްވެފައިވާ ކަމަށް މޯލްޑިވްސް ކަރެކްޝަނަލް ސާވިސް އިން މިއަދު ބުނެފި އެވެ.
މި ނޫހަށް އެނގިފައިވާ ގޮތުން ބަނޑުހައިހޫނުކަމުގެ ހަޅުތާލު ކުރަމުންދަނީ ޖަލުގެ ޔުނިޓް 3 އާއި 4 ވަނަ ޔުނިޓްގެ ގައިދީންތަކެކެވެ.
އެނގިފައިވާ ގޮތުން އެ ހަޅުތާލުކުރަން ފެށީ އެ 2 ޔުނިޓްގެ ސެކިއުރިޓީ ވަރުގަދަކުރުމުންނެވެ. އެހެންވެ ކުރިން ކޮރިޑޯއަށް ނިކުމޭވޭ ގޮތަށް މިހާރު ނުނިކުމެވޭތީ އެކަމުގެ ކަންބޮޑުވުން އެބައޮތެވެ.
ހަޅުތާލުކުރާ ބައެއް ގައިދީންގެ ހާލު ދެރަވެ ހޮސްޕިޓަލަށް ގެންދަން ޖެހުނު ކަމަށް ބުނާ ވާހަކަތަކެއް ވެސް ސޯޝަލް މީޑިއާގައި ދައުރު އެބަވެ އެވެ.
އެކަމަކު އަދި މިހާތަނަށް އެއްވެސް ގައިދީއަކަށް ފަރުވާދޭން ޖެހޭ ހާލަތެއް މެދުވެރިނުވާ ކަމަށް ކަރެކްޝަންސްގެ މީޑީއާ އޮފިޝަލް ވަނީ "ދެން" އަށް ވިދާޅުވެފަ އެވެ. އޮފިޝަލް ވިދާޅުވީ އޮންނަ އުސޫލުގެ ތެރެއިން ގައިދީންގެ ޑިމާންޑެއް އޮތްނަމަ އެކަން ފުރިހަމަކޮށްދިނުމުގެ މަސައްކަތް ކުރަމުންދާ ކަމަށެވެ.
ޖަލުގައި މީގެ ކުރިންވެސް ގައިދީން ބަނޑުހައި ހޫނުކަމުގެ ހަޅުތާލުކޮށްފައި އެބަހުއްޓެވެ.
