އީއައިއޭ ނަހަދާ ވެލި ނަގާ ނަމަ ފިޔަވަޅު އަޅާނަން: އީޕީއޭ
ޒަރޫރީ ބޭނުންތަކަށް ވެލި ނަގަން ކަނޑައަޅާފައިވާ ސަރަހައްދުތަކުން މެޝިނަރީ ބޭނުންކޮށްގެން ވެލި ނަގަމުންދާ ކަމަށާއި އީއައިއޭ ނަހަދާ އެގޮތަށް ވެލި ނަގާ ފަރާތްތަކަށް ފިޔަވަޅު އަޅާނެ ކަމަށް އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނެފި އެވެ.
އީޕީއޭއިން އިއްޔެ ނެރުނު ނޫސް ބަޔާނެއްގައި ބުނީ އާންމު ރައްޔިތުންގެ ޒަރޫރީ ބޭނުންތަކަށް ވެލި ނެގުމަށް ކަނޑައަޅާފައިވާ ސަރަހައްދުތަކަކީ މެޝިނަރީ ބޭނުންނުކޮށް، ހަމައެކަނި ޒަރޫރީ ބޭނުމަށް ވެލި ނެގުމަށް ކަނޑައަޅާފައިވާ ސަރަހައްދުތަކެއް ކަމަށެވެ.
ނަމަވެސް، އެފަދަ ސަރަހައްދުތަކުން، ހެދިފައިވާ އުސޫލުތަކާއި ހިލާފަށް ގިނަ އަދަދަކަށް ވެލި ނަގާ ކަމުގެ ޝަކުވާ އެ އެޖެންސީއަށް ލިބެމުން އަންނަ ކަމަށެވެ.
"މިފަދަ ސަރަހައްދުތަކުން، ހެދިފައިވާ އުސޫލުތަކާއި ހިލާފަށް ގިނަ އަދަދަކަށް ވެލި ނަގާ ކަމުގެ ޝަކުވާ މި އެޖެންސީއަށް ދަނީ ލިބެމުންނެވެ. މިގޮތުން، މެޝިނަރީ ބޭނުންކޮށްގެން އަދި ވިޔަފާރި އުސޫލުން އެކި އެކި ބޭނުމަށް ވެލި ނަގަމުންދާކަން ވަނީ މި އެޖެންސީއަށް ފާހަގަވެފަ އެވެ،" ބަޔާނުގައިވެ އެވެ.
އީޕީއޭއިން ބުނީ ކޮންމެ އަތޮޅެއްގައި ވެސް، މެޝިނަރީ ބޭނުންނުކޮށް، ޒަރޫރީ ބޭނުމަށް ވެލި ނެގުމަށް ވަކި ހާއްސަ ސަރަަހައްދުތަކެއް ކަނޑައަޅާފައިވާ ކަމަށެވެ.
ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާ ބެހޭ ގަވާއިދުގައިވާ ގޮތުން މެޝަނަރީ ބޭނުންކޮށްގެން ފަޅުފުންކުރުމާއި ވެލިނެގުމުގެ މަސައްކަތްތަކަކީ އީއައިއޭ މަރުހަލާ ފުރިހަމަކޮށްގެން، ކުރިއަށް ގެންދަން މަސައްކަތެއްކަން ފާހަގަކުރި އެވެ. އެގޮތުން މެޝިނަރީ ބޭނުންކޮށްގެން ވެލި ނަގަން ޖެހިއްޖެ ނަމަ، އެކަން ކުރަން ޖެހޭނީ އަތޮޅު ކައުންސިލާ އަދި ކަމާ ގުޅޭ އެހެން ސަރުކާރުގެ އިދާރާތަކާ އެކު މަޝްވަރާކޮށް އެކަމަށް ހާއްސަ ފަޅެއް ކަނޑައަޅައިގެން ކަމަށް ބުނެފައިވެ އެވެ. އެ ސަރަހައްދުން ވެލި ނަގާއިރު ގަވާއިދާ އެއްގޮތަށް އީއައިއޭ މަރުހަލާ ފުރިހަމަ ކުރަން ޖެހޭނެ ކަމަށެވެ.
އީޕީއޭއިން ވަނީ މެޝިނަރީ ބޭނުންކޮށްގެން ވެލި ނަގާ ފަރާތްތަކުން އެ އެޖެންސީން ތަންފީޒު ކުރަމުންދާ ގަވާއިދުތަކާއި އުސޫލުތަކާ އެއްގޮތަށް މަސައްކަތްތައް ކުރިއަށްގެންދިއުމަށް އިލްތިމާސްކޮށްފަ އެވެ. ގަވާއިދާ ހިލާފަށް އަމަލުކުރާ ފަރާތްތަކާ މެދު އެޖެންސީން ފިޔަވަޅު އަޅަމުންދާނެކަން ވަނީ ބަޔާނުގައި ވަނީ ފާހަގަކޮށްފަ އެވެ.
